సమాజంలో రోజురోజుకు మార్పులు చెందుతూనే ఉన్నాయి. ఈ అభివృద్ధితో పాటే జీవనశైలీ మారిపోతోంది. మగవారి సంగతి పక్కనపెడితే మహిళలు ఇంటా బయటా తామేంటో నిరూపించుకుంటున్నారు. ఆడవాళ్ళు వీళ్ళేం చేయగలరు అనే దగ్గరి నుండి వాళ్ళు మాత్రమే చేయగలరు అనేంతగా మార్పులు చోటు చేసుకుంటూనే ఉన్నాయి. ఇది పరిశోధనల్లో తేలిన సత్యం. అన్ని రంగాల్లోనూ ధైర్యంగా నెగ్గుకురావడం మహిళలకు వెన్నతో పెట్టిన విద్య అని పరిశోధనలు రుజువు చేస్తున్నాయి. ఆ వివరాలేంటో మనమూ తెలుసుకుందాం…
ఒకేసారి వేర్వేరు పనులు చేయగలగడాన్ని మనం మల్టీ టాస్కింగ్ అంటాం. ప్రస్తుత ప్రపంచంలో ముందడుకు వేయాలంటే పోటీ పడక తప్పదు. ఉరుకుల పరుగుల జీవితంలో మల్టీ టాస్కింగ్లో నిష్ణాతులు అయితే కానీ ముందుకు సాగలేని పరిస్థితి. ఇక మహిళల జీవితంలో అయితే ఈ మల్టీ టాస్కింగ్ తప్ప నిసరిగా మారిపో యింది. ఒక పక్క వంట పని చూసుకోవాలి, మరోపక్క పిల్లల్ని బడికి సిద్ధం చేయాలి, ఇంకో పక్క ఇంటికి వచ్చే వారికి సమాధానం చెప్పు కోవాలి. ఇవిమాత్రమే కాకుండా ఉద్యోగాలు చేసేవారికైతే… వారి హడావుడి గురించి మాటల్లో చెప్పలేం. మొత్తానికి ఇంట్లోనే ఉండే గహిణులైనా, ఆఫీసుల్లో పనిచేస్తున్న ఉద్యోగినులైనా… మల్టీ టాస్కింగ్ మాత్రం తప్పనిసరి.
ఈ మల్టీటాస్కింగ్ చేయడంలో మగవారికీ, ఆడవారికీ మధ్య ఏమన్నా తేడా ఉందేమో అన్న అనుమానం వచ్చింది కొందరు పరిశోధకులకి. రష్యాకి చెందిన పరిశోధకులు తమ అనుమానాన్ని నివత్తి చేసుకునేందుకుగాను ఆడవారిని, మగవారిని ఎంచుకున్నారు. వీరిలో 20 నుంచి 65 ఏండ్లలోపు వయసు కలిగిన వారు ఉన్నారు. వీరందరికీ కూడా ఒకేసారి వేర్వేరు పనులను అప్పగించారు. ఉదాహరణకు ఒక చేత్తో వేర్వేరు ఆకారాలలో ఉన్న వస్తువులను వేరు చేస్తూ, మరో చేత్తో వేరు వేరు అంకెలని వరుసక్రమంలో ఉంచమన్నారు.
అభ్యర్థులు మల్టీటాస్కింగ్ చేస్తున్న సమయంలో వారి మెదడు ఎలా పని చేస్తోందో తెలుసుకొనేందుకు ఎమ్మారై పరీక్షలు కూడా చేసి చూశారు. దీంతో మల్టీటాస్కింగ్ చేసే సమయంలో మగవారి మెదడు ఆడవారి మెదడుకంటే ఎక్కువ శక్తిని వినియోగించుకోవడాన్ని వారు గమనించారు. అలాగే వేర్వేరు పనులు ఒకేసారి చేయాల్సి వచ్చినప్పుడు, వారి మెదడులోని వేర్వేరు భాగాలన్నీ కలసి పనిచేయాల్సి వచ్చిందట. కానీ ఆడవారిలో మెదళ్లు మాత్రం ఎలాంటి హడావుడీ లేకుండా అతి తక్కువ సమయంలో, అతి తక్కువ శక్తిని ఉపయోగిస్తూ… వేర్వేరు పనులను ప్రశాంతంగా నిర్వహించేశాయి. ఎప్పుడో 50 ఏండ్లు దాటిన తర్వాత గానీ ఆడవారిలో మల్టీటాస్కింగ్ సామర్థ్యంలో తగ్గుదల కనిపించలేదు.
ఆడవారిలో కనిపించిన ఈ ప్రత్యేకతకి కారణం ఏమిటన్నది మాత్రం పరిశోధకులకు ఇంకా అంతుపట్టలేదు. బహుశా ఇంటిని చక్కదిద్దుకునే ప్రయత్నంలో ఆడవారికి అప్రయత్నంగానే ఈ నైపుణ్యం వచ్చి ఉంటుంది. ఎలాంటి పరిస్థితినైనా ఎదుర్కొనే మనోనిబ్బరంతోనే ఇది సాధ్యపడి ఉంటుంది. కానీ ఒకేసారి ఇన్నేసి పనులు చేస్తున్నారు కదా అని… వారితో వీలైనంత చాకిరీ చేయించుకోవడమే బాధ కలిగించే విషయం.
