మీ లేఖ అందింది

బ్రిట్టాస్‌కు మలయాళంలో అమిత్‌షా ప్రత్యుత్తరం
తిరువనంతపురం : సీపీఐ (ఎం) నాయకుడు, కేరళకు చెందిన రాజ్యసభ ఎంపీ జాన్‌ బ్రిట్టాస్‌ రాసిన ఓ లేఖకు కేంద్ర హోం మంత్రి అమిత్‌ షా మలయాళంలో ప్రత్యుత్తరమిచ్చారు. కేంద్ర హోం మంత్రి ఈ విధంగా మలయాళంలో తన స్పందన తెలియజేయడం ఇదే మొదటి సారి. ఏడు లేదా అంతకంటే ఎక్కువ సంవత్సరాల జైలుశిక్ష విధించే నేరానికి సంబంధించి ఛార్జిషీటు దాఖలైతే ఆ వ్యక్తి యొక్క ఓవర్సీస్‌ సిటిజన్‌షిప్‌ ఆఫ్‌ ఇండియా (ఓసీఐ) రిజిస్ట్రే షన్‌ను రద్దు చేయాలంటూ హోం శాఖ ఇచ్చిన ఆదేశాలలో చట్టపరమైన లోపాలు ఉన్నాయని బ్రిట్టాస్‌ తన లేఖలో ఎత్తిచూపారు. అక్టోబర్‌ 22న బ్రిట్టాస్‌ ఈ లేఖ రాస్తూ ఆ ఆదేశాలను సమీక్షించి రద్దు చేయాలని కోరారు. రాజ్యాంగం ఇచ్చిన హామీలను ఆ ఆదేశాలు ఉల్లంఘిస్తున్నాయని తెలిపారు. ఓసీఐ కార్డును కలిగి ఉన్న వారిని ప్రభావితం చేసే ఏ చర్య అయినా చట్టపరమైన నిర్ధారణ ఆధారంగానే ఉండాలి తప్ప కేవలం విధానపరమైన చర్యల ఆధారంగా కాదని బ్రిట్టాస్‌ తన లేఖలో వివరించారు. బ్రిట్టాస్‌ లేఖపై అమిత్‌ మలయాళంలో స్పందిస్తూ లేఖ అందిందని ప్రత్యుత్తరం ఇచ్చారు. అయితే అందులో ఇతర వివరాలేవీ లేవు.