తెలుగునాట ఈ మధ్యకాలంలో మసాలాలు దట్టించే తీరు తగ్గించి అవగాహన, ఆలోచనలను పెంచే సినిమాలు తీయడం అధికమవుతున్నాయి. తెలుగులో ఇప్పుడిప్పుడే సహజత్వాన్ని వీడని, మనిషి జీవిత పరిధి దాటని కథలను సినిమాలుగా తీసే యువదర్శకుల సంఖ్య పెరిగింది. ఆ కోవలో ‘కోర్టు’ మూవీద్వారా ఆకట్టుకొన్న యువదర్శకుడు రామ్‌ జగదీష్‌ ఒకరు. ఈ వారం జోష్ ముచ్చట్లు అతడి మాటల్లోనే…
సాగరతీరపు మణిహారమైన వైజాగ్‌ లోని సీతమ్మపేట మా సొంతూరు. అమ్మానాన్న(దొడ్డ గంగారావు-పొలమ్మ), అక్కలు(రూప, వరలక్ష్మి) నేను చివరివాడిని. బాల్యంనుంచే ఏవేవో ఊహాలు ఉండేవి. బహుశా సముద్ర వాతావరణంనుంచి వచ్చిందే అనుకొంట. చదువంత స్థానికంగానే జరిగింది. సినిమాలపై మోజున్నప్పటికీ ఎలాగోలా డిప్లొమా ఇన్‌ కెమికల్‌ ఇంజినీరింగ్‌ అయితే పూర్తి చేయగలిగాను.
…అలా వచ్చాను సినిమాలలోకి
చదువుకుంటున్న రోజుల్లోనే సినిమాలు వరసపెట్టి చూసేవాణ్ణి. తెలీకుండానే సినిమా అన్నది సుబ్కాన్సెస్‌ లో నాటుకొంది. ‘ఖడ్గం’, ‘సై’ వంటి సినిమాలు ఎక్కువగా ఆకట్టుకునేవి. కాలేజ్‌ టైంలోనే వెంటనే సినిమాల్లోకి వెళ్ళిపోవాలన్న ఆవేశంతో మా ప్రిన్సిపాల్‌ సురేష్‌ సార్‌ దగ్గరికి వెళ్ళి మీకు నిర్మాత వంశీకష్ణ శ్రీనివాస్‌ గారు తెలుసంటా కదా సార్‌. నన్ను అయన దగ్గర అసిస్టెంట్‌ డైరెక్టర్‌ గా జాయిన్‌ చేయించండని అడిగాను. ఆయన మొదట చదువు పూర్తి చెయ్యమన్నారు. చదువయ్యకా కూడా తగ్గని నా సినిమా పిచ్చిని చూసి ఒకింత నా పోరు భరించలేకనే నిర్మాత వంశీకష్ణగారి దగ్గరకి తీసుకెళ్ళి పరిచయంచేసి విషయం చెబితే వద్దు ఇంకా పై చదువులు చదువుకొమను. అందులోనూ వాళ్ళకున్న ఒక్కగానొక్క కొడుకు సెటిల్‌ కాకపోయినా, చెడిపోయినా మొత్తం కుటుంబం ఇబ్బంది పడుతుందని నచ్చజెప్పడానికి చూశాడు. కానీ నాకున్న ఇంటరెస్ట్‌ చూసి ‘రారా కష్ణయ్య'(2014) సినిమాకు అసిస్టెంట్‌ డైరెక్టర్‌ గా అవకాశం ఇవ్వడం. ‘ఉర్వశివో రాక్షశివో’కి (2022) సినిమాకి స్క్రిప్ట్‌ అసోసియేట్‌ గా పనిచేయడం చకచక జరిగిపోయాయి. మధ్యమధ్యలో కష్ణానగర్‌ కష్టాలు లేకపోలేదు.
అంతకుముందు ‘మా షార్ట్‌ ఫిలిమ్స్‌’ (2012) కాంటెస్ట్‌, పూరి జగన్నాథ్‌- సాక్షి మీడియా నిర్వహించిన ‘షార్ట్‌ ఫిలిం కాంటెస్ట్‌’లలో (2015) నేను తీసిన షార్ట్‌ ఫిలిమ్స్‌ ఎంపికవడం కూడా చాలా కాన్ఫిడెన్స్‌ నిచ్చింది. ఈ ప్రయాణ అనుభవం కోర్టు మూవీకి ఎంతగానో ఉపయోగపడింది.
కోర్టు కథ అలా పుట్టింది…
ఎలాంటి కథ చేద్దాం అని అనుకొంటున్న తరుణంలో ఎక్కడో మిత్రులద్వారా ఓ పోక్సో కేసు గురించి తెలుసుకున్నాను. పోక్సో చట్టంపై అవగాహన లేకపోవడంతో చాలామందిని ఇటువంటి కేసుల్లో అదేపనిగా కేసులు పెట్టి ఇరికించడం. కొన్ని సంవత్సరాలపాటు అమాయకులు జైల్లో మగ్గిపోవడం జరిగేది. ఇది ఎక్కువగా ఇంటర్‌ చదివే అమ్మాయిలు-డిగ్రీ చదివే అబ్బాయిల మధ్యనే ఎక్కువ ఉండేవి. ఈ పోక్సో చట్టం రాకముందు కూడా ఇలాంటివి జరిగేవి. ఎప్పుడైతే ఈ చట్టం వచ్చిందో ఆ చట్టం అడ్డుపెట్టుకొని కొంతమంది, దానిపై అవగాహనలేని యువకులపై కేసులు నమోదు చేసేవాళ్ళు. వీటిపై ఓ కథ రాద్దాం అనుకొని దానికి సంబంధించిన రీసెర్చ్‌ లో భాగంగా చాలా పోలీస్‌ స్టేషన్లలో ఈ ఫోక్సో కేసుల గురించి అడిగితే ఇటువంటి కేసుల గురించి కోకొల్లలుగా చెప్పేవారు. పోలీసులు, లాయర్లు, బాధితులు… ఇలా ఒక్కోరిది ఒక్కో కథగా ఉండేది. వాస్తవ జీవితాల చుట్టూ తిరిగే ఇలాంటి ఓ కథ చెప్పాలనిపించింది. ఈ కోర్టు మూవీ కథ కోసం నాతోపాటు మా రైటింగ్‌ టీం పడిన కష్టం చాలానే ఉంది.
నాని-ప్రియదర్శి అన్నలే కీలకం…
కథ పూర్తయ్యాక ప్రియదర్శి అన్నకు కథ చెప్పాను. అన్నకు నచ్చడంతో చేయడానికి సిద్ధమయ్యారు. ఇటువంటి కథను ప్రొడ్యూస్‌ చెయ్యాలంటే సినిమామీద ఫ్యాషన్‌ ఉన్నవాళ్ళు మాత్రమే తీయగలరని దర్శి అన్ననే హీరో నాని సార్‌ దగ్గరికి తీసుకెళ్ళాడు. కథ చెప్పించాడు. నాని సార్‌ కు కూడా నచ్చడంతో ప్రొడ్యూస్‌ చేయడానికి ముందుకొచ్చారు. సినిమా నిర్మాణంలో ఏ విధంగానైతే నేను రాజీపడకుండా కథ రాసుకున్ననో ఆ విధంగానే వారు కూడా రాజీపడకుండా ప్రొడ్యూస్‌ చేసారు. ఈ కథ సెట్స్‌ మీదకు వెళ్లి ఇంతటి విజయం సాధించడానికి నాని సార్‌-ప్రియదర్శి అన్నలే కారణం.
వీళ్ళను ఎలా ఎంపిక చేశానంటే…
అడ్వకేట్‌ తేజ-ప్రియదర్శి…
ఈ కథ రాస్తున్నప్పుడే టూకీగా అన్నకు చెప్పాను. బాగుంది చేద్దాం పూర్తి కథ రాయమన్నారు. అలా రాస్తున్న క్రమంలో దర్శి అన్న ‘బలగం’ రిలీజయి పెద్ద హిట్‌ అవ్వడంతో ఇక ఈ సినిమా చేయడేమో అనుకొన్నాం. కానీ తప్పకుండా ఈ సినిమా చేస్తా బలగం హిట్‌ అయ్యిందని నాకోసం ప్రత్యేకంగా ఏమేమో చెయ్యకు. నువ్వు రాసుకున్న కథలోకి నేను వస్తా. నాలోకి కథను లాక్కు రావద్దు అని చెప్పారు. కథపట్ల ఆ గౌరవం ఉన్నవాడు కాబట్టే హిరోయిన్‌ లేని సినిమాను చేయడానికి ముందుకొచ్చారు.
మంగపతి-శివాజీ:
ఈ సినిమాను బలంగా నిలబెట్టే క్యారెక్టర్‌ మంగపతిదని కథ రాస్తున్నప్పుడే అర్థమయ్యింది. ఎవరైతే దీనికి న్యాయం చేస్తారా అని ఆలోచిస్తుంటే ఇంద్రలో ఒక సీన్‌ చూశాం. ఇంటర్వెల్‌ కి ముందువరకు మంచిగా నటించి ఆ తర్వాత నెగిటివ్‌ షెడ్‌ లో కనిపించే గిరి పాత్రలో నటించిన శివాజీగారిని. అప్పటికి బిగ్‌ బాస్‌ లో ఉన్నారు. అయన లూక్స్‌ చూసి మన మంగపతి క్యారెక్టర్‌ కి సార్‌ పర్ఫెక్ట్‌ అనిపించి మొదటినుంచి ఆయనైతేనే న్యాయం చేయగలడని భావించాం. శివాజీగారికి కథ నచ్చింది. తప్పకుండా చేస్తానని మంగపతి క్యారెక్టర్‌ కు వెంటనే ఓకే చెప్పారు.
చందు-హర్ష్‌ రోషన్‌:
ఈ అబ్బాయి చైల్డ్‌ ఆర్టిస్ట్‌ గా తెలుగులో చాలా ఫేమస్‌. టీనేజ్‌ లోని ఇన్నోసెన్స్‌ ని అతనైతే బాగుంటుందని మొదటినుంచి అనుకుని రోషన్‌ ని ఎంపిక చేసుకున్నాం. సినిమాపట్ల సిన్సియారిటీ ఉన్న ఆర్టిస్ట్‌. తప్పకుండా భవిష్యత్తులో మంచి నటుడవుతాడు.
జాబిలి-శ్రీదేవి ఆపళ్ల:
ఆడిషన్స్‌ లో మేం చాలా ఎక్కువగా కష్టపడింది ఈ పాత్ర కోసమే. సినిమాలో ఎక్కువగా కనిపించదు. కానీ సినిమా మొత్తం తన చుట్టే తిరుగుతుంది. అంతటి వెయిట్‌ ఉన్న పాత్ర జాబిలిది. చాలామందిని ఆడిషన్స్‌ చేసినా ఎవరు సెట్‌ అవ్వడం లేదు. మా టీం ఇన్‌ స్టాలో జల్లెడ పడుతున్న క్రమంలో ఓ రీల్స్‌ లో ఈ శ్రీదేవి కనిపించింది. రీల్స్‌ వరకు ఓకే సినిమాకు ఎట్లా ఉంటుందోనన్న డౌట్‌ తో ఒకసారి లుక్‌ టెస్ట్‌ కి పిలిచాం. మా సందేహాలన్నీ తీరేలా మేం రాసిన కథ కోసమే పుట్టిందేమో అన్నట్టుగా అనిపించింది. సినిమాలో కూడా అలాగే నటించింది .
వీరేకాక శుభలేఖ సుధాకర్‌ సార్‌, హర్షవర్దన్‌ సార్‌, రోహిణి మేడం, సాయికుమార్‌ సార్‌ వాళ్ళు కూడా కథ నచ్చి, నమ్మి నటించగలిగినందుకే కోర్టు మూవీ ఇంత పెద్ద హిట్‌ కాగలిగింది. నేనెన్ని సినిమాలు తీసినా కోర్టు మూవీ నాకెప్పుడు ప్రత్యేకంగానే ఉండిపోతుంది.
మరిచిపోలేని అనుభూతి అది…
ఈ కోర్టు మూవీ విజయవంతమవ్వడంతో మా నాన్న దగ్గరికి బట్టలు కుట్టించుకోవడానికి వస్తున్న వాళ్ళందరు మీ అబ్బాయి తీసిన ‘కోర్టు’ మూవీ చూశాం. చాలా బాగా తీశాడండి. ఈసారి హైదరాబాదునుంచి వచ్చినప్పుడు చెప్పండి ఓ ఫోటో దిగుతాం’ అని అడుగుతున్నారని మా నాన్న నాకు చెబుతున్నప్పుడు ఆయన కళ్ళల్లో అదో కిక్‌ ఫీలింగ్‌ కనిపించింది. అలాగే చిన్నప్పటినుంచి ఎన్నో సినిమాలు చూస్తూ వచ్చిన జగదాంబ థియేటర్‌ లో మా కోర్టు మూవీ హౌస్‌ ఫుల్‌ బోర్డ్‌ పెట్టారని ఫ్రెండ్స్‌ చెప్పడం కూడా మరిచిపోలేని అనుభూతి. నా జీవితంలో ఎన్ని సినిమాలు తీసినా ఈ కోర్టు మూవీకి ఓ స్పెషల్‌ ప్లేస్‌ ఉంటుంది.
- బి. మదన్‌ మోహన్‌ రెడ్డి, 9989894308
