నవతెలంగాణ – హైదరాబాద్: ఇండియన్ ప్రీమియర్ లీగ్ (ఐపీఎల్) 2026 సీజన్కు ముందు లక్నో సూపర్ జెయింట్స్ తమ జట్టుకు సరికొత్త రూపాన్ని ఇచ్చింది. మంగళవారం తమ కొత్త లోగోను ఫ్రాంచైజీ ఆవిష్కరించింది. ఇప్పటివరకు నీలం రంగులో కనిపించిన లక్నో జట్టు, ఇకపై ముదురు ఎరుపు రంగులో దర్శనమివ్వనుంది. ఈ కొత్త లోగోలో గరుడ, కిరీటం, ఏనుగు చిహ్నాలను చేర్చారు.
ఈ కొత్త లోగో డిజైన్, సంజీవ్ గోయెంకా గ్రూప్కు చెందిన మరో ఫుట్బాల్ జట్టు ‘మాంచెస్టర్ సూపర్ జెయింట్స్’ లోగోను పోలి ఉండటం గమనార్హం. మాంచెస్టర్ జట్టు లోగోలో కూడా ఏనుగు చిహ్నం ఉంటుంది. తమ కొత్త లోగో కేవలం డిజైన్ మార్పు మాత్రమే కాదని, లక్నో నగరం, ఉత్తరప్రదేశ్ రాష్ట్రం, అలాగే తమ అభిమానుల స్ఫూర్తిని ప్రతిబింబించే చిహ్నమని ఫ్రాంచైజీ ఒక ప్రకటనలో పేర్కొంది.
లక్నో సూపర్ జెయింట్స్ యజమాని శాశ్వత్ గోయెంకా మాట్లాడుతూ, “ఈ కొత్త లోగో మాకు చాలా భావోద్వేగంతో కూడుకున్నది. లక్నో, ఉత్తరప్రదేశ్ ప్రజలు మమ్మల్ని ఎంతగానో ఆదరించారు. వారి ప్రేమకు ఇది నీరాజనం. లోగోలోని గరుడ పక్షి ఉన్నత శిఖరాలకు చేరాలన్న మా ఆశయానికి, కిరీటం అభిమానులు మాపై ఉంచిన గౌరవానికి, ఏనుగు ఈ ప్రాంత ప్రజల బలానికి, విశ్వాసానికి ప్రతీక” అని వివరించారు. ఇది కేవలం గుర్తింపు మార్పు కాదని, నగర గౌరవాన్ని నిలబెట్టి, మనస్ఫూర్తిగా ఆడతామన్న మాటకు కట్టుబడి ఉంటామని ఆయన తెలిపారు.
