మాదాపూర్‌లో వ్యభిచార ముఠా గుట్టురట్టు

ముగ్గురు ఉజ్బెకిస్థాన్ మహిళలకు విముక్తి

నిర్వాహకుని కోసం 
పోలీసుల గాలింపు

నవతెలంగాణ – మాదాపూర్

హైదరాబాద్‌‌లోని మాదాపూర్‌లో వ్యభిచార కార్యకలాపాలు నిర్వహిస్తున్నట్టు ఆరోపణలు ఎదుర్కొంటున్న ముఠా వ్యవహారాన్ని పోలీసులు వెలుగులోకి తెచ్చారు. మాదాపూర్ పోలీసులతో పాటు కూకట్‌పల్లి స్పెషల్ ఆపరేషన్ టీమ్ (ఎస్‌ఓటీ) బృందం సంయుక్తంగా నిర్వహించిన దాడుల్లో ఉజ్బెకిస్థాన్‌కు చెందిన ముగ్గురు మహిళలను పోలీసులు రక్షించారు. ఈ ఘటనకు సంబంధించి వ్యభిచార కార్యకలాపాలను నిర్వహిస్తున్నట్టు ఆరోపణలు ఎదుర్కొంటున్న నాయక్‌ అనే వ్యక్తి పరారీలో ఉన్నట్టు పోలీసులు వెల్లడించారు. అతడి ఆచూకీ కోసం ప్రత్యేకంగా గాలింపు చర్యలు చేపట్టారు. పోలీసులు తెలిపిన వివరాల ప్రకారం.. మాదాపూర్ పోలీస్‌స్టేషన్ పరిధిలోని సర్వే ఆఫ్ ఇండియా కాలనీ, చంద్రనాయక్ తండాలో ఉన్న ఓరియన్ ఎలిగెంట్ సర్వీస్ అపార్ట్‌మెంట్‌లోని ఫ్లాట్ నంబర్ 201లో వ్యభిచార కార్యకలాపాలు జరుగుతున్నట్టు విశ్వసనీయ సమాచారం అందింది. ఈ సమాచారంతో అప్రమత్తమైన మాదాపూర్ పోలీసులు, కూకట్‌పల్లి ఎస్‌ఓటీ బృందం సంయుక్తంగా ఈ నెల 25వ తేదీ రాత్రి సుమారు 9 గంటల సమయంలో సదరు ఫ్లాట్‌పై దాడులు నిర్వహించింది.

ఈ సందర్భంగా అక్కడ ఉన్న ఉజ్బెకిస్థాన్‌కు చెందిన ముగ్గురు మహిళలను గుర్తించి రక్షించారు. ఈ దాడిలో రక్షించిన మహిళలను రుస్తమోవా మఫ్తునా (26), నపసోవా గుజల్‌ (26), దావ్రనోవా మఖ్లియో (24)గా పోలీసులు గుర్తించారు. వీరిని అవసరమైన న్యాయపరమైన ఆదేశాల కోసం న్యాయస్థానం ఎదుట హాజరుపరచనున్నట్టు తెలిపారు. అనంతరం న్యాయస్థానం ఆదేశాలు, సంబంధిత నిబంధనల ప్రకారం తగిన ఆశ్రయ గృహంలో ఉంచి, వారికి పునరావాసం కల్పించే అంశంపై చర్యలు తీసుకోనున్నారు. కాగా, వ్యభిచార కార్యకలాపాలను నిర్వహిస్తున్నట్టు ఆరోపణలు ఎదుర్కొంటున్న నాయక్‌ అనే వ్యక్తిని పట్టుకునేందుకు పోలీసులు గాలింపు చర్యలు చేపట్టారు. ఈ ఘటనపై మాదాపూర్ పోలీస్‌స్టేషన్‌లో కేసు నమోదు చేసి దర్యాప్తు కొనసాగిస్తున్నారు.

సర్వీస్ అపార్ట్‌మెంట్ నిర్వాహకులకు 
పోలీసుల సూచనలు

ఇదిలా ఉండగా, సర్వీస్ అపార్ట్‌మెంట్ల యజమానులు, నిర్వాహకులు తమ వద్ద బస చేసేవారి గుర్తింపు పత్రాలను తప్పనిసరిగా పరిశీలించాలని పోలీసులు సూచించారు. చెల్లుబాటు అయ్యే ఇతర ధ్రువపత్రాలను తనిఖీ చేయడంతో పాటు, అవసరమైన రికార్డులను సక్రమంగా నిర్వహించాలని స్పష్టం చేశారు. అపార్ట్‌మెంట్లలో లేదా ఇతర వసతి గృహాల్లో అనుమానాస్పద కార్యకలాపాలు కనిపిస్తే వెంటనే పోలీసులకు సమాచారం అందించాలని ప్రజలను కోరారు. నగరంలో అక్రమ కార్యకలాపాలను అరికట్టేందుకు పోలీసులు నిఘా కొనసాగిస్తున్న నేపథ్యంలో, మాదాపూర్‌లో జరిగిన ఈ దాడి ప్రాధాన్యం సంతరించుకుంది. కేసు దర్యాప్తు కొనసాగుతున్నందున, పరారీలో ఉన్నట్టు చెబుతున్న వ్యక్తిని పట్టుకున్న తర్వాత మరిన్ని వివరాలు వెలుగులోకి వచ్చే అవకాశం ఉంది.