సాధారణంగా సినిమాల్లో హీరోలు చేసే స్టంట్ సీన్లను చూసి ఆశ్చర్యపోతుం టాము. స్టంట్స్ చేయాలంటే ఎంతో ప్రాక్టీస్ ఉండాలి. దాంతో పాటు ధైర్యం కూడా ఉండాలి. ఇక హీరోహిన్లకు అలాంటి సీన్లు పెద్దగా ఉండవు. ఉంటేగింటే మహిళా ప్రాధాన్యం కలిగిన చిత్రాల్లో మాత్రమే ఉంటాయి. ఇప్పటికీ ఇదే పరిస్థితి ఉంది. అలాంటిది వంద ఏండ్ల కిందట బ్లాక్ అండ్ వైట్ సినిమాల టైంలో మహిళలను ఆ సీన్లలో చూపించే అవకాశమే లేదు. అలాంటి సమయంలో మేరీ ఆన్ ఎవాన్స్ ఆ లోటు తీర్చింది. ఫియర్లెస్ నదియాగా పేరు తెచ్చుకున్న ఆమె ఎవరో ఆమె సినీ ప్రస్థానం ఎలా మొదలైంది తెలుసుకుందాం…
సుమారు 115 ఏండ్ల కిందట నందిని అందర్నీ ఆశ్చర్యపరిచేలా స్టంట్లు చేసింది. కండలు తిరిగిన మగవాళ్లని ఒక్క ఉదుటున కట్టడి చేసే ఆమె తెగువకు అందరూ కంగుతిన్నారు. అమ్మాయిలు ఇలాంటివి కూడా చేయగలరనేందుకు ఆమె ప్రేరణగా నిలిచింది. ఆమె వల్లనే నేటి సినిమాల్లో అమ్మాయిలకు మంచి స్టైలిష్ ఫైటింగ్ సీన్లు ఇస్తున్నారని చెప్పుకోవచ్చు. ఒక్క మాటలో చెప్పాలంటే భారతదేశంలోనే మొదటి స్టంట్ ఉమెన్గా ఆమె పేరు తెచ్చుకుంది.
నిజజీవితంలోనూ…
మేరీ ఆన్ ఎవాన్స్ ఆ రోజుల్లో ఆసాధారణమైన ఫైట్లతో ప్రేక్షకులను అలరించింది. 1908లో జన్మించిన ఆమె అసామాన్యమైన ధైర్యం, బలం, నిర్భయ వ్యక్తిత్వానికి నిలువెత్తు నిదర్శనంగా ఉండేది. అలనాటి బాలీవుడ్ సినిమా హనీ బన్నీలో అసమాన్యమైన ధైర్యసాహసాలు గల హీరోయిన్గా గుర్తింపు తెచ్చుకుంది. ఆ సినిమాలో ఆమె చేసిన స్టంట్లు కేవలం సినిమా వరకు పరిమితం అనుకుంటే పొరపాటే. ఎందుకంటే ఆమె నిజజీవితంలో కూడా అలానే ఉండేవారంట. ఆస్ట్రేలియా మూలాలకు చెందిన నీలి కళ్ల ఆమె ఎంతో అందంగా ఉండేవారు. ఆ రోజుల్లో మోకాలి ఎత్తు బూట్లు వేసుకొని కొరడాతో ప్రత్యర్థులను చిత్తు చేసే హీరోయిన్గా ప్రేక్షకులను మెప్పించేవారు. చెప్పాలంటే ఇలాంటి ధైర్యవంతమైన మహిళలను కూడా ఆదరిస్తారు ప్రజలు అని తన నటనతో చాటి చెప్పింది.
సర్కస్లో పని చేస్తూ…
వైవిధ్య భరితమైన సాహసోపేతమైన పాత్రలు చేసినందుకు గానూ ఆమెను హంటర్వాలి అని ముద్దుగా పిలుచుకునేవారు అభిమానులు. ఆస్ట్రేలియాలోని గ్రీకుకి చెందిన తల్లి పెర్త్, బ్రిటిష్ తండ్రికి జన్మించింది ఎవాన్స్. తన తండ్రి సైనిక విభాగంలో పని చేస్తూ భారతదేశానికి రావడంతో ఆమె కూడా ఇండియాకు వచ్చేసింది. అయితే తండ్రి మరణంతో కుటుంబం మొత్తం ముంబయిలోనే స్థిరపడింది. నటిగా కెరీర్ ప్రారంభించటానికి ముందు ఆమె సర్కస్లో పని చేసేది. అక్కడ నృత్యం, గుర్రపుస్వారీల వంటి ప్రదర్శనలు ఇచ్చేది. అలా నటిగా కెరీర్ని చిన్న చిన్న పాటలతో ప్రారంభించింది. వాటికి ప్రేక్షకుల ఆదరణ లభించడమే గాక ఓ బాలీవుడ్ దర్శకుని దృష్టిలో పడేలా చేసింది. ఆయన ఆమెలోని ప్రతిభను గుర్తించి బాలీవుడ్ సినిమాల్లో హీరోయిన్గా పరిచయం చేశాడు. అలా ఆమె సినీరంగ ప్రవేశం చేసింది. అంతేకాకుండా మహిళలు సైతం స్టంట్ సన్నివేశాలు చేయగలరని నిరూపించింది.
పోరాడే పాత్రలే…
సినీ రంగ ప్రవేశం చేసిన తర్వాత ఆమె కెరీర్లో మైలు రాయి హంటర్వాలి సినిమా. అందులో తన తండ్రి మరణానికి న్యాయం కోరుతూ ప్రతీకారం తీర్చుకునే యువరాణి పాత్రలో కనిపించి ప్రేక్షకులను అలరించింది. ప్రజల మదిలో ఆ పాత్ర నిలిచిపోయేలా నటించింది. ఆ విధంగా ఆమె బాలీవుడ్లో ప్రముఖ తారగా ఓ వెలుగు వెలిగింది. ఆమె సంతకం కూడా వెరైటీగా ఉంటుంది. ఓ అరుపులా హేరు అని క్యాచీగా సంతకం చేసేదంట. ధైర్యవంతురాలైన మహిళగా విలన్లతో పోరాడే పాత్రలనే ఆమె ఎక్కువగా చేసింది. ప్రజలు ఆ రోజుల్లో ఆమె స్టంట్లకు బ్రహ్మరథం పట్టేవారంట.
మూసధోరణిని బద్దలు కొట్టి
ఆమె ఈ పాత్రలు చేయడం ప్రారంభించిన తర్వాతనే హీరోయిన్లకు ఇలాంటి పాత్రలు రావడం సులవయిందని సినీ విశ్లేషకులు అనేవారు. అంతేకాదు బాలీవుడ్లో విశేష ప్రజాదరణ పొందిన విదేశీయులలో ఆమె కూడా ఒకరు. హీరోయిన్లంటే మామూలు పాత్రలకే పరిమితమైన మూసధోరణిని బద్దలు కొట్టి సాహసోపేతమైన విన్యాసాలను అవలీలగా చేయగలరని చెప్పేలా స్ఫూర్తిగా నిలిచింది. ఇలా ఎందరి అభిమానమో పొందిన ఆమె 1996లో తన 86వ ఏటన మరణించారు. ఇప్పటికీ స్టంట్ ఉమెన్ అనగానే ఆమె పేరు గుర్తొచ్చేలా ప్రజల మదిలో చెరగని ముద్ర వేసుకున్నారు.
