సత్తుపల్లి మండలం గంగారం గ్రామంలో తెలంగాణ సాయుధ రైతాంగ పోరాట యోధురాలు, వీరనారి చిట్యాల (చాకలి) ఐలమ్మ 131వ జయంతి వేడుకను శ్రీవీరభద్ర రజక సంఘం ఆధ్వర్యంలో శనివారం నిర్వహించారు. గ్రామంలోని చాకలి ఐలమ్మ భవనం వద్ద ఉన్న ఆమె విగ్రహానికి పలువురు పూలమాలలు వేసి ఘనంగా నివాళులు అర్పించారు. అనంతరం సంఘ నాయకులు పతాకావిష్కరణ చేశారు. ఈ వేడుకలో భాగంగా రజక సంఘ సభ్యులు, రజక కుటుంబాల సభ్యులు గ్రామంలో భారీ మోటార్‌ సైకిల్ ర్యాలీని నిర్వహించారు.

ఈ కార్యక్రమంలో గ్రామ పెద్దలు, అభివృద్ధి ప్రదాత దాసరి వెంకటరామిరెడ్డి (చిట్టి నాయన) ముఖ్య అతిథిగా పాల్గొన్నారు. శ్రీవీరభద్ర రజక సంఘం అధ్యక్షులు కొండపల్లి ఫల్గుణుడు, రజక సంఘ ప్రతినిధులు, రజక కుటుంబాల సభ్యులు, గ్రామస్తులు పెద్ద సంఖ్యలో పాల్గొని కార్యక్రమాన్ని విజయవంతం చేశారు. ఈ సందర్భంగా ప్రసంగించిన పలువురు వక్తలు భూమి, భుక్తి, వెట్టిచాకిరీ విముక్తి కోసం ఐలమ్మ చేసిన వీరోచిత పోరాటాన్ని స్మరించుకున్నారు. నైజాం నవాబులు, జమీందార్ల అరాచకాలకు వ్యతిరేకంగా ఆమె చూపిన

ధైర్యసాహసాలు తెలంగాణ చరిత్రలో సువర్ణాక్షరాలతో లిఖించబడ్డాయని కొనియాడారు. ఆమె పోరాట స్ఫూర్తిని రేపటి తరానికి అందిస్తూ, ఐలమ్మ ఆశయ సాధనకు ప్రతి ఒక్కరూ కృషి చేయాలని పిలుపునిచ్చారు.