చారిత్రక కళాశాలలో కీలక బాధ్యతలు స్వీకరించిన జూల సత్యనారాయణ
నవతెలంగాణ-జన్నారం
ఉత్తర తెలంగాణలో ఉన్నత విద్యకు విశిష్ట కేంద్రంగా నిలిచిన వరంగల్ నగరంలోని ప్రముఖ ఆర్ట్స్ అండ్ సైన్స్ కళాశాల ఆంగ్ల విభాగం హెడ్గా జన్నారం మండలం అక్కపెల్లిగూడ గ్రామానికి చెందిన అసిస్టెంట్ ప్రొఫెసర్ జూల సత్యనారాయణ నియమితులయ్యారు. ప్రతిష్ఠాత్మకమైన ఈ కళాశాలలో ఆంగ్ల విభాగానికి అధిపతిగా బాధ్యతలు చేపట్టడం పట్ల ఆయన హర్షం వ్యక్తం చేశారు.
శతాబ్ది వేడుకల వేళ కీలక బాధ్యతలు
వందేళ్ల చరిత్ర కలిగిన ఈ కళాశాల ప్రస్తుతం శతాబ్ది ఉత్సవాలను నిర్వహించుకుంటున్న నేపథ్యంలో ఆంగ్ల విభాగం హెడ్గా సత్యనారాయణ నియామకం ప్రాధాన్యత సంతరించుకుంది. ఈ చారిత్రక విద్యాసంస్థలో ఎంతోమంది ప్రముఖులు విద్యాభ్యాసం చేశారు. మాజీ ప్రధాని పీవీ నరసింహారావు, ప్రముఖ విద్యావేత్త ప్రొఫెసర్ జయశంకర్ వంటి మహోన్నత వ్యక్తులు చదువుకున్న కళాశాలలో కీలక బాధ్యతలు చేపట్టడం తనకు ఎంతో గర్వంగా ఉందని సత్యనారాయణ పేర్కొన్నారు.
విద్యా ప్రమాణాల పెంపునకు కృషి
ఆంగ్ల విభాగం హెడ్గా తనపై అప్పగించిన బాధ్యతలను సమర్థవంతంగా నిర్వర్తిస్తూ విద్యార్థులకు మెరుగైన విద్యా అవకాశాలు అందించేందుకు కృషి చేస్తానని సత్యనారాయణ తెలిపారు. ఆంగ్ల భాషపై విద్యార్థుల్లో ఆసక్తిని పెంపొందించడంతో పాటు, ఉన్నత విద్య, పోటీ పరీక్షలు, ఉద్యోగ అవకాశాలకు ఉపయోగపడే విధంగా విద్యార్థులను తీర్చిదిద్దేందుకు కృషి చేస్తానన్నారు.
వీసీ, రిజిస్ట్రార్, ప్రిన్సిపాల్కు కృతజ్ఞతలు
తనకు ఈ బాధ్యతలు అప్పగించి అవకాశం కల్పించిన విశ్వవిద్యాలయ వీసీ, రిజిస్ట్రార్, కళాశాల ప్రిన్సిపాల్ జ్యోతిలకు సత్యనారాయణ ప్రత్యేక కృతజ్ఞతలు తెలిపారు. తనపై ఉంచిన నమ్మకాన్ని నిలబెట్టుకుంటూ విభాగ అభివృద్ధికి శక్తివంచన లేకుండా పనిచేస్తానని పేర్కొన్నారు.
అభినందనల వెల్లువ…
ఆంగ్ల విభాగం హెడ్గా బాధ్యతలు స్వీకరించిన జూల సత్యనారాయణను కళాశాలకు చెందిన పలువురు అధ్యాపకులు, సిబ్బంది అభినందించారు. జన్నారం మండలం అక్కపెల్లిగూడకు చెందిన వ్యక్తి ప్రతిష్ఠాత్మకమైన విద్యాసంస్థలో కీలక పదవిని చేపట్టడం పట్ల గ్రామస్థులు, విద్యావేత్తలు, ఆయన మిత్రులు హర్షం వ్యక్తం చేస్తూ అభినందనలు తెలిపారు.
