బెల్‌గ్రేడ్‌ : సెర్బియా ప్రధాని పదవికి పోటీ పడిన మాజీ అధ్యక్షుడు అలెగ్జాండర్‌ ఉసిక్‌ పార్లమెంట్‌ ఎన్నికల్లో విద్యార్ధుల నేతృత్వంలోని 'స్టూడెంట్‌ లిస్ట్‌' చేతిలో పరాజయం పాలయ్యారు. సెర్బియాలో విద్యార్థుల నేతృత్వంలో జరిగిన నిరసనలు, నోవీ సాద్‌ రైల్వే స్టేషన్‌ దుర్ఘటన నేపథ్యంలో వచ్చిన రాజకీయ ఒత్తిడుల కారణంగా ఆయన సెప్టెంబరులో అధ్యక్ష పదవికి రాజీనామా చేసి, తాజాగా జరిగిన ముందస్తు ఎన్నికల్లో ప్రధాని అభ్యర్థిగా పోటీ చేశారు. అయితే ఆయన నేతృత్వంలోని కూటమి స్టూడెంట్‌ లిస్ట్‌ చేతిలో ఓటమి పాలైంది. సెర్బియా రాజకీయాలను దశాబ్ద కాలానికి పైగా శాసించిన ఉసిక్‌కు ముందస్తు పార్లమెంట్‌ ఎన్నికల్లో భంగపాటు ఎదురైంది. ఆదివారం జరిగిన ఎన్నికల్లో ఆయన తన ఓటమిని అంగీకరించారు. 'ఈ ఎన్నికల్లో మేము పరాజయం పాలయ్యామన్నది స్పష్టమైంది' అని సెర్బియన్‌ ప్రోగ్రెసివ్‌ పార్టీ (ఎస్‌ఎన్‌ఎస్‌) నేత ఉసిక్‌ వ్యాఖ్యానించారు. 250 మంది సభ్యులున్న సెర్బియా పార్లమెంటులో స్టూడెంట్‌ లిస్ట్‌కు 135 నుంచి 140 స్థానాలు, ఎస్‌ఎన్‌ఎస్‌కు 105 స్థానాలు లభిస్తాయని ప్రాథమిక అంచనా. 2024 నవంబర్‌ 1న నోవీ సాద్‌ నగరంలోని ఓ రైల్వే స్టేషన్‌ కూలిపోవడంతో 16 మంది ప్రాణాలు కోల్పోయారు. ఈ ఘటనకు నిరసనగా విద్యార్థులు పెద్ద ఎత్తున ఆందోళన ప్రారంభించారు. ఆ తర్వాత విద్యార్థుల నేతృత్వంలో రాజకీయ పార్టీ ఆవిర్భవించి ఎన్నికల బరిలో దిగింది.
వర్గాలు
Magazines
హోమ్
కామెంట్‌లు (0)