నవతెలంగాణ బ్యూరో – హైదరాబాద్
రాష్ట్రంలో ఒకటి నుంచి పదో తరగతి విద్యార్థులకు సమ్మేటివ్ అసెస్మెంట్ (ఎస్ఏ-1) పరీక్షలు గురువారం నుంచి ప్రారంభం కానున్నాయి. ఈనెల 11 వరకు ఈ పరీక్షలు జరుగుతాయి. సవరించిన టైంటేబుల్ను ఎస్సీఈఆర్టీ డైరెక్టర్ ఎం రాధారెడ్డి మంగళవారం విడుదల చేశారు. ఒకటి నుంచి ఐదో తరగతి విద్యార్థుల వరకు ఉదయం 9.30 నుంచి మధ్యాహ్నం 12 గంటల వరకు ఈ పరీక్షలను నిర్వహిస్తామని తెలిపారు. ఆరో తరగతి వారికి ఉదయం పది నుంచి మధ్యాహ్నం 12.45 గంటలకు జరుగుతాయని పేర్కొన్నారు. ఏడో తరగతి విద్యార్థులకు మధ్యాహ్నం రెండు నుంచి సాయంత్రం 4.45 గంటల వరకు, ఎనిమిదో తరగతి విద్యార్థులకు ఉదయం పది నుంచి మధ్యాహ్నం 12.45 గంటల వరకు నిర్వహిస్తామని వివరించారు. తొమ్మిదో తరగతి వారికి మధ్యాహ్నం 1.30 గంటల నుంచి సాయంత్రం 4.30 గంటల వరకు జరుగుతాయని తెలిపారు. పదో తరగతి విద్యార్థులకు ఉదయం పది నుంచి మధ్యాహ్నం ఒంటి గంట వరకు నిర్వహిస్తామని పేర్కొన్నారు. జవాబుపత్రాలను మూల్యాంకనం చేసి ఈనెల 30న ఫలితాలను ప్రకటించాలని వివరించారు. వచ్చేనెల ఒకటిన తల్లిదండ్రుల సమావేశాలను నిర్వహించి మార్కుల రికార్డులను అందజేయడంతోపాటు విద్యార్థుల పురోగతిపై ప్రధానోపాధ్యాయులు, ఉపాధ్యాయులు చర్చించాలని సూచించారు. ఈనెల 13 నుంచి 25 వరకు రాష్ట్రంలోని అన్ని పాఠశాలల్లోని విద్యార్థులకు దసరా సెలవులుంటాయి.
