సత్తుపల్లి పట్టణానికి చెందిన కొరకొప్పు చార్లెస్ అనే బాలుడు గత కొంతకాలంగా బ్లడ్ క్యాన్సర్‌తో బాధపడుతున్నాడు. బాధిత బాలుడి వైద్య ఖర్చుల నిమిత్తం తమ వంతు సాయం అందించాలనే ఉద్దేశంతో మదర్ థెరెసా ఇంజనీరింగ్ కళాశాల విద్యార్థులు, ఎన్ఎస్ఎస్ విభాగం విద్యార్థులు ఆ కళాశాలలో విద్యార్థుల నుంచి విరాళాలు సేకరించారు. సేకరించిన రూ. 26 వేలు విరాళాన్ని కళాశాల ప్రిన్సిపాల్ డాక్టర్ చలసాని హరికృష్ణ సమక్షంలో బాలుడి తల్లిదండ్రులకు బుధవారం అందజేశారు.

ఈ సందర్భంగా ప్రిన్సిపాల్ డాక్టర్ హరికృష్ణ మాట్లాడుతూ.. సమాజంలో అనుకోని సంఘటనలు లేదా ప్రకృతి విపత్తులు సంభవించినప్పుడు మానవతా దృక్పథంతో సాయం అందించాలని ఆయన అన్నారు. ఈ విషయంలో మదర్ థెరెసా విద్యా సంస్థల మేనేజ్‌మెంట్, అధ్యాపక బృందం, విద్యార్థులు ఎల్లప్పుడూ ముందుంటారని కొనియాడారు. కష్టాల్లో ఉన్నవారికి చేయూతనివ్వడం సామాజిక బాధ్యతగా భావిస్తామని ఆయన పేర్కొన్నారు. ఈ కార్యక్రమంలో కళాశాల వైస్ ప్రిన్సిపాల్ డాక్టర్ జి. ఉదయ్ కిరణ్ భార్గవ్, ఐక్యూఏసీ కో-ఆర్డినేటర్ డాక్టర్ ఎంవీ రామచంద్రరావు, సీఎస్‌సీ విభాగాధిపతి పి. మారేశ్వరరావు, ఎన్ఎస్ఎస్ ప్రోగ్రాం ఆఫీసర్ కె. రామకృష్ణారెడ్డి, ఇంగ్లీష్ అసిస్టెంట్ ప్రొఫెసర్ డాక్టర్ పంతంగి మురళీకృష్ణ, ఎన్ఎస్ఎస్ వాలంటీర్లు, విద్యార్థులు పాల్గొన్నారు.