నవతెలంగాణ – పరకాల
తెలంగాణ తొలి ముఖ్యమంత్రి, బిఆర్ఎస్ అధినేత కల్వకుంట్ల చంద్రశేఖర రావు జన్మదిన వేడుకలు మంగళవారం పరకాల పట్టణంలో అత్యంత వైభవంగా జరిగాయి. బిఆర్ఎస్ పార్టీ శ్రేణులు, కేసీఆర్ అభిమానులు పట్టణవ్యాప్తంగా పండుగ వాతావరణంలో సంబరాలు నిర్వహించారు.
కేక్ కట్ చేసి శుభాకాంక్షలు
పట్టణంలోని ప్రధాన కూడలి అయిన బస్టాండ్ సెంటర్ వద్ద పార్టీ నాయకులు భారీ కేక్ కట్ చేసి కేసీఆర్ కి జన్మదిన శుభాకాంక్షలు తెలిపారు. ఒకరికొకరు మిఠాయిలు తినిపించుకుంటూ జై తెలంగాణ, జై కేసీఆర్ నినాదాలతో హోరెత్తించారు.ఈ సందర్భంగా బిఆర్ఎస్ నాయకులు మాట్లాడుతూ.. తెలంగాణ రాష్ట్ర సాధన కోసం ప్రాణాలకు సైతం తెగించి పోరాడిన ధీశాలి కేసీఆర్ అని కొనియాడారు. “ప్రజల సంక్షేమమే ధ్యేయంగా, తెలంగాణ ఆత్మగౌరవాన్ని ప్రపంచానికి చాటిన మహోన్నత నాయకుడు ఆయన. రైతు బంధు, దళిత బంధు వంటి విప్లవాత్మక పథకాలతో రాష్ట్ర భవిష్యత్తును మార్చిన ఘనత ఆయనకే దక్కుతుంది” అని ప్రశంసించారు. రాష్ట్రం అభివృద్ధి పథంలో దూసుకుపోవడానికి కేసీఆర్ దూరదృష్టితో కూడిన నాయకత్వమే కారణమని వారు పేర్కొన్నారు.
ఈ వేడుకల్లో కౌన్సిలర్లు పడిదెల దీప్తి రాకేష్ రావు, రేగురి కరుణ విజయపాల్ రెడ్డి, దుబాసి వెంకటస్వామి, బొచ్చు శ్యామల బాబురావులతో పాటు పలువురు మాజీ ప్రజా ప్రతినిధులు, బిఆర్ఎస్ పార్టీ ముఖ్య నాయకులు, యూత్ విభాగం సభ్యులు, కార్యకర్తలు మరియు అభిమానులు పెద్ద సంఖ్యలో పాల్గొన్నారు.
