– భారీగా తరలివచ్చిన ప్రజలు
– ఉచితంగా వైద్య పరీక్షలు, మందులు పంపిణీ
నవతెలంగాణ-దమ్మపేట : భద్రాద్రి-కొత్తగూడెం జిల్లా దమ్మపేట మండలం కేంద్రంలో సత్తుపల్లి న్యూ స్టార్ ఫౌండేషన్ ఆధ్వర్యంలో బుధవారం ఉచిత మెగా వైద్య శిబిరాన్ని నిర్వహించారు. న్యూ స్టార్ ఫౌండేషన్ వ్యవస్థాపకులు డాక్టర్ సురేష్ రామాల పర్యవేక్షణలో జరిగిన ఈ ఉచిత వైద్య శిబిరంలో స్థానిక ఆర్యవైశ్య సంఘం, వాసవి క్లబ్ గ్రేటర్ బాధ్యులు దారా మల్లికార్జునరావు, పసుమర్తి రామభద్రం, బచ్చు రవిచంద్ర, పోలిశెట్టి శివకుమార్ ముఖ్య అతిథులుగా హాజరయ్యారు.
ప్రముఖ జనరల్ మెడిసిన్ వైద్య నిపుణులు డాక్టర్ లహరి భీమిరెడ్డి, ఈఎన్టీ నిపుణులు డాక్టర్ ముదిశెట్టి ఉమేష్ వైద్య శిబిరానికి వచ్చిన ప్రజలకు ఉచితంగా వైద్య పరీక్షలు నిర్వహించి ఆరోగ్య సంబంధిత సలహాలు, సూచనలు అందించారు.
ఈ శిబిరంలో దమ్మపేట పరిసర ప్రాంతాల ప్రజలు పెద్ద ఎత్తున పాల్గొని ఉచిత వైద్య సేవలను, మందులను అందుకున్నారు.
ఈ సందర్భంగా డాక్టర్ సురేష్ రామాల మాట్లాడుతూ సత్తుపల్లిలో మొట్టమొదటి అత్యాధునిక మల్టీ స్పెషాలిటీ ఆసుపత్రిగా ‘న్యూ స్టార్’ను తీర్చిదిద్దామని తెలిపారు.
చిన్న పిల్లల నుంచి పెద్దల వరకు అన్ని రకాల వైద్య సేవలు, నిపుణులైన డాక్టర్ల పర్యవేక్షణలో 24 గంటల పాటు అందుబాటులో ఉంటాయని ఆయన తెలిపారు. సామాన్యులకు సైతం తక్కువ ఖర్చుతో, నాణ్యమైన కార్పొరేట్ స్థాయి వైద్యం అందించడమే తమ న్యూ స్టార్ హాస్పిటల్ ముఖ్య ఆశయమని స్పష్టం చేశారు.
సత్తుపల్లి, దమ్మపేట, అశ్వారావుపేట, పెనుబల్లి, కల్లూరు, వేంసూరు ప్రాంతాల ప్రజలు ఈ మెరుగైన వైద్య సేవలను ఉపయోగించుకోవాలని డాక్టర్ సురేష్ రామాల కోరారు.
