నవతెలంగాణ హైదరాబాద్: హైదరాబాద్‌లోని సిఎస్ఐఆర్ - ఇండియన్ ఇన్‌స్టిట్యూట్ ఆఫ్ కెమికల్ టెక్నాలజీ (సిఎస్ఐఆర్ - ఐఐసిటి) సహకారంతో బీఏఎస్‌ఎఫ్‌ సంస్థ 2026 అక్టోబర్ 26 నుండి 31 వరకు బీఏఎస్‌ఎఫ్‌ కిడ్స్ ల్యాబ్‌ను నిర్వహిస్తోంది. మున్సిపల్ పాఠశాలలకు చెందిన దాదాపు 1150 మంది విద్యార్థులకు ప్రయోగాత్మక రసాయన శాస్త్రం, పర్యావరణం మరియు వాతావరణ పరిరక్షణపై అవగాహన కల్పించడమే ఈ కార్యక్రమం యొక్క ముఖ్య ఉద్దేశం. 8 నుండి 12 సంవత్సరాల వయస్సు గల పిల్లల కోసం రూపొందించిన ఈ ప్రత్యేక విద్యా కార్యక్రమం ప్రపంచవ్యాప్తంగా 30కి పైగా దేశాల్లో విజయవంతంగా అమలవుతోంది. భారతదేశంలో 2004లో ప్రారంభమైన నాటి నుండి ఇప్పటివరకు 62,000 మందికి పైగా విద్యార్థులకు ఇది చేరువైంది. బీఏఎస్‌ఎఫ్‌ కార్పొరేట్ సామాజిక బాధ్యత (సిఎస్ఆర్)లో భాగంగా వాతావరణ పరిరక్షణపై దృష్టి సారిస్తూ 2023లో పునఃప్రారంభమైన ఈ ల్యాబ్, చెన్నై, ముంబై, బెంగళూరు, ఢిల్లీ వంటి మెట్రో నగరాలతో పాటు నాసిక్ జిల్లాలోని గ్రామీణ, గిరిజన ప్రాంత పిల్లలకు కూడా విస్తరించింది.
ఈ సందర్భంగా బీఏఎస్‌ఎఫ్‌ డిజిటల్ సొల్యూషన్స్ మేనేజింగ్ డైరెక్టర్ కిమ్ హాఫ్కెన్ మాట్లాడుతూ, ప్రయోగాల ద్వారా పిల్లల్లో పరిశోధనాత్మక ఆలోచనలను, విమర్శనాత్మక దృక్పథాన్ని పెంపొందించవచ్చని అభిప్రాయపడ్డారు. సిఎస్ఐఆర్ - ఐఐసిటి డైరెక్టర్ డాక్టర్ డి. శ్రీనివాస రెడ్డి మాట్లాడుతూ, ప్రభుత్వ పాఠశాల విద్యార్థులకు ప్రయోగాత్మక విద్యను అందించడంలో ఈ భాగస్వామ్యం ఎంతో కీలకమైనదని పేర్కొంటూ, మద్దతు తెలిపిన తెలంగాణ ప్రభుత్వ విద్యా విభాగానికి కృతజ్ఞతలు తెలిపారు. ఈ కార్యక్రమంలో పాల్గొన్న పేతేరి ప్రభుత్వ పాఠశాల విద్యార్థిని గౌతమి నీటి శుద్ధి ప్రయోగం తనకు ఎంతో నచ్చిందని, నేర్చుకున్న పర్యావరణ పరిరక్షణ విషయాలను రోజువారీ జీవితంలో అమలు చేస్తానని తన ఆనందాన్ని పంచుకుంది. చిన్ననాటి నుంచే పిల్లలలో విజ్ఞాన శాస్త్రం పట్ల ఆసక్తిని రేకెత్తిస్తూ, వారిని బాధ్యతాయుతమైన పౌరులుగా తీర్చిదిద్దడమే ఈ కార్యక్రమం యొక్క ప్రాథమిక లక్ష్యం.
కామెంట్‌లు (0)