విశ్వక్‌ సేన్‌, చాందినీ చౌదని హీరో, హీరోయిన్లుగా విద్యాధర్‌ కాగిత దర్శకత్వంలో వచ్చిన చిత్రం ‘గామి’. కార్తిక్‌ శబరీష్‌ నిర్మించిన ఈ చిత్రం మార్చి 8న విడుదలై విశేష ప్రేక్షకాదరణ పొందింది. ఈ చిత్రం ఈనెల 12 నుంచి జీ5 ఓటీటీ సంస్థలో స్ట్రీమింగ్‌ అవుతుంది. ఈ నేపథ్యంలో స్నో కింగ్‌డమ్‌లో చిత్ర బృందం మీడియాతో ముచ్చటించింది.హీరో విశ్వక్‌ సేన్‌ మాట్లాడుతూ,’ఇంత తక్కువ ఉష్ణోగ్రతలో ఇలా స్నో కింగ్‌డమ్‌లో నిర్వహించాలనే ఐడియా అంతా కూడా జీ5 టీమ్‌దే. ‘గామి’లాంటి సినిమాలకు మామూలుగా అవార్డులు, ప్రశంసలు వస్తుంటాయి. కలెక్షన్లు రావని అంతా అనుకుంటారు. కానీ ఇది నా కెరీర్‌లో బిగ్గెస్ట్‌ ఓపెనింగ్స్‌, కలెక్షన్లను సాధించింది. ఇందులో కమర్షియల్‌ అంశాలేవీ ఉండవు. అయినా ఆడియెన్స్‌ చాలా బాగా ఆదరించారు. ఈ సినిమాని థియేటర్లో అందరూ చూశారు. మాకు మంచి రివ్యూలు ఇచ్చారు. జీ5 ఓటీటీలో స్ట్రీమింగ్‌ అవుతున్న మా చిత్రాన్ని చూసి మరింతగా ఆదరించండి’ అని అన్నారు.
‘థియేటర్లో మా సినిమా కొంత మందికి అర్థం కాలేదు. ఇప్పుడు ఓటీటీలోకి వస్తోంది. మూడు నాలుగు సార్లు చూస్తే మా థీమ్‌ ఏంటి? మా కాన్సెప్ట్‌ ఏంటి? అన్నది అందరికీ ఈజీగా అర్థం అవుతుంది’ అని డైరెక్టర్‌ విద్యాధర్‌ చెప్పారు. లాయిడ్‌ జేవియర్‌ (జీ 5 సౌత్‌, వైస్‌ ప్రెసిడెంట్‌ – మార్కెటింగ్‌) మాట్లాడుతూ, ‘గామిలాంటి మంచి చిత్రాన్ని తీసిన విద్యాధర్‌, విశ్వక్‌ సేన్‌లకు థ్యాంక్స్‌. ఈ 12 నుంచి తెలుగు, తమిళ్‌, కన్నడలో జీ5లో స్ట్రీమింగ్‌ అవుతోంది. 2024లో వచ్చిన బెస్ట్‌ మూవీస్‌లో ఇదొకటి’ అని అన్నారు.
