హత్యలకు లైసెన్సా?

ఫ్రాన్స్‌లో పోలీసు కాల్పుల చట్టానికి వ్యతిరేకంగా వేలాది మంది నిరసన
జవాబుదారీతనాన్ని బలహీనపరుస్తున్నారంటూ హక్కుల సంఘాల ఆందోళన
పారిస్‌ సహా పలు నగరాల్లో ప్రదర్శనలు.. పాల్గొన్న వేలాది మంది
ప్యారిస్‌ : ఫ్రాన్స్‌లో పోలీసుల ఆయుధ వినియోగానికి సంబంధించిన నిబంధనలను మార్చేందుకు ఉద్దేశించిన ప్రతిపాదిత చట్టానికి వ్యతిరేకంగా ఆదివారం ప్యారిస్‌తో పాటు పలు నగరాల్లో వేలాది మంది ప్రజలు నిరసన చేపట్టారు. పోలీసులకు కాల్పుల విషయంలో అదనపు చట్టపరమైన రక్షణ కల్పించే ఈ బిల్లును పార్లమెంటు దిగువ సభ జులైలో ఆమోదించగా.. ప్రస్తుతం సెనేట్‌ పరిశీలనకు ఎదురుచూస్తోంది.

పోలీసులకు ‘చట్టబద్ధత’ ముందస్తు రక్షణ!
ఫ్రాన్స్‌ జాతీయ అసెంబ్లీలోని డిప్యూటీలు జులైలో ఆమోదించిన ఈ ప్రతిపాదిత చట్టం ప్రకారం.. పోలీసులు, జెండార్మరీ సిబ్బంది తమ ఆయుధాలను ఉపయోగించినప్పుడు వారు చట్టబద్ధంగానే వ్యవహరించారనే ముందస్తు భావనకు అవకాశం కల్పించనున్నారు. ఈ బిల్లు ప్రస్తుతం సెనేట్‌ పరిశీలనలో ఉంది. అయితే, ఈ నిబంధన పోలీసులపై ఉన్న జవాబుదారీతనాన్ని తగ్గించే ప్రమాదం ఉందని హక్కుల సంఘాలు, ప్రతిపక్ష రాజకీయ నాయకులు, కార్యకర్తలు అభ్యంతరం వ్యక్తం చేస్తున్నారు. పోలీసు కాల్పుల కేసుల్లో నిందితులుగా ఉన్న అధికారులకు అనుకూలంగా రుజువు బాధ్యతను మార్చే ప్రయత్నం జరుగుతోందని వారు ఆరోపిస్తున్నారు.

‘ఉరితీసే లైసెన్సుగా మారుతుంది’
నిరసనల్లో పాల్గొన్న అమల్‌ బెంటూసీ తన సోదరుడు అమిన్‌ ఘటనను ప్రస్తావించారు. 2012లో ప్యారిస్‌కు ఉత్తరంగా ఉన్న సీన్‌-సెయింట్‌-డెనిస్‌ ప్రాంతంలో దోపిడీదారుడిగా భావించిన అమిన్‌ను పోలీసులు వెనుకవైపు కాల్చి చంపారని ఆమె తెలిపారు. ప్రతిపాదిత చట్టాన్ని ఆమె ‘ఉరితీసే లైసెన్స్‌’గా అభివర్ణించారు. పోలీసుల బలప్రయోగానికి సంబంధించిన కేసుల్లో రుజువు బాధ్యతను మార్చేలా ఈ చట్టం రూపొందించారని ఆరోపించారు. ఆమ్నెస్టీ ఇంటర్నేషనల్‌, ఫ్రాన్స్‌ మేజిస్ట్రేట్ల సంఘం, దేశంలోని లీగ్‌ ఆఫ్‌ హ్యూమన్‌ రైట్స్‌ ప్రతినిధులు కూడా నిరసనల్లో పాల్గొన్నారు.
ర్యాన్స్‌లో ఉద్రిక్తత.. ఎనిమిది మంది అరెస్టు
నిరసనల నేపథ్యంలో ఫ్రాన్స్‌ అంతర్గత వ్యవహారాల మంత్రి లారెంట్‌ నూనెజ్‌ పోలీసులను అప్రమత్తంగా ఉండాలని కోరారు. ఆందోళనల సందర్భంగా అవాంఛనీయ ఘటనలు చోటుచేసుకునే అవకాశం ఉందని ఆయన హెచ్చరించారు. ర్యాన్స్‌ నగరంలో నిరసనకారులు పోలీసులపై వస్తువులు విసిరిన ఘటనలో ఎనిమిది మందిని అరెస్టు చేసినట్టు అధికారులు తెలిపారు. ఈ ఘటనలో ముగ్గురు పోలీసు అధికారులు గాయపడ్డారు.
7.3 లక్షల సంతకాలతో పిటిషన్‌
ప్రతిపాదిత చట్టాన్ని వ్యతిరేకిస్తూ ఫ్రాన్స్‌ జాతీయ అసెంబ్లీ వెబ్‌సైట్‌లో ప్రారంభించిన పిటిషన్‌కు సుమారు 7.3 లక్షల సంతకాలు వచ్చాయి. అయితే, పార్లమెంటరీ న్యాయ కమిటీ జులైలో ఆ పిటిషన్‌ను తిరస్కరించింది. ప్రస్తుతం బిల్లు సెనేట్‌ పరిశీలనకు వెళ్లిన నేపథ్యంలో.. పోలీసుల బలప్రయోగం, పౌరుల హక్కులు, అధికారుల జవాబుదారీతనం వంటి అంశాలపై ఫ్రాన్స్‌లో చర్చ మరింత తీవ్రతరమైంది.

నగరాల్లో ఆందోళనలు
ఫ్రాన్స్‌లోని మరికొన్ని నగరాల్లోనూ చట్టానికి వ్యతిరేకంగా ప్రదర్శనలు జరిగాయి. లియాన్‌లో 4,500 మంది, టులూజ్‌లో మరో 3,700 మంది ఆందోళనలో పాల్గొన్నారు. పోలీసు హింస మరింత పెరిగే ప్రమాదం ఉందని ఆమ్నెస్టీ ఇంటర్నేషనల్‌ ప్రతినిధి సెడ్రిక్‌ పికార్డ్‌ ఆందోళన వ్యక్తం చేశారు. పోలీసు దుర్వినియోగం ఇప్పటికే తీవ్రమైన సమస్యగా ఉన్న దేశంలో ఈ చట్టం పరిస్థితిని మరింత దిగజార్చే ప్రమాదం ఉందని నిరసనకారులు అంటున్నారు. మార్సెయిలో నిరసనలో పాల్గొన్న హ్యూగో అనే హైస్కూల్‌ విద్యార్థి మాట్లాడుతూ.. పోలీసు హింస పెరుగుతుందనే భయం తమలో ఉందని తెలిపారు. అయితే ప్రతిపాదిత చట్టానికి మద్దతుదారులు మాత్రం పోలీసులకు అనుకూలంగా తమ వాదనను వినిపిస్తున్నారు.

‘పోలీసులు ఇప్పటికే చంపుతున్నారు’
ప్యారిస్‌లో జరిగిన నిరసనలో వామపక్ష ఫ్రాన్స్‌ అన్‌బౌడ్‌ (ఎల్‌ఎఫ్‌ఐ)) పార్టీ నాయకురాలు మాథిల్డ్‌ పనోట్‌ పాల్గొన్నారు. ఈ సందర్భంగా ఆమె పోలీసులపై తీవ్ర విమర్శలు చేశారు. “పోలీసులు ఇప్పటికే చంపుతున్నారు. ఈ చట్టాన్ని సెనేటర్లు తిరస్కరించాలి” అని తెలిపారు. రిపబ్లిక్‌లో పోలీసులకు శిక్షారహిత అధికారాన్ని కల్పించరాదని ఆమె అన్నారు. ఇతర పౌరుల ప్రాణాలపై నిర్ణయం తీసుకునే హక్కు ఏ ఒక్క వర్గానికీ ఉండకూడదని స్పష్టం చేశారు.