నవతెలంగాణ – హైదరాబాద్: టీమిండియా సీనియర్ స్టార్లు విరాట్ కోహ్లీ, రోహిత్ శర్మల భవిష్యత్తుపై సోషల్ మీడియాలో జరుగుతున్న ఊహాగానాలకు బీసీసీఐ గట్టిగా బదులిచ్చింది. వారిద్దరికీ వీడ్కోలు సిరీస్ నిర్వహించాలన్న డిమాండ్లను తోసిపుచ్చింది. టీ20, టెస్టు ఫార్మాట్ల నుంచి ఇప్పటికే తప్పుకున్న ఈ దిగ్గజ ఆటగాళ్లు ప్రస్తుతం కేవలం వన్డేలకు మాత్రమే పరిమితమయ్యారు. సుదీర్ఘ విరామం తర్వాత అక్టోబర్‌లో ఆస్ట్రేలియాతో జరిగే వన్డే సిరీస్‌లో బరిలోకి దిగనున్నారు. ఈ నేపథ్యంలో వారి భవిష్యత్తుపై జరుగుతున్న చర్చకు బీసీసీఐ ఉపాధ్యక్షుడు రాజీవ్ శుక్లా తనదైన శైలిలో స్పందించి తెరదించారు.
యూపీటీ20 లీగ్ సందర్భంగా ఒక పాడ్‌కాస్ట్‌లో మాట్లాడుతూ, సచిన్ టెండూల్కర్‌కు ఇచ్చినట్లుగా కోహ్లీ, రోహిత్‌లకు కూడా వీడ్కోలు సిరీస్ ఇవ్వాలన్న ప్రశ్నకు ఆయన కాస్త ఘాటుగానే స్పందించారు. “అసలు వాళ్లు ఎప్పుడు రిటైర్ అయ్యారు? విరాట్ కోహ్లీ, రోహిత్ శర్మ ఇద్దరూ వన్డేలు ఆడతారు. వాళ్లు ఆడుతున్నప్పుడు వీడ్కోలు సిరీస్ గురించి మీరెందుకు ఆందోళన చెందుతున్నారు? అవును, వారు రెండు ఫార్మాట్ల నుంచి తప్పుకున్నారు. కానీ, వన్డేల్లో కొనసాగుతున్నారు కదా? దీని గురించి ఎక్కువగా ఆలోచించాల్సిన అవసరం లేదు” అని ఆయన స్పష్టం చేశారు.
బీసీసీఐ విధానాన్ని వివరిస్తూ, “మేం ఏ ఆటగాడినీ రిటైర్ అవ్వమని చెప్పం. అది పూర్తిగా వారి వ్యక్తిగత నిర్ణయం. ఎప్పుడు తప్పుకోవాలో ఆటగాడే నిర్ణయించుకోవాలి. దాన్ని మేం గౌరవిస్తాం. విరాట్ కోహ్లీ అత్యంత ఫిట్‌గా ఉన్నాడు. రోహిత్ శర్మ అద్భుతంగా ఆడుతున్నాడు. అలాంటిది వారి వీడ్కోలు గురించి ఇప్పుడే ఎందుకు?” అని శుక్లా ప్రశ్నించారు.
మరోవైపు, వన్డే జట్టులో చోటు దక్కించుకోవాలంటే కోహ్లీ, రోహిత్ దేశవాళీ టోర్నీ అయిన విజయ్ హజారే ట్రోఫీలో ఆడాలంటూ వస్తున్న వాదనలను భారత మాజీ ఓపెనర్ ఆకాశ్ చోప్రా కొట్టిపారేశారు. “విజయ్ హజారే ట్రోఫీలో ప్రదర్శన ఆధారంగా వారిని ఎంపిక చేయరు. అదంతా అర్థం లేని చర్చ. నిజం చెప్పాలంటే, వాళ్లు వన్డేల కన్నా టెస్టులు ఆడుతూ ఉండి ఉంటే ఫామ్‌ను కొనసాగించడం మరింత సులభంగా ఉండేది” అని తన యూట్యూబ్ ఛానెల్‌లో అభిప్రాయపడ్డాడు.
భారత జట్టు ఫిబ్రవరిలో ఛాంపియన్స్ ట్రోఫీ తర్వాత మళ్లీ అక్టోబర్‌లో ఆస్ట్రేలియాతో వన్డే సిరీస్ ఆడనుంది. ఆ తర్వాత నవంబర్‌లో దక్షిణాఫ్రికాతో, 2026 జనవరిలో న్యూజిలాండ్‌తో సిరీస్‌లు జరగనున్నాయి. ఈ సుదీర్ఘ విరామమే సీనియర్ ఆటగాళ్ల భవిష్యత్తుపై అనేక ఊహాగానాలకు తావిస్తోంది. అయితే, బీసీసీఐ తాజా ప్రకటనతో ఈ చర్చలకు ప్రస్తుతానికి తెరపడినట్లయింది.
