– బీఆర్కే భవన్లో బాధ్యతల స్వీకరణ
– సీఎం సహా మంత్రులు, పలువురు ఉన్నతాధికారుల శుభాకాంక్షలు
– ముఖ్యమంత్రి నమ్మకాన్ని నిలబెడతా : శాంతికుమారి
నవతెలంగాణ బ్యూరో – హైదరాబాద్
రాష్ట్ర ప్రభుత్వ నూతన ప్రధాన కార్యదర్శి (సీఎస్)గా సీనియర్ ఐఏఎస్ శాంతి కుమారి నియమితులయ్యారు. ఈ మేరకు సీఎం కేసీఆర్ నిర్ణయం తీసుకున్నారు. తద్వారా తెలంగాణ తొలి సీఎస్గా ఆమె ఘనత సాధించారు. సోమేశ్ కుమార్ ఉందంతం నేపథ్యంలో సీఎస్గా ఆమెను నియమిస్తూ సాధారణ పరిపాలనాశాఖ బుధవారం ఉత్తర్వులు జారీ చేసింది. ఆ వెంటనే మధ్యాహ్నం 3.15 గంటలకు ఆమె బాధ్యలను స్వీకరించారు. అనంతరం నిర్వహించిన మీడియా సమావేశంలో మాట్లాడుతూ… సీఎం కేసీఆర్ తన మీద ఉంచిన నమ్మకాన్ని నిలబెట్టేందుకు కృషి చేస్తానని తెలిపారు. 1989 ఐఏఎస్ బ్యాచ్కు చెందిన శాంతి కుమారి… ఎమ్మెస్సీ మెరైన్ బయాలజీ చదివి, అమెరికాలో ఎంబీఏ కూడా పూర్తి చేశారు. గత మూడు దశాబ్దాలుగా ఐఏఎస్గా పేదరిక నిర్మూలన, సమ్మిళిత అభివృద్ధి, విద్య, వైద్య ఆరోగ్య రంగాలు, స్కిల్ డెవలప్మెంట్, అటవీశాఖల్లో వివిధ హోదాల్లో సేవలందించారు. ఐక్యరాజ్యసమితి అభివృద్ధి కార్యక్రమాల్లో రెండేండ్లపాటు పనిచేశారు. గతంలో నాలుగేండ్లపాటు సీఎం కార్యాలయంలో ప్రిన్సిపల్ సెక్రటరీగా, టీఎస్ ఐపాస్లో ఇండిస్టీ ఛేజింగ్ సెల్ స్పెషల్ సెక్రటరీగా కూడా సేవలందించారు. బుధవారం వరకూ అటవీశాఖ ప్రత్యేక ప్రధాన కార్యదర్శిగా వ్యవహరించిన ఆమె… కేసీఆర్ మంత్రిగా ఉన్న సమయంలో మెదక్ కలెక్టర్గా పనిచేశారు. సీఎస్గా బాధ్యతలు స్వీకరించిన అనంతరం.. శాంతి కుమారి ప్రగతిభవన్లో ముఖ్యమంత్రి కేసీఆర్ను కలిశారు. తనను సీఎస్గా నియమించినందుకు ధన్యవాదాలు తెలిపారు. సీఎం కేసీఆర్తోపాటు పలువురు మంత్రులు, ఉన్నతాధికారులు ఆమెకు అభినందనలు తెలిపారు. సోమేశ్కుమార్ను ఆంధ్రప్రదేశ్కు కేటాయిస్తూ కేంద్ర ప్రభుత్వం జారీ చేసిన ఉత్తర్వులను హైకోర్టు మంగళవారం సమర్థించిన విషయం తెలిసిందే. ఆ తీర్పు వెలువడిన కొన్ని గంటల వ్యవధిలోనే.. తెలంగాణ నుంచి సోమేశ్కుమార్ రిలీవ్ కావాలంటూ కేంద్ర సిబ్బంది, శిక్షణ వ్యవహారాల శాఖ (డీవోపీటీ) లిఖితపూర్వక ఆదేశాలు జారీ చేసింది. దీంతో కొత్త సీఎస్ నియామకం అనివార్యమైంది. ఆ అంశంపై సీఎం కేసీఆర్ కసరత్తు చేసి శాంతికుమారి పేరును ఖరారు చేశారు. ఆమె ఆ పదవిలో 2025 వరకు కొనసాగనున్నారు.
