– అసంఘటిత రంగంలో తీవ్ర సంక్షోభం
– పదేండ్లుగా నలిగిపోతున్న కార్మికులు
– ఆర్థిక వ్యవస్థలో మోడీ సర్కారు వైఫల్యమే కారణం
– ఆర్థిక నిపుణులు, విశ్లేషకులు
న్యూఢిల్లీ : నిజమైన వేతనాలు అత్యంత ముఖ్యమైన ఆర్థిక సూచికలలో ఒకటి. దేశ స్థూల దేశీయోత్పత్తి(జీడీపీ) వేగంగా పెరుగుతున్నప్పటికీ వాస్తవ వేతనాలలో గణనీయమైన పెరుగుదల లేకుంటే, వృద్ధి నమూనాలో ఏదో స్పష్టమైన లోపం ఉన్నట్టుగా చెప్తారు. లేబర్‌ బ్యూరో, నేషనల్‌ శాంపిల్‌ సర్వే ఆఫీస్‌ (ఎన్‌ఎస్‌ఎస్‌ఓ) ఇటీవల విడుదల చేసిన డేటాను బట్టి చూస్తే.. ఈ రోజు భారత ఆర్థిక వ్యవస్థలో సరిగ్గా అదే జరుగుతున్నట్టు కనిపిస్తున్నది. మోడీ గత పదేండ్ల పాలనలో వాస్తవ వేతనాల యొక్క వాస్తవిక స్తబ్దతను సూచిస్తున్నాయి. దీంతో అసంఘటిత రంగంలో తీవ్ర సంక్షోభం కనిపిస్తున్నది. ఇందులో పని చేసే కార్మికులు తీవ్రంగా నష్టపోతున్నారని ఆర్థిక నిపుణులు, విశ్లేషకులు చెప్తున్నారు. మోడీ సర్కారు అనాలోచిత విధానాలతో ఆర్థిక వ్యవస్థ వైఫల్యం చెందిన కారణంగానే ఇలాంటి పరిస్థితులు ఏర్పడ్డాయని నిపుణులు, విశ్లేషకులు అంటున్నారు. నిజమైన వేతనాలు ద్రవ్యోల్బణం కోసం సర్దుబాటు చేయబడిన డబ్బు వేతనాలను సూచిస్తాయి. సాధారణ కార్మికుల కోసం ఒక రోజు పని కొనుగోలు శక్తిని కొలుస్తారు. సహజంగానే, అవి వృత్తులు , స్థానాల మధ్య మారుతూ ఉంటాయి.భారతదేశ లేబర్‌ బ్యూరో దేశవ్యాప్తంగా 66 ప్రాంతాలలో విస్తరించి ఉన్న 600 గ్రామాల స్థిర నమూనా నుంచి రోజువారీ వేతనాలపై నెలవారీ సమాచారాన్ని సేకరిస్తుంది. ఇది గ్రామీణ భారతదేశంలో వేతన రేట్లు(డబ్ల్యూఆర్‌ఆర్‌ఐ) సిరీస్‌. ఈ సిరీస్‌ 25 వ్యవసాయ, వ్యవసాయేతర వృత్తులకు సంబంధించిన వృత్తి-నిర్దిష్ట డబ్బు వేతనాలపై దృష్టి పెడుతుంది.డబ్ల్యూఆర్‌ఆర్‌ఐ డేటా ప్రకారం.. 2014 నుంచి గ్రామీణ ప్రాంతాలలో నిజమైన వేతనాల యొక్క భయంకరమైన స్తబ్దతను సూచిస్తున్నది. ఈ స్తబ్దత నమూనా ఇప్పటికీ కొనసాగుతున్నది. గత పదేండ్లలో వాస్తవ వేతనాల వార్షిక వృద్ధి రేటు అఖిల భారత స్థాయిలో సున్నాకి దగ్గరగా ఉన్నది. వాస్తవ వేతనాల వార్షిక వద్ధి రేట్లు 2014-15 నుంచి 2023-24 వరకు శాతాల్లో చూస్తే.. సాధారణ వ్యవసాయ కార్మికుల్లో మహిళలు 0.8 శాతం, పురుషుల్లో 1.1 శాతంగా ఉన్నాయి. వ్యవసాయేతర కార్మికుల విషయంలో ఇది వరుసగా 0.1 శాతం, 0 శాతం, నిర్మాణ కార్మికులలో వరుసగా 0.2 శాతం, 0.5 శాతం ఉన్నాయి. ఎన్‌ఎస్‌ఎస్‌ఓ 2021-22 నుంచి 2022-23 మధ్య నిర్వహించిన అన్‌ఇన్‌కార్పొరేటెడ్‌ సెక్టార్‌ ఎంటర్‌ప్రైజెస్‌(ఏఎస్‌యూఎస్‌ఈ) వార్షిక సర్వేలోనూ ఆసక్తికర విషయాలు బయటపడ్డాయని నిపుణులు, విశ్లేషకులు చెప్తున్నారు. అంటే, 2015-16కి ముందు నిజమైన వేతనాలు వేగంగా పెరుగుతున్నాయి. కానీ ఆ తర్వాత వర్చువల్‌గా నిలిచిపోయాయి. 2010-11 నుంచి 2015-16 మధ్య కాలంలో ఒక అద్దె కార్మికుని వార్షిక వేతనాల వృద్ధి రేటు 7 శాతానికి దగ్గరగా ఉన్నది. కానీ 2015-16 నుంచి 2022-23 మధ్య దాదాపు సున్నా కావటం గమనార్హం. 2021-22 నుంచి 2022-23 మధ్య వాస్తవ వేతనాలలో అస్పష్టమైన క్షీణత కారణంగా వృద్ధి రేట్లు కొంత వరకు తగ్గాయి. పీరియాడిక్‌ లేబర్‌ ఫోర్స్‌ సర్వేలు(పీఎల్‌ఎఫ్‌ఎస్‌) కూడా 2022-23లో నిజమైన వేతనాల్లో తగ్గుదలని సూచిస్తుండటం గమనార్హం. జనాభాపై జాతీయ కమిషన్‌ జనాభా అంచనాల ప్రకారం.. మొత్తం జనాభాలో పని చేసే వయస్సు జనాభా (15-59 సంవత్సరాలు) వాటా గత 20 ఏండ్లలో క్రమంగా పెరుగుతున్నది. నిజమైన వేతనాలు నిలిచిపోయినప్పటికీ పేదరికం తగ్గుదలకు ఇది దోహదపడుతుందని అంచనాలు చెప్తున్నాయి.
నిజమైన వేతనాల స్తబ్దత అసంఘటిత రంగంలో తీవ్ర సంక్షోభాన్ని సూచిస్తుంది. వాస్తవ వేతనాల్లో పెద్దగా పెరుగుదల లేకుండా 10 సంవత్సరాల పాటు ఆర్థిక వ్యవస్థ తీవ్ర ఒడిదుడుకులను ఎదుర్కొంటున్నది. ఈ కాలంలో అసంఘటిత రంగం పెద్ద నోట్ల రద్దు, వస్తు సేవల పన్ను(జీఎస్టీ), కోవిడ్‌-19 సంక్షోభం వంటి మూడు పెద్ద విపత్తులను చూసింది. అసంఘటిత రంగంలో నిజమైన వేతనాల స్తబ్దత భారత ఆర్థిక వ్యవస్థ తీవ్రమైన వైఫల్యమని ఆర్థిక నిపుణులు ఆందోళన వ్యక్తం చేస్తున్నారు.
2010-11 నుంచి 15-16 2015-16 నుంచి 20-23
తయారీ 3.7 1.6
ట్రేడ్‌ 3.4 0.8
ఇతర సేవలు 5.3 – 0.4
అన్నీ 4.6 0.5
అన్నీ, గ్రామీణం మాత్రమే 6.6 0.1
అన్నీ, అర్బన్‌ మాత్రమే 3.8 0.8
