పాఠశాలల విద్యార్ధినీ విద్యార్ధులకు వచ్చే జూన్ 12 వరకు యూనిఫామ్ డ్రెస్సులు సిద్ధం చేయాలని జిల్లా కలెక్టరు హనుమంత్ కే.జెండగే అధికారులను ఆదేశించారు. శనివారం నాడు ఆయన యాదగిరిగుట్ట మండలం మల్లాపూర్ మండల పరిషత్, జిల్లా పరిషత్ హైస్కూళ్లలో అమ్మ ఆదర్శ పాఠశాల కమిటీల ద్వారా చేపట్టిన త్రాగునీరు ఏర్పాట్లు, టాయ్లెట్స్, విద్యుద్దీకరణ, తరగతుల మరమ్మత్తు పనులను పరిశీలించారు. జిల్లాలోని అన్ని పాఠశాలలు ప్రారంభం అయ్యేనాటికి మౌళిక వసతులు కల్పించి విద్యార్ధులను కొత్త విద్యా సంవత్సరంలోనికి ఆహ్వానించాలని ఆదేశించారు. మల్లాపురంలో  విద్యార్థులకు డ్రెస్సులు కుడుతున్న స్వయం సహాయక మహిళా సంఘం ద్వారా నడుపబడుతున్న మహాలక్ష్మి కుట్టు కేంద్రాన్ని ఆయన సందర్శించి మాట్లాడుతూ జిల్లాలో 673 ప్రభుత్వ, ఎయిడెడ్, కస్తూరిబా, ప్రభుత్వ రెసిడెన్షియల్ పాఠశాలలకు 51,848 మంది విద్యార్దినీ విద్యార్ధులకు స్టిచింగ్ కోసం అన్ని మండల కేంద్రాలకు యూనిఫామ్ క్లాత్ పంపించడం జరిగిందని, 541 స్వయం సహాయక మహిళా సంఘాల ద్వారా యూనిఫామ్ డ్రెస్సులు కుట్టించి పాఠశాలలు ప్ర్రారంభమయ్యే జూన్ 12 నాడు విద్యార్ధులకు అందించేటట్లు ఏర్పాట్లు చేయాలని అధికారులను ఆదేశించారు. ఈ కార్యక్రమంలో జిల్లా గ్రామీణ అభివృద్ధి అధికారి ఏంఏ కృష్ణన్ , జిల్లా విద్యాశాఖ అధికారి కె.నారాయణ రెడ్డి, జిల్లా పరిషత్ హైస్కుల్ అమ్మ ఆదర్శ పాఠశాల కమిటీ అధ్యక్షురాలు వైష్ణవి, మండల పరిషత్ హైస్కూల్ అమ్మ ఆదర్శ పాఠశాల కమిటీ అధ్యక్షురాలు సంధ్య, ప్రధానోపాధ్యాయులు, ఉపాధ్యాయులు, మహిళా సమాఖ్య సభ్యులు  పాల్గొన్నారు.

పార్లమెంట్ ఎన్నికల కౌంటింగ్ ఏర్పాట్లపై జిల్లా ఎన్నికల అధికారి, కలెక్టరు హనుమంతు కే.జెండిగే అధికారులతో శనివారం  సమీక్షించారు.  కౌంటింగ్ కేంద్రంలో ఫర్నీచర్ ఏర్పాట్లు, పత్రాల సీలింగ్, వివిధ దశలలో కావలసిన సిబ్బంది నియామకం, ఉత్తర్వులు, స్కానింగ్ పనులు, లేబర్, సూపర్వైజర్ల ఏర్పాట్లపై, కేంద్రాలలో కావలసిన వసతులు ఇంటర్నెట్, పవర్ సప్లయ్, త్రాగునీరు, టాయ్లెట్స్, టెంట్లు, బ్రేక్ఫాస్ట్, లంచ్, స్నాక్స్, తదితర ఏర్పాట్లు, కౌంటింగ్ స్టాఫ్ ర్యాండమైజేషన్, శిక్షణ, తదితర కార్యక్రమాల పట్ల తీసుకోవాల్సిన చర్యలను సమీక్షించారు. ఈకార్యక్రమంలో జిల్లా రెవిన్యూ అదనపు కలెక్టరు పి.బెన్షాలోమ్, రెవిన్యూ డివిజనల్ అధికారులు అమరేందర్, శేఖర్రెడ్డి, భువనగిరి మున్సిపల్ కమీషనర్ రామాంజనేయులు రెడ్డి, జిల్లా విద్యాశాఖ అధికారి కె.నారాయణరెడ్డి, ఎలక్షన్ సెల్ సూపరింటెండెంట్ రామ్మూర్తి, డి.టి. సురేష్, ఆర్.ఐ. శ్రీకాంత్ పాల్గొన్నారు.

వాసవి క్లబ్  యాదాద్రి భువనగిరి ఆధ్వర్యంలో  శనివారం కీర్తిశేషులు కుక్కుటపు కైలాసం జ్ఞాపకార్థం భార్య బాలమణి కుటుంబ సభ్యులు స్థానిక  హైదరాబాద్ చౌరస్తా నందు  చలివేంద్రంలో చల్లటి మజ్జిగ పంపిణీ చేశారు. సౌహృదయ అనాధాశ్రమంలో అన్న ప్రసాద వితరణ చేశారు. ఈ కార్యక్రమంలో క్లబ్ అధ్యక్షులు జీడిగం లక్ష్మయ్య, సుగ్గుల  చంద్రశేఖర్, పద్మాల ప్రభాకర్, మిత్తింటి భాస్కర్, జిల్లా విద్యాసాగర్, సుధీర్, ఉపేందర్,బాలేష్ పాల్గొన్నారు.

– గ్రూప్ -1 ప్రిలిమినరీ పరీక్షలు నిర్వహించేందుకు సన్నద్ధం కావాలి: టీజిపీఎస్సి  చైర్మన్ మహేందర్ రెడ్డి..
నవతెలంగాణ – సూర్యాపేట కలెక్టరేట్

జూన్ 09న నిర్వహించే తెలంగాణ రాష్ట్ర పబ్లిక్ సర్వీస్ కమిషన్ గ్రూప్ -1 ప్రిలిమినరీ పరీక్ష పకడ్బందీగా నిర్వహించేందుకు అన్ని జిల్లాల కలెక్టర్లు సన్నద్ధం కావాలని తెలంగాణ రాష్ట్ర పబ్లిక్ సర్వీస్ కమిషన్ చైర్మన్ మహేందర్ రెడ్డి అన్నారు. శనివారం హైదరాబాద్ నుండి అన్ని జిల్లాల కలెక్టర్లు, ఎస్పీలు, రీజనల్ కో ఆర్డినేటర్లతో వీడియో కాన్ఫరెన్స్ నిర్వహించారు. ఈ సందర్భంగా ఆయన  మాట్లాడుతూ జూన్  9న  తెలంగాణ రాష్ట్ర పబ్లిక్ సర్వీస్ కమిషన్ నిర్వహించు గ్రూప్ -01 ప్రిలిమినరీ పరీక్షకు పకడ్బందీ ఏర్పాట్లు చేయాలన్నారు.ఎటువంటి పొరపాట్లు జరుగకుండా, సమర్థవంతంగా నిర్వహించాలని అన్నారు.జూన్ 09న ఉదయం 10-30 నుండి మధ్యాహ్నం 1-00 వరకు  నిర్వహించనున్న గ్రూప్ 1 పరీక్షను ప్రశాంత వాతావరణంలో జరిగేలా పటిష్టమైన ఏర్పాట్లను చేపట్టాలని, చీఫ్ సూపరింటెండెంట్ మానిటరింగ్ చేసే విధంగా సి.సి. కెమెరాలను ఏర్పాటు చేయాలని సూచించారు. పరీక్ష కేంద్రాల్లో అభ్యర్థులకు ఎలాంటి అసౌకర్యాలు కలగకుండా ప్రతి రూమ్ లో విద్యుత్ సౌకర్యం, త్రాగునీరు ఏర్పాటు చేయాలని  పరీక్షకు రెండు రోజుల ముందే పారిశుధ్య  కార్యక్రమాలు నిర్వహించి కేంద్రాలను

పరిశుభ్రంగా ఉండే విధంగా చర్యలు చేపట్టాలని అన్నారు. పరీక్షా కేంద్రాల్లోని గోడలపై ఎలాంటి మ్యాపులు, పట్టికలు, గడియారాలు, ఇతరత్రా లేకుండా చూడాలన్నారు.

ప్రతి గదిలో సరైన లైటింగ్,  ఫ్యాన్లు సక్రమంగా జరిగే విధంగా చర్యలు చేపట్టాలని అన్నారు. ప్రతి గదిలో సీసీ కెమెరా ఏర్పాటు చేసి నిరంతరం పర్యవేక్షించాలన్నారు.దివ్యాంగులైన అభ్యర్థుల కోసం గ్రౌండ్ ఫ్లోర్ ను కేటాయించాలని పరీక్ష కేంద్రం ఆవరణలో సుమారు మూడు కిలోమీటర్ల పరిధిలో ఎలాంటి జిరాక్స్ సెంటర్లు తెరుచుకోకుండా చూడాలని, 144 సెక్షన్ విధించి 100 మీటర్ల దూరం వరకు ఇతరులను రానివ్వకూడదని పేర్కొన్నారు.  అత్యవసర చికిత్సా కేంద్రాలు ఏర్పాటు చేసి, ప్రతి పరీక్ష కేంద్రం వద్ద గట్టి బందోబస్తు ఏర్పాటు చేయాలన్నారు. కచ్చితంగా మహిళలను పరిశీలించేందుకు మహిళా కానిస్టేబుల్ ను విధులలో ఉంచాలని ప్రతి అభ్యర్థిని క్షుణ్ణంగా పరిశీలించి సెల్ ఫోన్లు,  స్మార్ట్ వాచీలు బ్లూటూత్ ఇతర ఎలక్ట్రానిక్ పరికరాలను పరీక్ష కేంద్రంలోకి అనుమతించవద్దని పేర్కొన్నారు. అభ్యర్థులు మాస్ కాపీయింగ్ కు పాల్పడకుండా పోలీసు శాఖ నుంచి ఎస్ హెచ్ ఓ స్థాయి అధికారి పరీక్ష పూర్తయ్య వరకు నిరంతర పర్యవేక్షించాలని తెలిపారు.పోలీస్ శాఖ ఆధ్వర్యంలో స్ట్రాంగ్ రూమును ఏర్పాటు చేసి క్లోజ్డ్ వాహనంలో  పోలీస్ ఎస్కార్ట్ ద్వారా ప్రశ్నాపత్రాలను పరీక్ష కేంద్రాలకు తరలించాలని పరీక్ష పూర్తయిన తర్వాత పోలీస్ ఎస్కార్ట్ ద్వారా తిరిగి స్ట్రాంగ్ రూమ్ కు ప్రశ్నపత్రాలను తరలించాలన్నారు. రీజనల్ కోఆర్డినేటర్ రూట్ అధికారులను నియమించి పరీక్ష జరిగే రోజు రూట్ అధికారులకు వారి వారి రూట్లలో పంపించాలని తెలిపారు.

బయోమెట్రిక్ విధానం ద్వారా హాజరు నమోదు చేసుకోవడం జరుగుతుందని ప్రతి అభ్యర్థి బయోమెట్రిక్ అనుసరించాలని అన్నారు. రీజనల్ కోఆర్డినేటర్ లు బయోమెట్రిక్ హాజరు నమోదు చేయడానికి సిబ్బంది నియమించి వారికి తగిన శిక్షణ ఇవ్వాలని కోరారు. అభ్యర్థులను పరీక్ష కేంద్రాల లోపలికి ఉదయం 09:30నుండి అనుమతించాలని అభ్యర్థులు చెప్పులు మాత్రమే వేసుకొని  రావాలని  అన్నారు. ఓఎంఆర్ షీట్ నింపడంలో అభ్యర్థులు హాల్ టికెట్ లో పేర్కొనబడిన సూచనలు క్షుణ్ణంగా పరిశీలించుకుని పరీక్షా కేంద్రానికి హాజరు కావాలని  తెలిపారు. పరీక్షకు ముందు బబ్లింగ్ గురించి అభ్యర్థులకు తెలియజేసీ, టి.జి.పి.ఎస్.సి. నియమ, నిబంధనల ప్రకారం పరీక్షలు నిర్వహించాలని పేర్కొన్నారు. అన్ని శాఖలు సమన్వయంగా పనిచేసే గ్రూప్ 01 ప్రిలిమినరీ పరీక్షలను విజయవంతంగా నిర్వహించాలని టిజి పి ఎస్ సి చైర్మన్ సూచించారు.ఈ సందర్భంగా జిల్లా కలెక్టర్ ఎస్ వెంకట్రావు మాట్లాడుతూ జిల్లా వ్యాప్తంగా 32 పరీక్షా కేంద్రాలను ఏర్పాటు చేయడం జరిగిందని, మొత్తం 9,725 మంది అభ్యర్థులు పరీక్షకు హాజరు కానున్నారని వన్ ఏర్పాట్లు చేసినట్లు కలెక్టర్ తెలిపారు.ఈ కార్యక్రమంలో ఎడిషినల్ ఎస్పీ నాగేశ్వరరావు,ఈ సూపర్డెంట్ పద్మారావు, తదితరులు పాల్గొన్నారు.

రాష్ట్రంలో అధికారంలోకి వచ్చిన కాంగ్రెస్ ప్రభుత్వం ఇప్పటివరకు ఎన్నికల చుట్టూ తిరిగినా వెంటనే ప్రజా సమస్యలపై దృష్టి పెట్టి సమస్యల పరిష్కారం కోసం ఆలోచన చేయాలని ప్రజా ప్రయోజనకర పథకాలను అమలు అయ్యే విధంగా ప్రభుత్వం బాధ్యత తీసుకోవాలని సీపీఐ(ఎం) కేంద్ర కమిటీ సభ్యులు, మాజీ ఎమ్మెల్సీ చెరుపల్లి సీతారాములు అన్నారు. శనివారం సుందరయ్య భవనంలో పార్టీ రాష్ట్ర కమిటీ సభ్యులు కొండమడుగు నరసింహ అధ్యక్షతన జరిగిన జిల్లా కమిటీ సమావేశంలో వారు ముఖ్యఅతిథిగా పాల్గొని మాట్లాడుతూ.. అధికారంలో ఉన్న కాంగ్రెస్ ప్రభుత్వం ప్రజా సమస్యలను మర్చిపోయి ఎన్నికల చుట్టూ తిరిగి కాలయాపన చేసి ప్రస్తుతం ప్రజా సమస్యలను పక్కన పెట్టిన పరిస్థితి కనిపిస్తుందన్నారు. వెంటనే రాష్ట్ర ప్రభుత్వం ప్రజా సమస్యలపై దృష్టి పెట్టి సమస్యల పరిష్కారానికి ప్రణాళిక రూపొందించాలని వారు అన్నారు. అకాల వర్షం కారణంగా రాష్ట్రవ్యాప్తంగా అనేక ప్రాంతాలలో వరి ధాన్యం నీట మునిగి ఆరుకాలం కష్టపడి పండించిన పంట నష్టం జరగడంతో రైతులు ఆవేదనకు గురి అవుతున్నారనానారు. రాష్ట్ర ప్రభుత్వం ఎన్నికల మేనిఫెస్టోలో బోనస్ రూ.500 రూపాయలు ఇస్తామని చెప్పిన ఇప్పుడు ఇచ్చిన హామీ ఏమైందని వారు ప్రశ్నించారు. అదేవిధంగా అనేకమంది రైతులు పండించిన పంటకు గిట్టుబాటు ధర ఇస్తామని ప్రగల్బాలు పలికిన  కాంగ్రెస్ ప్రభుత్వం మీద నమ్మకంతో ఉన్నారని ప్రభుత్వం వెంటనే స్పందించి తడిసిన ధాన్యాన్ని ప్రభుత్వమే నేరుగా కొనుగోలు చేసి గిట్టుబాటు ధర ప్రకటించి అదనంగా ఇచ్చిన హామీ రూ.500 రూపాయల బోనస్ ను ఇవ్వాలని డిమాండ్ చేశారు.

ప్రభుత్వం ఇచ్చిన హామీని అమలు చేయకపోతే రైతాంగం ఆత్మహత్య చేసుకునే పరిస్థితి ఉందని రైతులను ఆదుకునే బాధ్యత ప్రభుత్వం మీద ఉందని వారు అన్నారు. రైతుల, కార్మికుల, వ్యవసాయ కూలీల, విద్యార్థి యువజన సమస్యలపై రాష్ట్ర ప్రభుత్వం స్పందించకపోతే ఒక ప్రణాళిక ప్రకారం ప్రభుత్వ పథకాల అమలు జరగకపోతే సీపీఐ(ఎం) ఆధ్వర్యంలో ప్రజా పోరాటాలకు సిద్ధమవుతామని వారు పిలుపునిచ్చారు. సీపీఐ(ఎం) జిల్లా కార్యదర్శి ఎండి జహంగీర్ మాట్లాడుతూ యాదాద్రి భువనగిరి జిల్లా వ్యాప్తంగా అనేక మార్కెట్ యార్డులలో వేల క్వింటాల ధాన్యం తడిసి రైతులు నెత్తికి చేతులు పెట్టుకొని ఆదుకునే వారు లేక ఇబ్బందులు పడుతున్నారని ఇప్పటివరకు రాష్ట్ర ప్రభుత్వం నుండి నష్టపోయిన రైతాంగానికి ఎలాంటి హామీ రాకపోవడం రైతులు ఇబ్బందులు పడుతున్నారన్నారు.  జిల్లా వ్యాప్తంగా తడిసిన ధాన్యాన్ని ప్రభుత్వమే కొనుగోలు చేసి రైతందానికి నష్టపరిహారం చెల్లించి బోనస్ ఇవ్వాలని వారు డిమాండ్ చేశారు. వీరితోపాటు సమావేశంలో రాష్ట్ర కమిటీ సభ్యులు బట్టుపల్లి అనురాధ, జిల్లా కార్యదర్శి వర్గ సభ్యులు మంగ నరసింహులు, మాటూరు బాలరాజు, కల్లూరు మల్లేశం, దోనూరు నర్సిరెడ్డి, దాసరి పాండు, మేక అశోక్ రెడ్డి, డివైఎఫ్ఐ రాష్ట్ర కార్యదర్శి ఆనగంటి వెంకటేష్, జిల్లా కమిటీ సభ్యులు సిర్పంగి స్వామి, దయ్యాల నరసింహ, బూరుగు కృష్ణారెడ్డి, ఎండి పాషా, బబ్బురు పోశెట్టి, జల్లెల పెంటయ్య, బొడ్డుపల్లి వెంకటేష్, మాయ కృష్ణ, దోడ యాదిరెడ్డి, పగిల్ల లింగారెడ్డి, బండారు నరసింహ, బొల్లు యాదగిరి, బోలగాని జయరాములు, గుండు వెంకటనర్సు, ఎంఏ ఇక్బాల్, గడ్డం వెంకటేష్, రాచకొండ రాములమ్మ, వనం ఉపేందర్, మండల కార్యదర్శిలు ధూపటి వెంకటేష్, పోతరాజు జహంగీర్, రేకల శ్రీశైలం, వేముల బిక్షం, బుర్రు అనిల్, నూకల భాస్కర్ రెడ్డి పాల్గొన్నారు.

రాష్ట్రంలో ఈ నెల 13 న లోక్ సభ ఎన్నికలు నిర్వహించడం వలన ఓటరుకి ఎడమ చేతి చూపుడు వేలు పై ఇదివరకే ఇన్ డిలేబుల్ ఇంక్ పెట్టడం జరిగిందని, మరల ఈ నెల 27 న జిల్లాలో పట్టభద్రుల ఎమ్మెల్సీ ఉప ఎన్నిక ఉన్నందున ఆ ఎన్నికలలో పాల్గొనే పట్టభద్రులు పార్లమెంటు ఎన్నికలలో ఓటు వేసి ఉన్నట్లయితే అట్టివారికి చూపుడువేలు బదులుగా మధ్య వేలుకి ఇండెలిబుల్ ఇంకు సిరా గుర్తు పెట్టాలని, ఎన్నికల ప్రవర్తన నియమావళి 49కే ప్రకారం వేలు నియమం మిస్ అయినట్లయితే  1961 వర్తింపజేయడం జరుగుతుందని జిల్లా ఎన్నికల అధికారి కలెక్టర్ ఎస్ వెంకట్రావు శనివారం ఒక ప్రకటనలో తెలిపారు. ప్రొసీడింగ్ అధికారి లేదా పోలింగ్ అధికారి ఎమ్మెల్సీ ఉప ఎన్నిక అప్పుడు ఓటరు యొక్క ఎడమ చూపుడు వేలుని పరిశీలించి ఇంకును పెట్టాలని జిల్లా కలెక్టర్ తెలిపారు.

రుతుపవనాలు సమీపిస్తున్న నేపథ్యంలో సాగుకు రైతన్నలు సిద్ధమవుతున్న తరుణంలో నకిలీ విత్తనాలపై దృష్టి సారించాలని  బీజేపీ  కిసాన్ మోర్చామండలాధ్యక్షులు కొండారెడ్డి శ్రీనివాస్ రెడ్డి  అన్నారు. శనివారం ఆయన విలేకరులతో మాట్లాడారు. నకిలీ విత్తనాలు కొని అనేక మంది రైతులు నష్టపోతున్నారు. ప్రభుత్వం వెంటనే స్పందించి నకిలీ విత్తనాలు అమ్మే వారిపై కఠిన చర్యలు తీసుకోవాలని డిమాండ్ చేశారు. ప్రతి ఏటా నకిలీ విత్తనాలు తయారు చేసే వారి సంఖ్య పెరుగుతుంది తప్ప తగ్గడం లేదని ప్రభుత్వం వీరి పైన దృష్టి సారించి రైతన్నలకు న్యాయం జరిగేలా చూడాలని ఆయన తెలిపారు.