అహంకారం, అక్రమ దందాలతో పార్టీని పాతాళంలోకి నెట్టిందే మీరు
అధినేత నిర్ణయాన్ని వ్యతిరేకించడం పార్టీ వ్యతిరేక చర్య కాదా?:కేటీఆర్ పై కవిత ఆగ్రహం
నవతెలంగాణ బ్యూరో - హైదరాబాద్
తాను ఏ విషయమైనా నిర్దిష్టమైన ఆధారాలతోనే మాట్లాడుతాననీ, తనతో పెట్టుకోవద్దని టీఆర్ఎస్ చీఫ్ కల్వకుంట్ల కవిత హెచ్చరించారు. తాను విష నాగుల చెరలో లేననీ, వారు చెప్పే మాటలు విని ఏది పడితే అది మాట్లాడబోనని స్పష్టం చేశారు. అహంకారం, అక్రమ దందాలతో బీఆర్ఎస్ ను పాతాళంలోకి నెట్టిందే మీరు.. అంటూ బీఆర్ఎస్ వర్కింగ్ ప్రెసిడెంట్ కేటీఆర్ పై ఎక్స్ వేదికగా మండిపడ్డారు. బీఆర్ఎస్ అధినేత కేసీఆర్ తీసుకున్న నిర్ణయాలతోనే అసెంబ్లీ ఎన్నికల్లో ఆ పార్టీ ఓడిపోయిందన్న కేటీఆర్ వ్యాఖ్యలపై మండిపడ్డారు. తాను బీఆర్ఎస్ లో ఒక్క అవినీతి గుంటనక్కను విమర్శిస్తే కొన్ని గంటల్లోనే తనను పార్టీ నుంచి సస్పెండ్ చేశారనీ, అదే గుంటనక్కతో అంటకాగుతూ పార్టీ అధినేత తీరును బహిరంగంగా ప్రశ్నించడం పార్టీకి వ్యతిరేకం కాదా అని ప్రశ్నించారు.
అధికారాన్ని అడ్డం పెట్టుకొని సంపాదించుకున్న ఫాం హౌస్ లు, అక్రమంగా ఇచ్చిన పర్మిషన్లు, ఆంధ్రా దోస్తులకు ఇచ్చిన నజరానాలు, క్విడ్ ప్రో కో దందాలతో పార్టీని పాతాళంలోకి నెట్టిన వారే ఇప్పుడు ఆ పార్టీ అధినేతను తప్పుపట్టడంపై కవిత మండిపడ్డారు. కూర్చున్న కొమ్మనే నరుక్కున్నట్టు పార్టీలో ఆయన వైఫల్యాన్ని, ఆయన చేతగాని తనాన్ని బీఆర్ఎస్ అధినేతపై మోపుతున్నారంటే ప్రత్యక్ష రాజకీయాల్లో మీ స్థానం ఏమిటో అర్థమవుతుందా అని ప్రశ్నించారు. గణేశ్ నిమజ్జనోత్సంలో సోషల్ మీడియా ఇన్ ఫ్ల్యూయెన్సర్లను బతిమాలుకొని పాటలు ప్లే చేయించుకున్న విషయం గణేశ్ మహరాజ్ కు.. కేటీఆర్ అంతరాత్మకు తెలుసన్నారు. తెలంగాణ భవన్ లో సోమవారం నిర్వహించిన సమావేశంలో ఒక రైతు ఫోన్ మాట్లాడుతుంటే ‘‘నీ పెండ్లామా!? అంత అర్జెంటా!?’’ అని అహంకారంతో అతని భార్యను అవమానించారని..’’ గతంలో సాయం కోసం వెళ్లిన మహిళను ‘‘నా కోసం కన్నావా’’ అని ఆమె మాతృత్వాన్ని అవమానించారని గుర్తు చేశారు. గుంటనక్క మైండ్ గేమ్ ను గుడ్డిగా నమ్ముతూ పెద్ద మనిషిని తప్పు పడుతూ బీఆర్ఎస్ పార్టీకి గోతిని తవ్వుతున్నావని హెచ్చరించారు.
కామెంట్లు (0)