నవతెలంగాణ-హైదరాబాద్: పాఠ్య పుస్తకాల్లో తనకు అనుకూలమైన మార్పులను చొప్పించే పనిని మోడీ ప్రభుత్వం చాలా కాలంగా చేస్తోంది. ఎప్పటికప్పుడు విద్యావేత్తలు, మేధావుల నుంచి అభ్యంతరాలు వ్యక్తమవుతున్నా వాటిని లక్ష్యపెట్టకుండా ముందుకెళుతోంది. తాజాగా జాతీయ విద్యా విధానానికి అనుగుణంగా సవరించబడిన జాతీయ విద్య, పరిశోధనా మండలి (ఎన్‌సిఇఆర్‌టి) కొత్త పాఠ్యపుస్తకం మొఘల్ శకాన్ని క్రూరమైన కాలంగా వక్రీకరిస్తుంది. ‘అక్బర్ ప్రజలను ఊచకోత కోసిన పాలకుడు, ఔరంగజేబు దేవాలయాలు, గురుద్వారాలను నాశనం చేశాడు’ అని 8వ తరగతికి సంబంధించిన కొత్త సాంఘిక శాస్త్ర పాఠ్యపుస్తకం మొఘల్ శకాన్ని ఇలా వర్ణిస్తుంది. చరిత్రలో చీకటి కాలంగా వర్ణించే విభాగంలో ‘నేటి సంఘటనలకు ఎవరూ బాధ్యులు కాదు’ అని ఒక గమనిక ఇవ్వబడింది. 7వ తరగతి గత పాఠ్యపుస్తకంలో మొఘల్ శకంపై విభాగాలు ఉన్నప్పటికీ, ఎన్‌సిఇఆర్‌టి దీనిని మార్చింది.
కొత్త సిలబస్ ప్రకారం, ఢిల్లీ సుల్తాన్ కాలం, మొఘల్ శకం 8వ తరగతి నుండి బోధించబడతాయి. ఢిల్లీ సుల్తాన్ కాలం రాజకీయ అస్థిరత కాలంగా వర్ణించారు. గ్రామాలు, నగరాలు దోచుకోబడ్డాయని, దేవాలయాలు, విద్యాసంస్థలు నాశనం చేయబడ్డాయని పేర్కొన్నారు. అయితే శివాజీని తన సొంత మతాన్ని సమర్థించిన, ఇతర మతాలను గౌరవించిన హిందువుగా ఈ పుస్తకంలో వర్ణించారు. జాతీయ విద్యా విధానానికి అనుగుణంగా పాఠ్యపుస్తకాలను రూపొందించామని ఎన్‌సిఇఆర్‌టి తెలిపింది.
