కోటెక్నా గ్రూప్‌ చేతికి ఎనర్జాన్ ల్యాబ్స్‌.. భారత్‌లో ఫార్మా టెస్టింగ్ సేవలు మరింత విస్తరణ

నవతెలంగాణ - హైదరాబాద్‌: టెస్టింగ్‌, ఇన్‌స్పెక్షన్‌, సర్టిఫికేషన్‌ (TIC) సేవల్లో ప్రముఖ సంస్థగా ఉన్న కోటెక్నా (Cotecna), హైదరాబాద్‌కు చెందిన ఎనర్జాన్ ల్యాబ్స్‌ (Energon Labs)ను కొనుగోలు చేసినట్లు ప్రకటించింది. cGMP ప్రమాణాలకు అనుగుణంగా పనిచేస్తూ, అమెరికా ఫుడ్‌ అండ్‌ డ్రగ్‌ అడ్మినిస్ట్రేషన్‌ (USFDA) తనిఖీలు నిర్వహించిన ఈ ల్యాబ్‌కు ISO 9001:2015, ISO 17025:2017 సర్టిఫికేషన్లు ఉన్నాయి. ఈ కొనుగోలుతో కోటెక్నా అంతర్జాతీయ లైఫ్‌ సైన్సెస్‌ విభాగం మరింత బలోపేతం కానుంది. ఫార్మాస్యూటికల్స్‌, బయోఫార్మాస్యూటికల్స్‌, వైద్య పరికరాలు, ప్యాకేజింగ్‌ రంగాల్లో టెస్టింగ్‌ సేవలు విస్తరించనున్నాయి.

భారత్‌, అమెరికా, ఆసియా పసిఫిక్‌, మధ్యప్రాచ్య దేశాల్లోని కస్టమర్లకు ఎనర్జాన్ సేవలు అందిస్తోంది. శాస్త్రీయ నైపుణ్యం, నియంత్రణ ప్రమాణాలపై అవగాహన, నాణ్యతకు ప్రాధాన్యం ఇవ్వడం ద్వారా ఈ సంస్థ గుర్తింపు పొందింది. ప్రపంచంలోని ప్రముఖ ఫార్మా, బయోటెక్నాలజీ కేంద్రాల్లో ఒకటైన హైదరాబాద్‌లో ఉండటం ఎనర్జాన్‌కు కలిసొచ్చే అంశం. ఇక్కడి నైపుణ్యం కలిగిన శాస్త్రవేత్తలు, ఆధునిక ల్యాబ్‌ సదుపాయాలు, బలమైన ఫార్మా రంగం కోటెక్నాకు ఉపయోగపడనున్నాయి.

ప్రపంచంలో వేగంగా అభివృద్ధి చెందుతున్న ఫార్మా మార్కెట్లలో భారత్‌ ఒకటి. అంతర్జాతీయ ఆరోగ్య సంరక్షణ సరఫరా వ్యవస్థకు అవసరమైన ఔషధాల తయారీలోనూ భారత్‌ కీలక కేంద్రంగా ఉంది. ఈ నేపథ్యంలో ఎనర్జాన్‌ కొనుగోలు ద్వారా భారతీయ, అంతర్జాతీయ కస్టమర్లకు నాణ్యమైన, నియంత్రణ ప్రమాణాలకు అనుగుణమైన టెస్టింగ్‌ సేవలను మరింత సమర్థంగా అందించే అవకాశం కోటెక్నాకు లభించనుంది. ప్రధాన మార్కెట్లలో వేగంగా సేవలు అందించడం, కార్యకలాపాలను విస్తరించడం, సామర్థ్యాన్ని పెంచుకోవడం కూడా సులభం కానుంది.

కోటెక్నా ఇప్పటికే కోటెక్నా లైఫ్‌ సైన్సెస్‌, శివ అనలిటికల్స్‌, నియోట్రాన్‌ ఫార్మా సంస్థలతో ఫార్మా టెస్టింగ్‌ సేవలను విస్తరిస్తోంది. తాజాగా ఎనర్జాన్‌ చేరడంతో ఈ నెట్‌వర్క్‌ మరింత బలపడనుంది. ఉత్పత్తి తయారీ నుంచి మార్కెట్లోకి చేరే వరకు వివిధ దశల్లో కస్టమర్లకు సేవలు అందించడంతో పాటు, ప్రపంచవ్యాప్తంగా మారుతున్న నాణ్యత, నిబంధనలు, నియంత్రణ ప్రమాణాలకు అనుగుణంగా పనిచేయడానికి ఈ విస్తరణ ఉపయోగపడనుంది.

ఎనర్జాన్‌ ల్యాబ్స్‌ అందించే సేవల్లో అనలిటికల్‌ పద్ధతుల అభివృద్ధి, ధ్రువీకరణ, స్థిరత్వ పరీక్షలు, మలినాల విశ్లేషణ, ప్యాకేజింగ్‌ నుంచి పదార్థాలు వెలువడటం, గాజు పొరలు విడిపోవడంపై అధ్యయనాలు, పెప్టైడ్లు, ఒలిగోన్యూక్లియోటైడ్ల విశ్లేషణ ఉన్నాయి. వీటితో పాటు ముడి పదార్థాలు, తుది ఉత్పత్తుల పరీక్షలు, ఇన్‌-విట్రో బైండింగ్‌ అధ్యయనాలు, ప్యాకేజింగ్‌ అనుకూలత పరీక్షలు, నియంత్రణ పరమైన సలహా సేవలను కూడా అందిస్తోంది. ఈ నైపుణ్యాలు ప్రపంచవ్యాప్తంగా నియంత్రణ ప్రమాణాలు కఠినంగా ఉన్న మార్కెట్లకు ఔషధాలను సరఫరా చేసే తయారీ సంస్థలకు కోటెక్నా విశ్వసనీయ భాగస్వామిగా నిలవడానికి తోడ్పడనున్నాయి.

కోటెక్నా గ్రూప్‌ సీఈఓ సెబాస్టియన్‌ డన్నాడ్‌ ఏమన్నారంటే..

“ఎనర్జాన్‌ ల్యాబ్స్‌ కోటెక్నా గ్రూప్‌లో చేరడం సంతోషంగా ఉంది. భారత్‌లో లైఫ్‌ సైన్సెస్‌ టెస్టింగ్‌ సేవలు అందించే అతిపెద్ద సంస్థల్లో ఒకటిగా ఎదగాలన్న మా లక్ష్యానికి ఈ కొనుగోలు మరో కీలక అడుగు. ప్రపంచంలోని ముఖ్యమైన ఫార్మా మార్కెట్లలో ఒకటైన భారత్‌లో మా స్థానాన్ని మరింత బలోపేతం చేసుకోవడానికి ఇది దోహదపడుతుంది” అని సెబాస్టియన్‌ డన్నాడ్‌ తెలిపారు.

దక్షిణాసియా, మధ్యప్రాచ్య విభాగాల సీఈఓ అమిత్‌ చోప్రా మాట్లాడుతూ..

“మణికాంత్‌ రెడ్డి, ఎనర్జాన్‌ ల్యాబ్స్‌ నైపుణ్యం కలిగిన బృందానికి కోటెక్నా గ్రూప్‌లోకి స్వాగతం పలకడం ఆనందంగా ఉంది. కీలకమైన వృద్ధి మార్కెట్లలో సమగ్ర ఫార్మా టెస్టింగ్‌ వ్యవస్థను నిర్మించాలన్న మా వ్యూహానికి ఈ కొనుగోలు పూర్తిగా సరిపోతుంది. ఎనర్జాన్‌కు ఉన్న సాంకేతిక నైపుణ్యం, అనుభవజ్ఞులైన సిబ్బంది, కస్టమర్లతో బలమైన సంబంధాలు భారత్‌తో పాటు ప్రపంచవ్యాప్తంగా ఉన్న ఫార్మా, బయోఫార్మా, వైద్య పరికరాల సంస్థలకు మెరుగైన సేవలు అందించడానికి ఉపయోగపడతాయి. ఫార్మా, ఆరోగ్య సంరక్షణ రంగాల మారుతున్న అవసరాలను తీర్చేందుకు రెండు సంస్థలు కలిసి మరింత బలమైన వేదికను నిర్మిస్తున్నాయి” అని అమిత్‌ చోప్రా పేర్కొన్నారు.

ఎనర్జాన్‌ వ్యవస్థాపకుడు మణికాంత్‌ రెడ్డి మాట్లాడుతూ..

“కోటెక్నా గ్రూప్‌లో చేరడం ఎనర్జాన్‌ ల్యాబ్స్‌కు కొత్త అవకాశాలతో కూడిన అధ్యాయం. నాణ్యత, శాస్త్రీయ నైపుణ్యం, విశ్వసనీయతకు పేరుగాంచిన ల్యాబ్‌ను నిర్మించడంపై మేము ఇన్నాళ్లూ దృష్టి పెట్టాం. కోటెక్నా వంటి అంతర్జాతీయ సంస్థలో భాగం కావడం వల్ల మా సామర్థ్యాలను మరింత విస్తరించడానికి, సేవలను మెరుగుపరచడానికి, కస్టమర్లకు మరింత విలువైన సేవలు అందించడానికి కొత్త అవకాశాలు లభిస్తాయి. లైఫ్‌ సైన్సెస్‌ రంగం అభివృద్ధికి తోడ్పడుతూ, విశ్లేషణాత్మక పరీక్షల్లో అత్యున్నత ప్రమాణాలను కొనసాగించడానికి మా బృందం కట్టుబడి ఉంది” అని మణికాంత్‌ రెడ్డి తెలిపారు.

ఎనర్జాన్‌ ల్యాబ్స్‌ గురించి..

హైదరాబాద్‌లో ఉన్న ఎనర్జాన్‌ ల్యాబ్స్‌ cGMP ప్రమాణాలకు అనుగుణంగా పనిచేసే, USFDA తనిఖీలు నిర్వహించిన, ISO 9001:2015, ISO 17025:2017 సర్టిఫికేషన్లు పొందిన అనలిటికల్‌ టెస్టింగ్‌ ల్యాబ్‌. ఫార్మా, బయోఫార్మా, వైద్య పరికరాలు, ప్యాకేజింగ్‌ రంగాలకు సమగ్ర పరీక్షలు, నాణ్యత హామీ, నియంత్రణ పరమైన సహాయ సేవలను అందిస్తోంది. భారత్‌, అమెరికా, ఆసియా పసిఫిక్‌, మధ్యప్రాచ్య ప్రాంతాల్లోని కస్టమర్లకు సేవలు అందిస్తోంది.

కోటెక్నా గ్రూప్‌ గురించి..

1974లో స్విట్జర్లాండ్‌లో ప్రారంభమైన కోటెక్నా గ్రూప్‌ టెస్టింగ్‌, ఇన్‌స్పెక్షన్‌, సర్టిఫికేషన్‌ సేవల్లో ప్రముఖ సంస్థగా ఎదిగింది. ప్రపంచవ్యాప్తంగా 55కు పైగా దేశాల్లో కార్యకలాపాలు నిర్వహిస్తోంది. అంతర్జాతీయ సరఫరా వ్యవస్థల్లో నాణ్యత, భద్రత, నిబంధనల అమలు, స్థిరత్వాన్ని నిర్ధారించడంలో కస్టమర్లకు సహకరిస్తోంది. వ్యవసాయం, ఆహారం, ఫార్మాస్యూటికల్స్‌, ఖనిజాలు, లోహాలు, వినియోగ వస్తువులు, సర్టిఫికేషన్‌, పర్యావరణ, సామాజిక, పాలన (ESG) సేవలు వంటి విభిన్న రంగాలకు ప్రపంచవ్యాప్తంగా ఉన్న నిపుణులు, ల్యాబ్‌లు, సాంకేతిక నిపుణుల నెట్‌వర్క్‌ ద్వారా సేవలు అందిస్తోంది.