బొద్దింకలను ఉగ్రవాదులంటారా?

ఆ వ్యాఖ్యలు చేయటానికి విద్యామంత్రికి సిగ్గుందా : కాక్రోచ్ పార్టీ ఆగ్ర‌హం
జంతర్ మంతర్ వద్ద కొన‌సాగుతున్న ఆందోళన‌లు
కేంద్ర ఐటీ మంత్రిత్వ శాఖ ఎదుట దీప్కే హాజరు
నవతెలంగాణ -న్యూఢిల్లీ బ్యూరో
బొద్దింకల జనతా పార్టీ (సీజేపీ)ని ఉగ్రవాదుల బీ-టీమ్ అని పిలిచిన కేంద్ర విద్యాశాఖ మంత్రి ధర్మేంద్ర ప్రధాన్‌పై స‌ర్వ‌త్రా ఆగ్ర‌హం వ్యక్తమవుతోంది. నీట్ పునఃపరీక్ష అనంతరం ఒక జాతీయ మీడియాకు ఇచ్చిన ఇంటర్వ్యూలో సీజేపీని ఉగ్రవాది అని పేర్కొన్నారు. ధర్మేంద్ర ప్రధాన్ వ్యాఖ్య‌ల‌పై స్పందిస్తూ న్యాయం కోరేవారు ఉగ్రవాదులా? అని సీజేపీ వ్యవస్థాపకుడు అభిజీత్ దీప్కే ప్రశ్నించారు.
‘‘ప్రధానమంత్రి నరేంద్ర మోడీ, ధ‌ర్మేంద్ర ప్ర‌ధాన్ ద్వారా మమ్మల్ని ఉగ్రవాదులని పిలుస్తున్నారు. మోడీ మమ్మల్ని నేరుగా ఎందుకు అలా పిలవరు? ప్రభుత్వం ప్రజల ఓట్లను కొనుగోలు చేసి పనిచేస్తుంది. ఈ ప్రభుత్వం ఈరోజు మమ్మల్ని ఉగ్రవాదులని పిలిచింది. ఈ ప్రభుత్వానికి సిగ్గు లేదా?’’ అని ప్రశ్నించారు.

‘‘రైతులు, యువత, వైద్యులు అందరినీ ఉగ్రవాదులుగా ముద్ర వేస్తున్నారు. అలాంటప్పుడు ఇక్కడ భారతీయులు ఎవరు? అసలైన తీవ్రవాది ధర్మేంద్ర ప్రధాన్. ప్రధాన్ వల్ల ఎంతో మంది విద్యార్థులు ప్రాణాలు కోల్పోయారు’’ అని అభిజీత్ అన్నారు. ఆందోళన చేస్తున్న విద్యార్థులను ఉగ్రవాదులుగా ముద్ర వేస్తున్న మంత్రికి వ్యతిరేకంగా ఎస్ఎఫ్ఐ కూడా ముందుకు వచ్చింది. ‘‘దేశ పరీక్షలలో పదేపదే జరుగుతున్న అవకతవకల కారణంగా లక్షలాది మంది విద్యార్థులు ఇబ్బందులు పడుతున్నారు. నీట్ ప్రశ్నపత్రాల లీకేజీ కారణంగా 20 మందికి పైగా విద్యార్థులు ఆత్మహత్య చేసుకున్నారు.
ఈ పరిస్థితిలో, విద్యార్థులను ఓదార్చి బాధ్యత తీసుకోవడానికి బదులుగా, విద్యాశాఖ మంత్రి న్యాయం కోరుతున్న వారిపైనే తిరగబడ్డారు’’ అని ఎస్ఎఫ్ఐ అఖిల భారత అధ్యక్షుడు ఆదర్శ్ ఎం సాజి, ప్రధాన కార్యదర్శి శ్రీజన్ భట్టాచార్య ఒక ప్రకటనలో తెలిపారు.

సీజేపీ ఆందోళన కొనసాగింపు
విద్యాశాఖ మంత్రి ధర్మేంద్ర ప్రధాన్ రాజీనామా కోరుతూ సిజెపి జంతర్ మంతర్ వద్ద తమ ఆందోళనను కొనసాగిస్తోంది.
ఈ నిరసన జూన్ 20న ప్రారంభమైంది. ఎస్ఎఫ్ఐతో పాటు ఇతర విద్యార్థి సంఘాలు కూడా ఇందులో పాల్గొంటున్నాయి. బుధవారం, ఉపాధ్యాయులు, ఇతరులు నిరసనకు మద్దతుగా ఆ ప్రదేశానికి చేరుకున్నారు.
నిరసనలో పాల్గొంటున్న వారిపై బీజేపీ మద్దతుదారులు దాడి చేశారని, ఈ ఘటనలో సీజేపీ కార్యకర్తలు గాయపడ్డారని అభిజీత్ దీప్కే తెలిపారు. దీనిపై పోలీసు విచారణ జరపాలని ఆయన డిమాండ్ చేశారు.
సీజేపీ ఎక్స్-అకౌంట్‌ను స్తంభింపజేసిన అనంతరం దాఖలు చేసిన ఫిర్యాదుపై అభిజీత్ దీప్కే బుధవారం కేంద్ర ఐటీ మంత్రిత్వ శాఖ ఎదుట హాజరయ్యారు.