ఎంపీడీవో వేదవతి
నవతెలంగాణ – పాలకుర్తి
గ్రామపంచాయతీ ఎన్నికల నిర్వహణలో పోలింగ్ అధికారులు, ప్రిసైడింగ్ అధికారులు బాధ్యతగా పనిచేసి, ప్రజలకు జవాబుదారీగా ఉండాలని ఎంపీడీవో వర్కల వేదవతి సూచించారు. శనివారం మండల కేంద్రంలో గల ఉన్నత పాఠశాలలో పోలింగ్ అధికారులు, ప్రిసైడింగ్ అధికారులకు పోలింగ్ నిర్వహణపై జిల్లా మాస్టర్ ట్రైనర్ అన్నావజ్జుల నరసింహమూర్తి ఆధ్వర్యంలో శిక్షణ కార్యక్రమాన్ని ఏర్పాటు చేశారు. ఈ సందర్భంగా ఎంపీడీవో వేదవతి మాట్లాడుతూ పోలింగ్ అధికారులకు ఎన్నికల నిర్వహణ పట్ల పూర్తిస్థాయి అవగాహన ఉండాలని సూచించారు. ఎన్నికల నిర్వహణతో పాటు ఎన్నికల సందర్భంలో తీసుకోవాల్సిన జాగ్రత్తల పట్ల అప్రమత్తంగా ఉండాలని సూచించారు.
బూత్ స్థాయి నుండి బ్యాలెట్ బాక్స్ వరకు నిర్వహించాల్సిన బాధ్యతలను తూచా తప్పకుండా పాటించాలన్నారు. బ్యాలెట్ వినియోగంపై ప్రయోగాత్మకంగా ఓటు హక్కు వినియోగించుకునే విధానాన్ని పోలింగ్ అధికారులకు, ప్రిసైడింగ్ అధికారులకు వివరించి అవగాహన కల్పించారు. మండలంలో 52,845 ఓటర్లు ఉన్నారని తెలిపారు. 38 గ్రామపంచాయతీలకు గాను 336 పోలింగ్ స్టేషన్లను ఏర్పాటు చేశామని తెలిపారు. గ్రామపంచాయతీ ఎన్నికలు సజావుగా నిర్వహించేందుకు ఎన్నికల అధికారులు కృషి చేయాలన్నారు. ఈ కార్యక్రమంలో ఎంపీఓ శ్రీనాథ్ రెడ్డి,సూపర్డెంట్ రవీందర్, మండల మాస్టర్ ట్రైనర్స్ ఎం.క్రాంతికుమార్, ఎస్ శేషగిరిరావు, ఎం శ్రీనివాస్, సిహెచ్ రమేష్, పిఏకాంబరం, పి వెంకట నరసయ్య, డి సూర్యప్రకాష్ లతోపాటు ఎన్నికల సిబ్బంది, తదితరులు పాల్గొన్నారు.
