అవార్డులు నిర్జీవం – ఆదర్శాలు సజీవం

ఆర్థిక నేరస్తుడు గౌతమ్‌ అదానీ స్పాన్సర్డ్‌ అవార్డును తమిళ కవయిత్రి సుకీర్తరాణి తిరస్కరించి ఎందరికో ఆదర్శంగా నిలవడం శుభ పరిణామం. ఈ రకంగా ఆమె అవార్డుని స్వీకరించపోవడం దేశవ్యాప్తంగా సంచలనం సృష్టించడమే కాకుండా ప్రతి ఒక్కరిని ఆలోచింప జేసిందనడంలో ఏమాత్రం సందేహం లేదు. అవార్డ్‌లను ప్రకటించగానే స్వీకరించాలనుకునే వారు కోకొల్లలు ఉన్న ఈ రోజుల్లో ఆమె తాను విశ్వసించిన ఆదర్శాల మేరకు ఆ అవార్డుని తిరస్కరించి భావి తరాలకు సరికొత్త సందేశాన్ని అందివ్వడం అభినందనీయం. ది న్యూ ఇండియన్‌ ఎక్స్‌ప్రెస్‌ గ్రూప్‌ నిర్వహించే ‘దేవి అవార్డ్స్‌’ కోసం దేశవ్యాప్తంగా సుకీర్తరాణితో పాటుగా శాస్త్రవేత్త గగన్దీప్‌ కాంగ్‌, భరతనాట్యం నృత్యకారిణి ప్రియదర్శిని గోవింద్‌, పరోపకారి రాధికా సంతానకృష్ణ, స్క్వాష్‌ క్రీడాకారిణి జోష్నా చినప్ప తదితరులు మొత్తంగా 12 మంది మహిళా ప్రముఖులను ఎంపిక చేయగా, తమిళ కవయిత్రి సుకీర్తరాణి మాత్రమే అవార్డును తిరస్కరించడం గమనార్హం. ముఖ్యంగా సుకీర్తరాణి దళిత సాహిత్యానికి చేసిన కృషికి ఎంపికయ్యారు. ‘నేను మొదట ఈ అవార్డును స్వీకరించడానికి అంగీకరించాను. కానీ ముఖ్యంగా ఈ అవార్డ్‌ ఈవెంట్‌కు ప్రధాన స్పాన్సర్‌ అదానీ అని తెలుసుకుని నేను నిర్ఘాంతపోయాను. నేను మాట్లాడే రాజకీయాలు, నేను నమ్మిన సిద్ధాంతాల కోసం అదానీ గ్రూప్‌ ఆర్థికంగా మద్దతు ఇచ్చే కార్యక్రమంలో అవార్డును స్వీకరించడం నాకు సంతోషంగా లేదు. కాబట్టి నేను ‘దేవి అవార్డు’ని స్వీకరించడానికి నిరాకరి స్తున్నాను. అయితే నిపుణుల బృందం ఎంపిక తీర్పును మాత్రం గౌరవి స్తాను’ అని పేర్కొనడం ఆమె విధేయత పటిమని సష్టంగా వెల్లడిస్తుంది. 1973లో తమిళనాడులోని వేలూరు జిల్లాలోని లాలాపేట్‌ అనే గ్రామంలో నిరుపేద దళిత కుటుంబంలో సుకీర్తరాణి జన్మించారు. ఎకనామిక్స్‌, తమిళ సాహిత్యంలో మాస్టర్స్‌ పూర్తి చేశారు. ఆమె రాణిపేట జిల్లాలోని ప్రభుత్వ బాలికల ఉన్నత పాఠశాలలో తమిళం బోధిస్తున్నారు. ఆమె చురుకైన స్త్రీవాది, సామాజిక కార్యకర్త. సుకీర్తరాణి తమిళంలో రాసే దళిత స్త్రీవాద కవయిత్రి. ఆమె కవితలు కులం, శరీరం చుట్టూ కేంద్రీకృతం అయ్యాయి. కుల వ్యవస్థ స్త్రీల శారీరక స్వేచ్ఛను ఎలా నిర్బంధిస్తుందో ఆమె తన రచనల ద్వారా బట్టబయలు చేశారు. ఆ ప్రాంతంలోని పది దళిత కుటుంబాలలో పాటుగా ఆమె ఒకరిగా పెరిగారు. ఆమె చిన్నప్పటి నుండి కుల వివక్షని ఎదుర్కొన్నారు. నేను ఇంటి బయట అడుగు పెట్టగానే కులం ‘కుక్క’లా వెంటాడుతుంది అని ఆమె ఆవేదన చెంది తక్షణమే సామాజిక కార్యాచరణ దిశగా ప్రేరేపింపబడ్డారు.
కైపత్రి యెన్‌ కనవు కేల్‌, ఇరవు మిరుగమ్‌, కామత్తిపూ, తీండపడతా ముత్తం, అవలై మొజిపెయర్తాల్‌, ఇప్పదిక్కు ఏవల్‌ మొదలైన ఆరు కవితా సంకలనాలను సుకీర్తరాణి రచించారు. ఆమె తన రచనల ద్వారా మరుగున పడిన అనేక విషయాలను వెలుగులోకి తీసుకువచ్చారు. ముఖ్యంగా సుకీర్తరాణి కవితలు తమిళనాడులోని కళాశాల పాఠ్యాంశాలలో చేర్చబడ్డాయి. 2021 ఆగస్ట్‌లో ఢిల్లీ యూనివర్సిటీ అకడమిక్‌ కౌన్సిల్‌ ఏకపక్షంగా ఇంగ్లీష్‌ హానర్స్‌ సిలబస్‌ నుండి సుకీర్తరాణి రాసిన బామా అలియాస్‌ ఫౌస్టినా సూసైరాజ్‌ అనే పాఠ్యంశాన్ని తొలగించడం సర్వత్రా విమర్శలకు గురైంది. ఆమె కవితలు ఇంగ్లీష్‌, మలయాళం, కన్నడ, హిందీ, జర్మన్‌ భాషలలోకి అనువదించబడ్డాయి. దళిత స్త్రీలు అధ్వాన స్థితుల్లో కొట్టు మిట్టాడుతున్న ప్రస్తుత తరుణంలో ఆమె ప్రధానంగా స్త్రీ విముక్తి గురించి ముఖ్యంగా దళిత మహిళల అభ్యున్నతిపై దృష్టిని కేంద్రీకరించి ఆ దిశగా పురోగమిస్తున్నారు. ‘నమ్మిన ఆదర్శాల ముందు అవార్డులు ఏమాత్రం సరితూగవు’ అని సుకీర్తరాణి నిరూ పించారు. నిర్జీవ అవార్డుల కన్నా చరిత్రలో కలకాలం సజీవంగా మనగలిగే ఆదర్శాలు నూతన సమాజ నిర్మాణానికి బాసటగా నిలుస్తాయి అని నిస్సందేహంగా చెప్పవచ్చు.
జెజెసిపి బాబూరావు
9493319690

Spread the love