చైతన్య రావ్‌, హతికా శ్రీనివాస్‌ హీరో, హీరోయిన్లుగా గౌతమ్స్‌ ఈగల్‌ ఎంటర్‌టైన్మెంట్‌ ప్రై.లి బ్యానర్‌పై సాయి తేజ దర్శకత్వంలో ఎం.గౌతమ్‌ నిర్మాతగా రూపొందుతోన్న చిత్రం ఆదివారం ఉదయం లాంఛనంగా హైదరాబాద్‌లో ప్రారంభమైంది. ముహూర్తపు సన్నివేశానికి నిర్మాత సి.కళ్యాణ్‌ క్లాప్‌ కొట్టగా, ఎఫ్‌డీసీ చైర్మన్‌ అనీల్‌ కుర్మాచలం కెమెరా స్విచ్‌ ఆన్‌ చేశారు. బెక్కం వేణు గోపాల్‌ గౌరవ దర్శకత్వం వహించారు.
నిర్మాత ఎం.గౌతమ్‌, సి.కళ్యాణ్‌ చేతుల మీదుగా డైరెక్టర్‌ స్క్రిప్ట్‌ను అందుకున్నారు. నిర్మాత రాచాల యుగంధర్‌ ప్రత్యేక అతిథిగా హాజరయ్యారు. అలాగే పలువురు సినీ సెలబ్రిటీలు ఈ కార్యక్రమంలో పాల్గొన్నారు. ఈ సందర్భంగా నిర్మాత ఎం.గౌతమ్‌ మాట్లాడుతూ, ‘కొత్తగా పెళ్లైన జంటలో భర్త కొన్ని అనుకోని పరిస్థితులు ఎదుర్కోవాల్సి వస్తుంది. దాన్ని తనెలా హ్యాండిల్‌ చేశాడనే కథాంశంతో సినిమా రూపొందనుంది. మంచి కామెడీ, లవ్‌, ఎమోషన్స్‌తో ఫ్యామిలీ ఆడియెన్స్‌, యూత్‌ను ఆకట్టుకునే అంశాల మేళవింపుగా సినిమా ఆకట్టుకోనుంది’ అని తెలిపారు.
కష్ణ చైతన్య, సాయి శ్రీనివాస్‌, సుదర్శన్‌, మహేష్‌ అచంట, మహేష్‌ విట్టా, రాజేష్‌ ఉల్లి, షిన్నింగ్‌ ఫణి తదితరులు నటిస్తున్న ఈ చిత్రానికి ఎగ్జిక్యూటివ్‌ ప్రొడ్యూసర్‌: మోహన్‌ పున్న, లైన్‌ ప్రొడ్యూసర్‌: వంశీ కష్ణ, సినిమాటోగ్రఫీ: పి.సి.మౌళి, ఎడిటర్‌: విజరు ముక్తావరపు, మ్యూజిక్‌: గ్యాని, ఆర్ట్‌: రామాంజనేయులు, కొరియోగ్రాఫర్‌: జెడి మాస్టర్‌.
