‘వందే భారత్’ లో హిందూత్వ రాజకీయాలా..? : కేరళ సిఎం పినరయి విజయన్

నవతెలంగాణ – తిరువనంతపురం: వందే భారత్ ప్రారంభోత్సవంలో తీవ్ర హిందూత్వ రాజకీయాల అక్రమ రవాణా జరిగిందని ముఖ్యమంత్రి పినరయి విజయన్ అన్నారు. ప్రభుత్వ అధికారిక కార్యక్రమంలో ఆర్‌ఎస్‌ఎస్ పాటను చేర్చడం రాజ్యాంగ సూత్రాల ఉల్లంఘన అని ఆయన పేర్కొన్నారు. ఎర్నాకుళం-బెంగళూరు వందే భారత్ సేవ ప్రారంభోత్సవంలో విద్యార్థులను ఆర్‌ఎస్‌ఎస్ గణేశుడి పాటను పాడేలా చేసిన దక్షిణ రైల్వే చర్య అత్యంత అభ్యంతరకరమని ముఖ్యమంత్రి ఒక ప్రకటనలో పేర్కొన్నారు. దేశంలోని అతిపెద్ద ప్రభుత్వ రంగ సంస్థ అయిన రైల్వేలను కూడా తమ మత రాజకీయ ప్రచారం కోసం సంఘ్ పరివార్ ఉపయోగించడం ఆమోదయోగ్యం కాదని ఆయన ఆగ్రహించారు. ఈ గణేశ పాటను “దేశభక్తి గీతం” అనే శీర్షికతో సోషల్ మీడియాలో షేర్ చేయడం ద్వారా, దక్షిణ రైల్వే తనను తాను అపహాస్యం చేసుకోవడమే కాకుండా భారత జాతీయ ఉద్యమాన్ని కూడా అపహాస్యం చేసిందని మండిపడ్డారు. స్వాతంత్ర్య పోరాట సమయంలో భారతదేశ లౌకిక జాతీయవాదానికి మూలస్తంభంగా పని చేసిన రైల్వేలు, ఇప్పుడు స్వాతంత్ర్య పోరాటానికి ద్రోహం చేసిన ఆర్‌ఎస్‌ఎస్ మత ఎజెండాకు సేవ చేస్తున్నాయని ధ్వజమెత్తారు. లౌకికవాదాన్ని నాశనం చేయడమే లక్ష్యంగా ఈ చర్య ఉందని తెలిపారు.  దీనికి వ్యతిరేకంగా ప్రజలందరూ నిరసన తెలియజేయాలని ముఖ్యమంత్రి తన ప్రకటనలో పేర్కొన్నారు.