– ఆర్‌బీఐ, సీబీయూఏఈ ఒప్పందం
– ఇరు దేశాల మధ్య స్థానిక కరెన్సీలతో లావాదేవీలు
న్యూఢిల్లీ : భారత్‌, యునైటెడ్‌ అరబ్‌ ఎమరేట్స్‌ (యూఏఈ) దేశాల మధ్య ఇకపై స్థానిక కరెన్సీలో వాణిజ్యం సాగనుంది. ఇందుకోసం రిజర్వ్‌ బ్యాంక్‌ ఆఫ్‌ ఇండియా, సెంట్రల్‌ బ్యాంక్‌ ఆఫ్‌ యుఎఇ మధ్య కీలక ఒప్పందం జరిగింది. ఇరు దేశాల మధ్య జరిగే వాణిజ్య వ్యవహారాలకు భారతీయ రూపాయి, యుఎఇ దిర్హమ్‌ (ఏఈడీ)లతో చెల్లింపులు చేయడానికి వీలుగా ఇరు సెంట్రల్‌ బ్యాంక్‌లు శనివారం అబుదాబిలో కీలక ఒప్పందాలపై సంతకాలు చేశాయి. దీంతో సరిహద్దు లావాదేవీలను మెరుగుపరచడం, చెల్లింపులను క్రమబద్దీకరించడం, రెండు దేశాల మధ్య బలమైన ఆర్థిక సహకారాన్ని పెంపొందించడం లక్ష్యంగా పెట్టుకున్నామని రిజర్వ్‌ బ్యాంక్‌ ఆఫ్‌ ఇండియా ఓ ప్రకటనలో పేర్కొంది. భారత ప్రధాని నరేంద్ర మోడీ, యుఎఇ అధ్యక్షుడు షేక్‌ మొహమ్మద్‌ బిన్‌ జాయెద్‌ అల్‌ నహ్యాన్‌ సమక్షంలో ఆర్‌బిఐ గవర్నర్‌ శక్తికాంత దాస్‌, సెంట్రల్‌ బ్యాంక్‌ ఆఫ్‌ యుఎఇ గవర్నర్‌ ఖలీద్‌ మహ్మద్‌ బలమా ఈ అవగాహన ఒప్పందాలపై సంతకాలు చేశారు. కరెంట్‌ ఖాతా లావాదేవీలు, అనుమతించబడిన మూలధన ఖాతా లావాదేవీలను కవర్‌ చేసే లోకల్‌ కరెన్సీ సెటిల్మెంట్ సిస్టమ్‌ (ఎల్‌సిఎస్‌ఎస్‌)ను అమలు చేయడం దీని లక్ష్యం. రూపాయి, దిన్హార్‌తో విదేశీ మారకపు మార్కెట్‌ను సృష్టించడం, పెట్టుబడులను సులభతరం చేయడం, రెండు దేశాల మధ్య చెల్లింపులను క్రమబద్ధీకరించడం అంతిమ ఉద్దేశ్యం. యుఎఇలో నివసిస్తున్న భారతీయుల చెల్లింపులతో సహా, స్థానిక కరెన్సీల వాడకం లావాదేవీల ఖర్చులు, లావాదేవీల కోసం సెటిల్మెంట్ సమయాన్ని తగ్గిస్తుంది.” అని ఆర్‌బిఐ పేర్కొంది. ”భారత్‌లోని యూనిఫైడ్‌ పేమెంట్స్‌ ఇంటర్‌ఫేస్‌ (యుపిఐ), యుఎఇ యొక్క ఇన్‌స్టంట్‌ పేమెంట్‌ ప్లాట్‌ఫారమ్‌ (ఐపిపి) వంటి ఫాస్ట్‌ పేమెంట్‌ సిస్టమ్స్‌ (ఎఫ్‌పిఎస్‌ఎస్‌) యొక్క ఏకీకరణతో సహా వివిధ అంశాలలో సహకరించడానికి కట్టుబడి ఉన్నాయి. భారతదేశం యొక్క స్ట్రక్చర్డ్‌ ఫైనాన్సీయల్‌ మెసేజింగ్‌ సిస్టమ్‌ (ఎస్‌ఎఫ్‌ఎంఎస్‌) వంటి వారి చెల్లింపుల మెసేజింగ్‌ వ్యవస్థలను యుఎఇ యొక్క మెసేజింగ్‌ సిస్టమ్‌తో లింక్‌ చేసే అవకాశాన్ని అన్వేషిస్తూనే, రూపే స్విచ్‌, యుఎఇ స్విచ్‌ కనెక్ట్‌ చేయాలి.” అని ఇరు సెంట్రల్‌ బ్యాంక్‌లు భావించాయి. యుపిఐ-ఐపిపి లింకేజ్‌ ఏ దేశంలోనైనా వినియోగదారులకు వేగంగా, సౌకర్యవంతంగా, సురక్షితంగా, ఖర్చుతో కూడుకున్న క్రాస్‌-బోర్డర్‌ ఫండ్స్‌ బదిలీలను చేయడానికి వీలు కల్పిస్తుంది. కార్డ్‌ స్విచ్‌ల అనుసంధానం దేశీయ కార్డ్‌ల పరస్పర అంగీకారాన్ని, కార్డ్‌ లావాదేవీల ప్రాసెసింగ్‌ను సులభతరం చేస్తుంది. మెసేజింగ్‌ వ్యవస్థల అనుసంధానం రెండు దేశాల మధ్య ద్వైపాక్షిక ఆర్థిక అంశాలను సులభతరం చేయడానికి ఉద్దేశించబడింది.” అని ఆర్‌బిఐ పేర్కొంది.
