బంగాళాఖాతంలో భూకంపం..

న‌వ‌తెలంగాణ‌-హైద‌రాబాద్ : ఈ రోజు ఉదయం 7:26 గంటల ప్రాంతంలో బంగాళాఖాతంలో స్వల్ప భూకంపం సంభవించింది. నేషనల్ సెంటర్ ఫర్ సీస్మోలజీ విడుదల చేసిన వివరాల ప్రకారం.. ఈ భూకంప తీవ్రత రిక్టర్ స్కేలుపై 4.2గా నమోదైంది. భూకంప కేంద్రం (ఎపిసెంటర్) బంగాళాఖాతంలో సముద్ర గర్భంలో కేవలం 10 కిలోమీటర్ల లోతులో ఉన్నట్లు గుర్తించారు. ఈ ప్రకంపనల కారణంగా తీర ప్రాంతాల్లో స్వల్ప ప్రకంపణలు నమోదయ్యాయి. అయితే దీని వలన ఎలాంటి ప్రాణ, ఆస్తి నష్టం జరిగిందనే నివేదికలు అందలేదు. బంగాళాఖాతంలో భూకంపం సంభవించినప్పటికీ, దీని తీవ్రత తక్కువగా ఉండటం, భూకంప కేంద్రం సముద్రంలో ఉండటం వలన సునామీ ముప్పు లేదని అధికారులు స్పష్టం చేశారు. ఎన్.సి.ఎస్. నివేదిక ప్రకారం, ఈ తరహా స్వల్ప భూకంపాలు తరచుగా సంభవించినప్పటికీ, తీర ప్రాంతాల ప్రజలు ఆందోళన చెందాల్సిన అవసరం లేదని, అయినప్పటికీ అప్రమత్తంగా ఉండాలని సూచించారు. తీర ప్రాంత రాష్ట్రాలైన ఆంధ్రప్రదేశ్, ఒడిశా, పశ్చిమ బెంగాల్‌లలో అధికార యంత్రాంగాలు పరిస్థితిని నిశితంగా పర్యవేక్షిస్తున్నాయి.