నవతెలంగాణ-హైదరాబాద్: ఉత్తర ప్రదేశ్లో అధికార బీజేపీకి చెందిన ఎమ్మెల్యే దారుణానికి పాల్పడ్డాడు. ఒక వ్యక్తిని కిడ్నాప్ చేసి, మూత్రంపోసి, దుస్తులు ఊడదీసి, దాడి చేశాడు. ఈ ఘటన కొత్వాలి ఖలిలాబాద్ పోలీస్ స్టేషన్ పరిధిలో శుక్రవారం రాత్రి 11.00 గంటల సమయంలో జరిగింది.
లక్నోలో ఒక ప్రాపర్టీని తన పేరున రిజిష్టర్ చేసే విషయంలో ఎమ్మెల్యేకు, బాధితుడికి మధ్య వివాదం చెలరేగింది. దీంతో బాధితుడిని శుక్రవారం రాత్రి కిడ్నాప్ చేశారు. అతడు ఒక డిన్నర్ కు వెళ్లి తిరిగి వస్తుండగా.. రెండు స్కార్పియో వాహనాల్లో వచ్చిన దుండగులు.. అతడిని కిడ్నాప్ చేసి గోరఖ్ పూర్, సహ్జన్వా ప్రాంతానికి తీసుకెళ్లారు. అక్కడ ఎమ్మెల్యే సోదరుడు తన అనుచరులతో కలిసి బాధిత వ్యక్తిపై దాడి చేశారు. దుస్తులు ఊడదీసి, మూత్రం పోశారు. ఒంటిపై విచక్షణారహితంగా దాడికి పాల్పడ్డారు. ఈ ఘటన మొత్తాన్ని ఎమ్మెల్యే వీడియో కాల్ లో చూశాడని బాధితుడు ఆరోపించాడు. కేసు నమోదు చేసుకున్న పోలీసులు విచారణ జరుపుతున్నట్లు తెలిపారు. మరోవైపు బాధితుడి కుటుంబ సభ్యులు పోలీస్ స్టేషన్ ముందు ఆందోళన చేశారు.
