నవతెలంగాణ – హైదరాబాద్ : తమిళనాడులో జరిగిన ఘోర రోడ్డు ప్రమాదంలో ప్రముఖ బుల్లితెర నటి దేవిప్రియ త్రుటిలో ప్రాణాలతో బయటపడ్డారు. ఈ దుర్ఘటనలో ఆమె కారు డ్రైవర్ అక్కడికక్కడే మృతి చెందగా, ఆమె సహాయకుడికి తీవ్ర గాయాలయ్యాయి. వివరాల్లోకి వెలితే..నటి దేవిప్రియ (47) తన సహాయకుడు బి. దివాకర్ (46)తో కలిసి కారులో చెన్నై నుంచి థేని జిల్లాకు బయలుదేరారు. డ్రైవర్ డి. ముత్తుగణేశ్ (38) కారు నడుపుతున్నారు. చెన్నై-తిరుచ్చి జాతీయ రహదారిపై ఇరూర్ సమీపంలోకి రాగానే కారు టైరు పంక్చర్ అయింది. దీంతో డ్రైవర్ ముత్తుగణేశ్ వాహనాన్ని రోడ్డు పక్కన ఆపి టైరు మారుస్తుండగా, వేగంగా వచ్చిన గుర్తు తెలియని వాహనం వారి కారును వెనుక నుంచి బలంగా ఢీకొట్టింది.
ఈ ప్రమాదంలో డ్రైవర్ ముత్తుగణేశ్ అక్కడికక్కడే మరణించారు. కారు పక్కనే నిలబడి ఉన్న దేవిప్రియ త్రుటిలో తప్పించుకోవడంతో సురక్షితంగా బయటపడ్డారు. తీవ్రంగా గాయపడిన ఆమె సహాయకుడు దివాకర్ను చికిత్స నిమిత్తం సమీపంలోని ఆసుపత్రికి తరలించారు. సమాచారం అందుకున్న పోలీసులు ఘటనా స్థలానికి చేరుకుని, మృతదేహాన్ని పోస్టుమార్టం నిమిత్తం తరలించారు. ప్రమాదానికి కారణమైన వాహనం కోసం గాలిస్తూ, కేసు నమోదు చేసి దర్యాప్తు చేస్తున్నారు.
