– తెలంగాణతోపాటు మరో ఎనిమిది రాష్ట్రాల్లో…
నవతెలంగాణ-న్యూఢిల్లీ బ్యూరో
రాజ్యసభలోని 12 స్థానాల్లో ఉప ఎన్నికకు షెడ్యూల్ విడుదలైంది. తెలంగాణలోని ఒక స్థానంతోపాటు మరో ఎనిమిది రాష్ట్రాల్లో ఉప ఎన్నికకు కేంద్ర ఎన్నికల సంఘం బుధవారం షెడ్యూల్ ప్రకటించింది. ఈ ఉప ఎన్నికకు సంబంధించి కేంద్ర ఎన్నికల సంఘం ఆగస్టు 14న నోటిఫికేషన్ విడుదల చేయనుంది. ఆగష్టు 21 వరకు నామినేషన్లు దాఖలు చేసేందుకు అవకాశం ఇచ్చింది. అస్సాం, మధ్యప్రదేశ్, మహారాష్ట్ర, త్రిపుర రాష్ట్రాల్లో నామినేషన్ల ఉపసంహరణకు ఈ నెల 26 వరకు గడువిచ్చింది. అలాగే.. బీహార్, హర్యానా, రాజస్థాన్, తెలంగాణ, ఒడిశా రాష్ట్రాల్లో నామినేషన్ల ఉపసంహరణకు ఈ నెల 27 వరకు గడువు ఇచ్చింది. సెప్టెంబర్ 3న ఉదయం 12 రాజ్యసభ స్థానాలకు ఉపఎన్నిక 9 గంటల నుంచి సాయంత్రం 4 గంటల వరకు పోలింగ్ నిర్వహించనున్నారు. అదేరోజు సాయంత్రం 5 గంటలకు ఎన్నికల ఫలితాలు వెల్లడిస్తారు.దేశ వ్యాప్తంగా తొమ్మిది రాష్ట్రాల్లో రాజ్యసభలో ఖాళీగా ఉన్న 12 స్థానాలకు ఈ ఉప ఎన్నికలు జరుగనున్నాయి. అస్సాం, బీహార్, హర్యానా, మధ్యప్రదేశ్, మహారాష్ట్ర, రాజస్థాన్, త్రిపుర రాష్ట్రాల నుంచి 10 మంది సభ్యులు లోక్సభకు ఎన్నిక కావడంతో ఆయా రాష్ట్రాల్లో ఎన్నికలు అనివార్య మయ్యాయి. అలాగే తెలంగాణ, ఒడిశా నుంచి ఒక్కొక్కరు తమ సభ్యత్వానికి రాజీనామా చేయడంతో ఎన్నికలు నిర్వహించేందుకు కేంద్ర ఎన్నికల సంఘం సిద్ధమైంది. తెలంగాణలో కె. కేశవరావు బీఆర్ఎస్ నుంచి కాంగ్రెస్ పార్టీలో చేరిన తరువాత రాజ్యసభ సభ్యత్వానికి రాజీనామా చేశారు. దీంతో తెలంగాణ లో ఒక స్థానం ఖాళీ అయింది. అలాగే.. కేంద్ర మంత్రులు పియూష్ గోయల్, సర్బానంద్ సోనోవాల్, జ్యోతిరాదిత్య సింథియాలు తమ రాజ్యసభ సభ్యత్వానికి రాజీనామా చేసి లోక్సభ ఎన్నికల్లో విజయం సాధించారు.
