కూకట్‌పల్లి ట్రక్ పార్క్ భూముల వేలాన్ని అడ్డుకుంటాం: హరీశ్ రావు

నవతెలంగాణ-హైదరాబాద్‌: కూకట్‌పల్లిలోని ట్రక్‌ పార్క్‌ భూముల వేలాన్ని నిరసిస్తూ బీఆర్‌ఎస్‌ ఆధ్వర్యంలో ధర్నా నిర్వహించారు. ఈ నెల 27న వేలం నిర్వహించేందుకు ప్రభుత్వం సిద్ధమవుతున్న నేపథ్యంలో చేపట్టిన ఈ నిరసనలో మాజీ మంత్రి హరీశ్‌రావు, బీఆర్‌ఎస్‌ ఎమ్మెల్యేలు, ఎమ్మెల్సీలు పాల్గొన్నారు. ట్రక్‌ పార్క్‌ స్థలాన్ని పరిశీలించి స్థానికులతో మాట్లాడిన హరీశ్‌రావు.. వేలాన్ని అడ్డుకుంటామని హామీ ఇచ్చారు. ఈ సందర్భంగా ఆయన మాట్లాడుతూ.. సీఎం రేవంత్‌రెడ్డి ప్రజా ప్రయోజనాలను పట్టించుకోకుండా ప్రభుత్వ భూములను విక్రయిస్తున్నారని విమర్శించారు. కాప్రా, అమీన్‌పూర్‌లోనూ భూముల అమ్మకానికి ప్రయత్నిస్తున్నారని ఆరోపించారు. బీఆర్‌ఎస్‌ తిరిగి అధికారంలోకి వస్తే భూ అనుమతులను రద్దు చేస్తామని ప్రకటించారు.