పీఏసీఎస్ భాగస్వామ్యంతో సాగు విస్తీర్ణం పెంపు
నవతెలంగాణ – మల్హర్ రావు
రైతులకు దీర్ఘకాలిక ఆదాయం అందించే పంటల సాగును కేంద్ర-రాష్ట్ర ప్రభుత్వాలు ప్రోత్సహిస్తున్నాయి. ఇందులో భాగంగా కాటారం డివిజన్ లో మూడేళ్లుగా ఆయిల్పామ్ సాగవుతోంది. ఒకసారి నాటితే 30 ఏళ్లు ఆదాయం వచ్చే ఈ పంటపై రైతుల్లో సరైన అవగాహన లేకపోవడంతో ఇంకా సాగు ఆశించిన స్థాయిలో జరగడం లేదు. వ్యవసాయ, ఉద్యాన, సహకారశాఖలు ఈ సమస్యను పరి ష్కరించడానికి ప్రణాళికలు సిద్దం చేశాయి. ప్రాథమిక సహకార సంఘాల (పీఏసీఎస్) భాగస్వామ్యంతో సాగువిస్తీర్ణం పెంచాలని అధికారులు నిర్ణయించారు.
ఒక్కో సొసైటీకి 100 ఎకరాలు..
ఒక్కో పీఏసీఎస్ పరిధిలో కనీసం 100 ఎకరాల్లో ఆయిల్పామ్ సాగు ఉండాలని లక్ష్యంగా పెట్టుకు న్నామని ఉద్యానవన డివిజన్ అధికారి మణి,తాడిచెర్ల పీఏసిఎస్ చైర్మన్ ఇప్ప మొoడయ్య,సిఈఓ సంతోష్ తెలిపారు. సొసైటీలో సభ్యులైన రైతులతో సమావేశాలు నిర్వహించి పంట లాభాలపై అవగాహన కల్పిస్తామని పేర్కొన్నారు. మహాదేవపూర్ డివిజన్ లో ప్రస్తుతం 4 ప్రాథమిక సహకార సంఘాలు ఉన్నాయి. డివిజన్ వ్యాప్తంగా 892 ఎకరాల్లో 265 మంది,మండల వ్యాప్తంగా 309 ఎకరాల్లో 93మంది రైతులు ఈ పంట సాగు చేస్తున్నారు.ఈ రైతులకు ప్రభుత్వం రాయితీలు అందిస్తోంది.
ఒక మొక్క ధర రూ.193 ఉండగా, సబ్సిడీపై కేవలం రూ.20కే అందిస్తుంది. ఎకరంలో సగటున 50-55 మొక్కలు నాటేందుకు అవసరం అవుతాయి. ఈ మేరకు రూ.10,615 విలువైన మొక్కలను కేవలం రూ. 1,100లకే రైతులకు అందిస్తోంది. అందిస్తోంది. అలాగే బిందు సేద్యం పరికరాలను రాయితీతో అందిస్తూ, ఎకరానికి రూ.4,200 చొప్పున నాలుగేళ్ల పాటు నగదు ప్రోత్సాహకం ఇస్తోంది. అదనంగా పవర్ టిల్లర్లు, బ్రష్ కట్టర్లు ఎస్సీ, ఎస్టీ రైతులకు 50 శాతం, బీసీ రైతులకు 40 శాతం సబ్సిడీతో అందిస్తున్నారు.
సాగు విస్తీర్ణం పెంపునకు కృషి: వై.మణి… డివిజన్ హర్టీకల్సర్ అధికారి
ప్రభుత్వ సూచనల మేరకు డివిజన్ లో ఆయిల్ పామ్ సాగు విస్తీర్ణం పెంచేందుకు చర్యలు చేపడుతున్నాం. ప్రాథమిక సహకార సంఘాల సమన్వయంతో ముందుకు సాగుతున్నాం. ఈ మేరకు రైతులను అన్ని విధాలా ప్రోత్సహిస్తాం. 2025-26 ఆర్థిక సంవత్సరంలో డివిజన్ లో 1500 ఎకరాలు ప్లాoటేషన్ లక్ష్యం ఉండగా ఇప్పటికి 123 ఎకరాల్లో 36 రైతులు పంటను వేశారు. ఇప్పటికే డివిజన్ లో 53.6 ఎకరాల్లో 17 మంది రైతులు పంటను కోత ప్రారంభించారు.
