ఓటరు పౌరసత్వ తనిఖీలకు అమెరికా సుప్రీం ఓకే

వాషింగ్టన్ : అమెరికా పౌరులు కాదని అనుమానించిన ఓటర్లను గుర్తించడానికి, పౌరసత్వ సమాచారం కోసం వివాదాస్పద ఫెడరల్ డేటాను వాడుకోవడానికి డొనాల్డ్ ట్రంప్ ప్రభుత్వంపై అమలులో ఉన్న ఆంక్షలను సుప్రీంకోర్టు ఎత్తివేసింది. డేటా విశ్వసనీయతను విమర్శకులు గతంలో ప్రశ్నించిన విషయం తెలిసిందే. ఈ డేటా కారణంగా అమెరికా పౌరులను ఓటర్ల జాబితా నుంచి తప్పుగా తొలగించే అవకాశం ఉన్నదని వారు హెచ్చరించారు. ఈ వ్యవస్థ చట్టవిరుద్ధమని, పౌరుల గోప్యతా హక్కులను ఉల్లంఘిస్తోందని ఓ ఫెడరల్ న్యాయమూర్తి జూన్‌లో తీర్పు చెప్పారు. అయితే ఈ తీర్పును సుప్రీంకోర్టులోని కన్సర్వేటివ్ మెజారిటీ తోసిపుచ్చింది. ఉదారవాద భావాలు కలిగిన ముగ్గురు న్యాయమూర్తులు మెజారిటీ నిర్ణయంతో విభేదించారు. అర్హులైన వారి ఓటు హక్కును పొరబాటున రద్దు చేసే ప్రమాదం ఉన్నదని కేతాంజి బ్రౌన్ జాక్సన్ అనే న్యాయమూర్తి ఆందోళన వ్యక్తం చేశారు.