ఎన్టీఆర్ నగర్‌లో అంగన్వాడీ, మహిళా భవనం కోసం వినతి

ఎమ్మెల్యేకు ఐద్వా ప్రతినిధుల వినతి
త్వరలో నిర్మాణం చేపడతామని హామ
సొంత భవనం లేక ఇబ్బందులు ఎదుర్కొంటున్న చిన్నారులు, మహిళలు
నవతెలంగాణ-నాచార
నాచారం సర్కిల్ మల్లాపూర్ పరిధిలోని ఎన్టీఆర్ నగర్ కాలనీలో అంగన్వాడీ కేంద్రం మరియు మహిళా భవనం నిర్మాణం చేపట్టాలని అఖిల భారత ప్రజాతంత్ర మహిళా సంఘం (ఐద్వా) ఆధ్వర్యంలో ఎమ్మెల్యేకి వినతి పత్రం సమర్పించారు. కాలనీలో మహిళలు, చిన్నారులు ఎదుర్కొంటున్న ఇబ్బందులను వివరించి తక్షణ చర్యలు తీసుకోవాలని కోరారు.ప్రస్తుతం మహిళా సమావేశాలు నిర్వహించేందుకు ప్రత్యేక భవనం లేకపోవడంతో ప్రతి నెల సమైక్య సమావేశాలను బండ బావి కమ్యూనిటీ గ్రౌండ్‌లో నిర్వహిస్తున్నారని తెలిపారు. అలాగే అంగన్వాడీ కేంద్రానికి సొంత భవనం లేకపోవడంతో అద్దె ప్రదేశంలో, కమ్యూనిటీ హాల్ వంటగదిలో కేంద్రాన్ని నడపడం వల్ల చిన్నారులకు అనుకూల పరిస్థితులు లేక ఇబ్బందులు ఎదురవుతున్నాయని పేర్కొన్నారు.కాలనీలో బండ బావి కమ్యూనిటీ హాల్ పక్కన సుమారు 120 చదరపు గజాల స్థలం అందుబాటులో ఉండగా, అక్కడ అంగన్వాడీ కేంద్రం మరియు మహిళా భవనం నిర్మాణానికి అనుకూలంగా ఉందని వివరించారు. ఈ విషయాన్ని పలుమార్లు కార్పొరేటర్ దృష్టికి తీసుకెళ్లినా ఫలితం లేకపోయిందని ఆవేదన వ్యక్తం చేశారు.వినతిని స్వీకరించిన ఎమ్మెల్యే సమస్యపై స్పందించి, అంగన్వాడీ కేంద్రం మరియు మహిళా భవనం నిర్మాణాన్ని త్వరలోనే చేపట్టేందుకు చర్యలు తీసుకుంటామని హామీ ఇచ్చారు.ఈ కార్యక్రమంలో ఐద్వా కాప్రా సర్కిల్ కార్యదర్శి సఫియా సుల్తానా, సమైక్య ప్రెసిడెంట్ మంజుల, కే. భాగ్య, పార్వతమ్మ, ఆర్. శైలజ, ఏ. పుష్ప, ఎం. సోనీ, శారద తదితర మహిళలు పాల్గొన్నారు.