భారీ వర్షం.. క్లాస్‌రూమ్‌లో గొడుగులు పట్టుకుని పాఠాలు విన్న విద్యార్థులు

నవతెలంగాణ – హైదరాబాద్: పశ్చిమ బెంగాల్‌లో భారీ వర్షం కారణంగా ఓ పాఠశాల క్లాస్‌ రూమ్‌ లీకవుతుండటంతో విద్యార్థులు గొడుగులు పట్టుకుని పాఠాలు విన్నారు. ఉపాధ్యాయులు సైతం గొడుగులు పట్టుకునే పాఠాలు బోధించారు. ఈ ఘటన హుగ్లీ జిల్లాలో చోటు చేసుకుంది. గత వారంరోజులుగా బెంగాల్‌ వ్యాప్తంగా భారీ వర్షాలు కురుస్తున్నాయి. ఈ వర్షాలకు హుగ్లీలోని ప్రాథమిక పాఠశాల మొత్తం లీకవుతోంది. మూడు తరగతి గదులు మినహా మిగతావాటన్నింటిలోనూ వర్షం నీరు కారుతోంది. దీంతో విద్యార్థులు గొడుగుల సాయంతో పాఠాలు విన్నారు. ఇందుకు సంబంధించిన ఫొటో ప్రస్తుతం వైరల్‌ అవుతోంది. 1972లో స్థాపించిన ఈ పాఠశాల నిర్లక్ష్యం కారణంగా శిథిలావస్థకు చేరింది. కేవలం మూడు గదులు మాత్రమే పనిచేస్తున్నట్లు ఉపాధ్యాయులు తెలిపారు. అవి కూడా పేలవమైన స్థితిలో ఉన్నాయని పేర్కొన్నారు. అధికారులు తక్షణమే చర్యలు తీసుకోవాలని విజ్ఞప్తి చేస్తున్నారు.