అక్క కన్నీటికి కరిగిన హృదయాలు.. నాగమణి ప్రాణాల కోసం వెల్లువెత్తుతున్న సాయం!

రిమ్స్‌లో నాగమణిని పరామర్శించిన మాజీ ఎమ్మెల్యే రాథోడ్ బాపురావ్

నాగమణి వైద్యానికి మరింత మంది దాతలు ముందుకు రావాలని విజ్ఞప్తి

నవతెలంగాణ–నేరడిగొండ :

‘చెల్లి ప్రాణాల కోసం అక్క కన్నీటి ప్రార్థన’ శీర్షికన నవతెలంగాణలో ప్రచురితమైన కథనం పలువురి హృదయాలను కదిలించింది. తల్లిదండ్రులను కోల్పోయి, తీవ్ర అనారోగ్యంతో రిమ్స్ ఆసుపత్రిలో చికిత్స పొందుతున్న 15 ఏళ్ల ఆత్రం నాగమణిని కాపాడుకునేందుకు ఆమె అక్క జల్దేవి పడుతున్న ఆవేదనకు ప్రజల నుంచి స్పందన లభిస్తోంది. నవతెలంగాణ కథనం వెలువడిన అనంతరం ప్రజాప్రతినిధులు, గ్రామస్తులు, దాతలు మానవత్వంతో ముందుకొచ్చి తమ వంతు సాయం అందిస్తున్నారు. ఆపదలో ఉన్న అక్కాచెల్లెళ్లకు అండగా నిలుస్తున్నారు.

నాగమణిని పరామర్శించిన రాథోడ్ బాపురావ్

కథనంపై స్పందించిన బోథ్ మాజీ ఎమ్మెల్యే, తెలంగాణ రక్షణ సేన జిల్లా అధ్యక్షుడు రాథోడ్ బాపురావ్ రిమ్స్ ఆసుపత్రికి చేరుకుని నాగమణి ఆరోగ్య పరిస్థితిని వైద్యులను అడిగి తెలుసుకున్నారు. చిన్నారికి మెరుగైన వైద్యం అందించాలని కోరారు. చెల్లి పరిస్థితిపై ఆందోళన చెందుతున్న జల్దేవిని ఓదార్చి, వైద్య ఖర్చుల నిమిత్తం ఆర్థిక సాయం అందించారు. ఎలాంటి కష్టం వచ్చినా అండగా ఉంటానని భరోసా ఇచ్చారు. అవసరమైన సహాయం అందించేందుకు తన వంతు కృషి చేస్తానని తెలిపారు.

చందాలు వేసి ఆదుకున్న బోరిగాం గ్రామస్తులు

నేరడిగొండ మండలం బోరిగాం గ్రామస్తులు అక్కాచెల్లెళ్ల దుస్థితిని చూసి చలించిపోయారు. గ్రామంలో ఇంటింటికీ తిరిగి చందాలు సేకరించి రూ.3,800 పోగుచేసి బాధితులకు అందించారు. ఆపదలో ఉన్న చిన్నారులను ఆదుకునేందుకు గ్రామస్తులు చూపిన చొరవ పలువురికి స్ఫూర్తిగా నిలుస్తోంది. గ్రామస్తుల బాటలోనే మరికొందరు దాతలు సైతం ముందుకొచ్చి తమకు తోచిన ఆర్థిక సాయాన్ని అందిస్తున్నారు. కష్టకాలంలో తమకు అండగా నిలుస్తున్న ప్రతి ఒక్కరికీ బాధితులు కృతజ్ఞతలు తెలుపుతున్నారు.

నాగమణి వైద్యానికి దాతలు చేయూతనివ్వాలి

కిడ్నీ వ్యాధితో తండ్రిని, ఆ తర్వాత తల్లిని కోల్పోయిన ఈ అక్కాచెల్లెళ్లు కూలి పనులు చేసుకుంటూ జీవనం సాగిస్తున్నారు. చిన్న వయసులోనే తల్లిదండ్రులను కోల్పోయి, ఒకరికొకరు అండగా జీవిస్తున్న వీరి జీవితాల్లో ఇప్పుడు అనారోగ్యం మరో పెను సవాలుగా మారింది. చెల్లికి వైద్యం చేయించేందుకు అక్క జల్దేవి పడుతున్న తపన, ఎదుర్కొంటున్న ఆర్థిక ఇబ్బందులు పలువురిని కలచివేస్తున్నాయి. నాగమణి చికిత్సకు అవసరమైన ఖర్చులను భరించలేని పరిస్థితిలో ఉన్న ఈ అక్కాచెల్లెళ్లకు మరింత ఆర్థిక సహాయం అవసరమవుతోంది.

మీకు తోచిన సాయం చేయండి.. ఒక ప్రాణాన్ని కాపాడటంలో భాగస్వాములు కండి!

నాగమణి త్వరగా కోలుకుని ఆరోగ్యంగా తిరిగి రావాలంటే దాతలు, స్వచ్ఛంద సంస్థలు, ప్రజాప్రతినిధులు, మానవతావాదులు మరింత మంది ముందుకొచ్చి తమ వంతు సహకారం అందించాలని విజ్ఞప్తి చేస్తున్నారు. పెద్ద మొత్తంలోనే సాయం చేయాలనే పరిమితి లేదు.. ప్రతి ఒక్కరూ తమకు తోచినంత సాయం అందిస్తే అది నాగమణి వైద్యానికి ఎంతో తోడ్పడుతుంది. మీ చిన్న సహాయం కూడా ఈ కుటుంబానికి కొండంత అండగా నిలవవచ్చు. తల్లిదండ్రులను కోల్పోయిన అక్కాచెల్లెళ్ల జీవితాల్లో మళ్లీ ఆశలు నింపేందుకు ప్రతి ఒక్కరూ మానవత్వంతో స్పందించాలని కోరుతున్నారు.

ఆర్థిక సహాయం అందించదలచిన దాతలు 7730022253 నంబర్‌ను సంప్రదించి తమకు తోచినంత సహాయం అందించగలరు.ఆపదలో ఉన్న చిన్నారికి అండగా నిలిచి, నాగమణి చికిత్సకు తోడ్పడి, అక్క జల్దేవి కన్నీటిని తుడిచేందుకు ప్రతి ఒక్కరూ ముందుకు రావాలని మనస్ఫూర్తిగా విజ్ఞప్తి చేస్తున్నారు. ఒకరి చేయూత.. ఒక కుటుంబానికి భరోసా.. ఒక ప్రాణానికి ఆశ!