మరాఠిలోనూ ‘బ్యాండ్‌ మేళం’

హర్ష్‌ రోషన్‌, శ్రీదేవీ జంటగా రచయిత కోన వెంకట్‌ నిర్మాణ సారథ్యంలో వచ్చిన చిత్రం ‘బ్యాండ్‌ మేళం’. మ్యాంగో మాస్‌ మీడియా సమర్పణలో కోన ఫిల్మ్‌ కార్పొరేషన్‌ బ్యానర్‌ మీద కావ్య, శ్రావ్య నిర్మించారు. సతీష్‌ జవ్వాజీ దర్శకత్వంలో తెరకెక్కిన ఈ మూవీ మార్చి 26న విడుదలై సక్సెస్‌ఫుల్‌గా రన్‌ అవుతోంది. ఈ క్రమంలో మేకర్స్‌ జారుఫుల్‌ బ్లాక్‌బస్టర్‌ థ్యాంక్యూ మీట్‌ను నిర్వహించారు.
కోన వెంకట్‌ మాట్లాడుతూ,’చెన్నై బీచ్‌లో ఓసారి కాళ్లు, చేతులు లేని ఓ అమ్మాయి బెలూన్స్‌ అమ్ముకుంటూ కనిపించింది. ఆ టైంలో నేను ఆత్మహత్య చేసుకోవాలని అనుకున్నాను. అలాంటప్పుడే ఆ అమ్మాయిని చూశాను. కాళ్లు, చేతులు లేకపోయినా, రేపటి భవిష్యత్తు ఏంటో తెలియక పోయినా ఆ అమ్మాయి హాయిగా బతికేస్తోంది.. నేను ఎందుకు చనిపోవాలి? అని అనుకున్నాను. ఆ తరువాత రైటర్‌గా మారి ఎన్నో సినిమాలు రాశాను. నిర్మాతగా ఎంతో మందిని పరిచయం చేశాను. ఇదంతా కూడా ఆ అమ్మాయి వల్లే సాధ్యమైంది. పది మందిలో ఒకరికి నచ్చకపోవచ్చు. ఆ ఒక్కరి గురించి పట్టించుకోవద్దని టీంకు చెప్పాను. ఎన్నో కష్టాలు దాటుకుని ఈ సినిమా హిట్టుగా నిలిచింది. ప్రేక్షకుల వల్లే ఇంత పెద్ద విజయం సాధించింది. థియేటర్లోకి వెళ్లినప్పుడు ఆడియెన్స్‌ మొహంలో ఓ సంతప్తిని చూశాను. రోషన్‌, శ్రీదేవీ ఇలా ఎంతో మంది లైఫ్‌ ఈ చిత్రంతో ముడి పడి ఉంది. వీళ్ళిద్దరూ క్లైమాక్స్‌లో కంటతడి పెట్టించేశారు. ఈ సినిమాలోని ప్రతీ ఒక్కరూ తమ తమ పాత్రల్లో జీవించేశారు. ఇందులో నటించిన ప్రతీ ఒక్కరికీ ఇకపై ఆడిషన్స్‌ అవసరం లేదు.. ‘బ్యాండ్‌ మేళం’ విజిటింగ్‌ కార్డ్‌లా ఉంటుంది. ఈ మూవీని మరాఠీలోనూ రిలీజ్‌ చేయబోతోన్నాం’ అని చెప్పారు.