– ఒకరికి తీవ్ర గాయాలు
నవతెలంగాణ-హుస్నాబాద్ రూరల్
సిద్దిపేట జిల్లా హుస్నాబాద్ మండలంలోని మీర్జాపూర్ గ్రామంలో సోమవారం నాటు బాంబు పేలి ఎండి ఖలీల్ అనే యువకునికి తీవ్ర గాయాలయ్యాయి. సోమవారం ఉదయం గ్రామానికి చెందిన ఖలీల్ పశువులను మేపేందుకు పొలం వద్దకు తోలుకెళ్లాడు. తాళ్లతో వాటిని కట్టేసి ఉంచేందుకు భూమిలోకి మేకు కొడుతుండగా నాటు బాంబు పేలినట్టు స్థానికులు చెబుతున్నారు. ఈ ఘటనలో ఖలీల్ చేతితోపాటు కాలుకు గాయాలయ్యాయి. అతన్ని వెంటనే 108 అంబులెన్స్లో వరంగల్ ఎంజీఎం ఆస్పత్రికి తరలించారు. ఘటనా స్థలాన్ని హుస్నాబాద్ ఏసీపీ సతీష్, సీఐ శ్రీనివాస్ సందర్శించారు. అడవి పందులను వేటాడేందుకు వేటగాళ్లు నాటుబాంబును పడేసినట్టు అనుమానిస్తున్నారు. కేసు దర్యాప్తు చేస్తున్నారు.
