నవతెలంగాణ-హైదరాబాద్‌: ‘చిన్నా’ మూవీ తెలుగు ప్రేక్షకులకు నచ్చకపోతే, ఇక తాను ఇక్కడకు రానని, ప్రెస్‌మీట్‌లు పెట్టనని చెబుతూ నటుడు సిద్ధార్థ్‌ భావోద్వేగానికి గురయ్యారు. ఈ సినిమాను తెలుగులో విడుదల చేయాలని ప్రయత్నిస్తే, ‘సిద్ధార్థ్‌ సినిమాలు ఎవరు చూస్తారు’ అంటూ చులకనగా చూశారని అన్నారు. సిద్ధార్థ్‌, అంజలీ నాయర్‌, నిమిష సజయన్‌ కీలక పాత్రల్లో ఎస్‌యూ అరుణ్‌కుమార్‌ రూపొందించిన తమిళ చిత్రం ‘చిత్త’. గత వారం విడుదలైన ఈ సినిమా మంచి టాక్‌ను తెచ్చుకుంది. ఇప్పుడు తెలుగులో ‘చిన్నా’ పేరుతో అక్టోబరు 6న ప్రేక్షకుల ముందుకు రానుంది. ఈ సందర్భంగా చిత్ర ప్రీరిలీజ్‌ ప్రెస్‌మీట్‌ జరిగింది. ఈ సందర్భంగా నటుడు సిద్ధార్థ్‌ భావోద్వేగానికి గురయ్యారు. ‘‘చిన్నాన్న, అతని అన్నయ్య కూతురికి మధ్య ఉండే అనుబంధమే ఈ సినిమా. ఈ సినిమా లైఫ్ డ్రీమ్‌. ఇలాంటి మూవీ తీయడానికి 22 ఏళ్లు పట్టిందని మా గురువు మణిరత్నంతో చెప్పా. ఆయన దగ్గర పనిచేసేటప్పుడు ‘ఏదో ఒక రోజు ఇంతకంటే గొప్ప తీయడం రాదు’ అనేలా సినిమా చేస్తానని అన్నాను. ఒక సినిమాను నిర్మించడానికి చాలా మార్గాలు ఉంటాయి. నేను సొంత డబ్బు పెట్టుకుని, సినిమా తీసే నిర్మాతను. ఇలాంటి మూవీ తీయాలంటే రూ.30కోట్లు సంపాదించాలి. దానికి పన్ను చెల్లించాలి. నా కుటుంబాన్ని చూసుకోవాలి. అప్పుడు మిగిలిన డబ్బులతో సినిమా చేస్తా. ఈ మూవీని నేను ఎంతో ఇష్టపడి, నమ్మకంతో చేశానో దీనిని బట్టే అర్థం చేసుకోవచ్చు. సిద్ధార్థ్‌ కెరీర్‌లో బెస్ట్‌ సినిమా ఇది. నేను ఇంకా నటుడిగా ఎందుకు కొనసాగాలో చెప్పే సినిమా. తమిళంలో ఈ మూవీని ఆదరించారు. అంతకన్నా తెలుగు ప్రేక్షకులు ఇంకా అక్కున చేర్చుకుంటారని దర్శకుడితో అన్నాను. అన్ని భాషల్లో ఒకేసారి విడుదల చేయాలని నాలుగు నెలల కిందట సెన్సార్‌ చేశాం. మొదటిసారి కన్నడ నేర్చుకుని, అక్కడ కూడా డబ్బింగ్‌ చెప్పా. కర్ణాటక వెళ్లి ప్రెస్‌ మీట్‌ పెడితే ‘నువ్వు తమిళవాడివి గెట్‌ అవుట్‌’ అన్నారు. ‘మీ భాష నేర్చుకుని, మీ వాడిగా మీ ముందుకు వస్తుంటే గెట్‌ అవుట్‌’ అంటారేంటి అనిపించింది. నా ప్రెస్‌మీట్‌ ఆపేశారు. నవ్వుతూ బయటకు వచ్చేశానన్నాడు. తెలుగులో ‘సిద్ధార్థ్‌ సినిమానా ఎవరు చూస్తారు’ అని అడిగారట. నేనొక మంచి సినిమా తీస్తే, ప్రేక్షకులు చూస్తారని నా నమ్మకం. ఆ సమయంలో నా దగ్గరకు వచ్చి, ‘మేము మీతో ఉన్నాం’ అని ఏషియన్‌ సునీల్‌గారు ఈ సినిమాను తెలుగులో డిస్ట్రిబ్యూట్‌ చేశారు. వాళ్లకు చాలా థ్యాంక్స్‌.. ఈ సినిమా చూసిన తర్వాత ‘తెలుగులో సిద్ధార్థ్‌ సినిమాలు చూడం’అని మీకు అనిపిస్తే, ఇక తెలుగులో ప్రెస్‌మీట్‌లు పెట్టను. ఇక్కడకు రాను. ఈ 22ఏళ్లలో సిద్ధార్థ్‌ బయటవాడు అన్న మాట రాలేదు. ప్రేక్షకులకు నేరుగా అడిగే సమయం వచ్చింది. ‘నా పేరు సిద్ధార్థ్‌. నేను చిన్నా అనే సినిమా తీశాను. మీరు తప్పక చూడాలి’’ అని సిద్ధార్థ్‌ ఎమోషనల్‌ అయ్యారు.
