చైనా సరుకులు మరింత చౌకడోనాల్డ్‌ ట్రంప్‌ నిర్ణయాలే కారణం

ఆగేయ ఆసియా నుంచి అమెరికాకు దిగుమతి అవుతున్న సరుకులపై 40శాతం వరకు సుంకం విధించాలనే ట్రంప్‌ నిర్ణయం చైనాకు అనుకూలంగా మారుతోందా? అనే ప్రశ్నకు అవుననే సమాధానం వస్తోంది. వియత్నాం, కంబోడియా, ఇండోనేషియా, భారతదేశం వంటి దేశాల ద్వారా మళ్లించబడిన వస్తువులను లక్ష్యంగా చేసుకోవడం వలన చైనా వాణిజ్య ఆధిపత్యాన్ని అరికట్టడం అటుంచి ఆ దేశానికి మేలుచేసే విధంగా ఉంది. ప్రత్యామ్నాయ కేంద్రాలలో అధిక ఖర్చులతో పోరాడుతున్న తయారీదారులు, ఎగుమతిదారులు, ఇప్పుడు ఉత్పత్తి చౌకగా, మరింత నమ్మదగినదిగా ఉన్న చైనా నుండి వైదొలగడం గురించి పునరాలోచించుకుంటున్నారు. 2017లో ట్రంప్‌ అధికారంలోకి వచ్చినప్పటి నుండి చైనా ప్లస్‌ వన్‌ వ్యాపార వ్యూహం కింద ఈ కంపెనీలు చైనా వెలుపల తమ కార్యకలాపాలను నిర్వహిస్తున్నాయి. ఈ కంపెనీలు చైనాలో ఉనికిని కొనసాగిస్తూనే, ఇతర అభివద్ధి చెందుతున్న దేశాలలో తయారీ, సరఫరా గొలుసులను స్థాపించటం జరిగింది. చైనాపై ఆధారపడటాన్ని తగ్గించడం, ఒక మార్కెట్‌లో అధిక కేంద్రీకరణతో సంబంధం ఉన్న నష్టాలను తగ్గించడం, కొత్త మార్కెట్‌లను పొందటం, వ్యయాలను తగ్గించుకోవటం వంటి లక్ష్యాలు దీని వెనుక ఉన్నాయి.
చైనా తయారీ శక్తి అమెరికాకు ముప్పుగా భావిస్తున్న ట్రంప్‌ ఆగేయాసియా అంతటా ట్రాన్స్‌ షిప్‌ చేయబడిన వస్తువులపై 40 శాతం వరకు సుంకాలు విధించడంతో ఆయా దేశాలలో తయారవుతున్న సరుకులు చైనాలో తయారయ్యే సరుకులతో పోటీపడజాలని స్థితిలోకి నెట్టబడుతున్నాయి. ఈ పరిణామం అధిక సుంకాల కారణంగా ఆగేయాసియా ఉత్పత్తి తగ్గిందని, తయారీ దారులు చైనాకు తిరిగి వెళ్లాల్సి వచ్చిందని సూచిస్తుంది. ఆవిధంగా ట్రంప్‌ తనకు తెలియకుండానే చైనాకు లబ్దిచేకూరేలా చేస్తున్నాడు. గత వారం విడుదల చేసిన చైనా కస్టమ్స్‌ డేటా ప్రకారం, ఏప్రిల్‌లో చైనా అవుట్‌బౌండ్‌ వాణిజ్య విలువ గత సంవత్సరంతో పోలిస్తే 8శాతం పెరిగింది. జనవరిలో డొనాల్డ్‌ ట్రంప్‌ తిరిగి అధికారంలోకి వచ్చినప్పటి నుండి నిపుణులు ఇక్కడ స్థిరమైన పెరుగుదల ధోరణిని చూస్తున్నారు.
ట్రంప్‌ చర్య వాస్తవానికి చైనాకు అనుకూలంగా ఉందని నిరూపించడానికి, కొనసాగుతున్న వాణిజ్య యుద్ధం ఉన్నప్పటికీ దాని స్థూల జాతీయోత్పత్తి ఏప్రిల్‌ నుంచి జూన్‌ 2025 వరకు 5.2 శాతం పెరిగింది. సంక్షిప్తంగా చెప్పాలంటే, ట్రంప్‌ సుంకాల కుట్ర చివరికి చైనా ఫ్యాక్టరీలను మరింత పోటీతత్వంతో తయారు చేసింది. మేక్‌ అమెరికాను గ్రేట్‌ ఎగైన్‌ చేయడం మర్చిపోండి, ట్రంప్‌ చైనాను మళ్లీ చౌకగా మారుస్తున్నాడు.
అమెరికాలో విదేశీ విద్యార్థుల నమోదులో 30-40 శాతం పతనం
అమెరికా అధ్యక్షుడు డోనాల్డ్‌ ట్రంప్‌ వలసలపై కఠిన చర్యలు తీసుకోవటం, వీసా నిబంధనలను అత్యంత కఠినతరం చేసిన పర్యవసానంగా సెప్టెంబర్‌లో ప్రారంభమయ్యే రాబోయే విద్యా సెషన్‌ కోసం అమెరికన్‌ విశ్వవిద్యాలయాలలో విదేశీ విద్యార్థుల నమోదులో 30 నుంచి 40 శాతం తగ్గుదల కనిపించే అవకాశం ఉందని అంతర్జాతీయ విద్యావేత్తల సంఘం అయిన ఎన్‌ఏఎఫ్‌ఎస్‌ఏ అంచనా వేసింది. 2025/26 విద్యా సంవత్సరానికి కావలసిన మొత్తం నమోదులో 15 శాతం తగ్గుదల ఉంటుందని సర్వే అంచనా వేసింది. ఇది మునుపటి సంవత్సరంతో పోలిస్తే 1,50,000 మంది విద్యార్థుల నష్టాన్ని సూచిస్తుంది. ఉన్నత విద్యకు ప్రపంచ కేంద్రంగా చాలా కాలంగా తనను తాను అంచనా వేసుకున్న దేశానికి చెందిన విద్యాసంస్థలలో అంతర్జాతీయ విద్యార్థులు నమోదు కావటంలో ఏర్పడిన తగ్గుదల అమెరికా విద్యపట్ల సంభవించిన మార్పును సూచిస్తుంది. అంతర్జాతీయ విద్యార్థుల నమోదులో తగ్గుదల కారణంగా అమెరికాలోని స్థానిక ఆర్థిక వ్యవస్థలకు వి7 బిలియన్ల నష్టం వాటిల్లే అవకాశం ఉంది. అలాగే అమెరికా అంతటా 60,000 కంటే ఎక్కువ ఉద్యోగాల తొలగింపుకు ఇది దారితీస్తుందని పరిశోధకులు తెలిపారు. కోవిడ్‌-19 మహమ్మారి తర్వాత ఇటీవలి కాలంలో అంతర్జాతీయ నమోదులో అత్యంత ముఖ్యమైన తగ్గుదలలలో ఇది ఒకటి అని ఎన్‌ఏఎఫ్‌ఎస్‌ఎ సీఈవో ఫాంటా ఆవ్‌ పేర్కొన్నారు. అయితే, ఇప్పటికి, అప్పటికి మధ్య ఒక ప్రధాన వ్యత్యాసం ఏమిటంటే, ఈ నష్టాలు స్వయం సృష్టి అని ఆమె అన్నారు. ఈ సంవత్సరం మార్చి, ఏప్రిల్‌ నెలల్లో కొత్త నియామ కాలను సుదీర్ఘంగా నిలిపివేయడం వల్ల ఏర్పడిన వీసా ప్రాసెసింగ్‌ బ్యాక్‌లాగ్‌ తగ్గుదలకు ప్రధాన కారణమని సర్వే కనుగొంది. శరదతువు(ఫాల్‌) సెమిస్టర్‌ కోసం వీసాలు కోరుకునే విద్యార్థులకు వసంతకాలం కీలకమైన సమయం. కొన్ని అమెరికా రాయబార కార్యాలయాలు ఇంకా నియామకాలను షెడ్యూల్‌ చేయడం ప్రారంభించలేదు. ఈ అంతరాయానికి తోడుగా కాన్సులర్‌ అధికారులను విద్యార్థి వీసా దరఖాస్తుదారులను కఠినమైన సోషల్‌ మీడియా స్క్రీనింగ్‌ నిర్వహించాలని అమెరికా విదేశాంగ కార్యదర్శి, మార్కో రూబియో ఆదేశించారు. ఈ ప్రకటన తర్వాత, ట్రంప్‌ పరిపాలన కాన్సులేట్‌లకు బ్యాక్‌లాగ్స్‌ను నిర్వహిం చడంలో లేదా మరింత భారమైన పరిశీలన విధానాలను నిర్వహించడంలో సహాయం చేయడానికి అదనపు సిబ్బంది సామర్థ్యాన్ని మంజూరు చేయలేదని పరిశోధకులు గుర్తిం చారు. కాన్సులర్‌ అధికారులు దేని కోసం తనిఖీ చేస్తున్నారో పారదర్శకత లేదు. ఇది విద్యార్థులలో గందరగోళం, అనిశ్చితిని మరింత పెంచుతుంది అని వారు చెప్పారు. వీసా అపాయింట్‌మెంట్‌ రద్దు లేదా లభ్యత లేకపోవడం గురించి అత్యధిక నివేదికలు కలిగిన రాయబార కార్యాలయాలు, కాన్సులేట్‌లలో భారతదేశం, నైజీరియా, ఘనా, చైనా, దక్షిణ కొరియా, జపాన్‌ ఉన్నాయి. ఇవి అమెరికాకు అత్యధిక విద్యార్థులను పంపే దేశాలు. ఈ నేపథ్యంలో అంతర్జాతీయ విద్యార్థులు అమెరికాకు బదులుగా బ్రిటన్‌, కెనడా, ఆస్ట్రేలియా, చైనా, జర్మనీ వంటి దేశాలను ఆశ్రయిస్తున్నారని ఎన్‌ఏఎఫ్‌ఎస్‌ఎ నివేదిక పేర్కొంది.
– నెల్లూరు నరసింహరావు