లైంగికదాడి కేసులో ఎమ్మెల్యే అరెస్ట్..

నవతెలంగాణ – హైదరాబాద్: కేరళకు చెందిన కాంగ్రెస్ బహిష్కృత ఎమ్మెల్యే రాహుల్ మామ్ కూటతిల్ ను పోలీసులు శనివారం అర్ధరాత్రి అరెస్టు చేశారు. ఆయనపై నమోదైన మూడో లైంగికదాడి ఫిర్యాదు కేసులో ఈ మేరకు చర్యలు తీసుకున్నారు. గతంలో నమోదైన లైంగికదాడి కేసుల్లో కేరళ హైకోర్టు నుంచి, మరో కేసులో ట్రయల్ కోర్టు నుంచి రాహుల్ ముందస్తు బెయిల్ పొందారు. ఈ లైంగికదాడి ఆరోపణలు, కేసుల నేపథ్యంలో రాహుల్ ను కాంగ్రెస్ పార్టీ బహిష్కరించింది. అయితే, తాజాగా ఆయనపై మరో లైంగికదాడి కేసు నమోదైంది. సీఎంవో ఆఫీసుకు మెయిల్ ద్వారా రాహుల్ పై ఓ యువతి ఫిర్యాదు చేసింది. ఈ ఫిర్యాదును సీఎంవో క్రైమ్ బ్రాంచ్ కు పంపగా.. విచారణ నిమిత్తం ఎమ్మెల్యేను అరెస్టు చేసినట్లు ఉన్నతాధికారులు తెలిపారు. ఈమెయిల్ లో బాధితురాలు వెల్లడించిన వివరాల ప్రకారం.. ఎమ్మెల్యే రాహుల్ తనపై లైంగికదాడి చేశాడని, తన అభీష్టానికి వ్యతిరేకంగా అబార్షన్ చేయించాడని ఆరోపించింది.