సుందరయ్య విజ్ఞాన కేంద్రం కార్యదర్శి ఎస్‌.వినయకుమార్‌
టీపీఎస్‌కే ఆధ్వర్యంలో జ్యోతిరావు ఫూలే వర్ధంతి
నవతెలంగాణ – ముషీరాబాద్‌
జ్ఞాన సముపార్జన ద్వారానే రాజ్యాధికార సాధన జరుగుతుందని అందరికన్నా ముందే సిద్ధాంతికరించినవారు జ్యోతిరావు ఫూలే అని సుందరయ్య విజ్ఞాన కేంద్రం కార్యదర్శి ఎస్‌.వినయకుమార్‌ అన్నారు. తెలంగాణ ప్రజా సాంస్కృతిక కేంద్రం(టీపీఎస్‌కే) ఆధ్వర్యంలో శుక్రవారం జ్యోతిరావు ఫూలే 135వ వర్ధంతిని హైదరాబాద్‌ బాగ్‌లింగంపల్లిలోని సుందరయ్య విజ్ఞాన కేంద్రంలో నిర్వహించారు. టీపీఎస్‌కే రాష్ట్ర అధ్యక్షులు భూపతి వెంకటేశ్వర్లు అధ్యక్షతన జరిగిన ఈ కార్యక్రమంలో ఫూలే చిత్ర పటానికి వినయకుమార్‌ పూలమాలలు వేసి నివాళులర్పించి మాట్లాడారు. చదువు మూలంగానే సమాజంలో బ్రాహ్మణాధిపత్యం స్థిర పడిందని ఫూలే విషదీకరించారని తెలిపారు. అందుకే తమ ఆధిపత్యానికి ఎక్కడా నష్టం జరగకుండా ఉండేందుకు కొందరు మనుస్మృతిని పగడ్బందీగా పాటించి, మరెవ్వరికీ చదువు ఒంటబట్టకుండా శతాబ్దాలుగా అడ్డుకున్నారన్నారు. కులాలుగా, వర్ణాలుగా సమాజాన్ని విభజించి తమ ఆధిపత్యాన్ని కొనసాగించారని తెలిపారు.
ఈ ఆధిపత్యాన్ని, బానిస భావ జాలాన్ని చదువు ద్వారానే శూద్ర కులాల వారు ఎదుర్కోవాలని ఫూలే బోధించారని గుర్తు చేశారు. జ్ఞానరాహిత్యం వల్లే శ్రామిక జనం బానిసత్వంలోకి నెట్టివేయబడ్డారని చెప్పారన్నారు. భూపతి వెంకటేశ్వర్లు మాట్లాడుతూ.. ఫూలే చీకటి దొంతరుల్లో నక్షత్రాల పందిరి వేసినవారని, లోయల్లో కునారిల్లుతున్న స్త్రీని పర్వత శిఖరాగ్రాన నిలబెట్టినవారని చెప్పారు. మతోన్మాద అగ్ని శిఖల్లో దగ్ధమవుతున్న మహిళను రక్షించి విద్యా కిరీటం పెట్టినారని, పితృస్వామ్య ఆధిపత్యాన్ని ఎదిరించి మాతృస్వామ్యాన్ని స్థాపించిన నిర్మాత అని అన్నారు. మనుస్మృతి విష కౌగిలి నుంచి బహుజనులను విముక్తి చేశారన్నారు. ఈ కార్యక్రమంలో పొన్నం రాజయ్య, ఎన్‌.వేణుగోపాల్‌, కందుకూరి రజిత, కవిత, ఇందిరా, పోటీ పరీక్షల విద్యార్థులు, యూనివర్సిటీ స్కాలర్స్‌ పాల్గొన్నారు.
