కస్తూర్బా గాంధీ బాలికల విద్యాలయాన్ని ఎమ్మెల్యే ఆకస్మికంగా తనిఖీ

నవతెలంగాణ – శంకరపట్నం : శంకరపట్నం మండలం కేశవపట్నంలోని కస్తూర్బా గాంధీ విద్యాలయాన్ని మంగళవారం మానకొండూరు ఎమ్మెల్యే కవ్వంపల్లి సత్యనారాయణ ఆకస్మికంగా తనిఖీ చేశారు. ఈ సందర్భంగా విద్యార్థినులు ఎదుర్కొంటున్న సమస్యలను గుర్తించి, వాటి పరిష్కారానికి చర్యలు చేపట్టారు.
కేజీబీవీలో భోజన నాణ్యతపై ఎమ్మెల్యే ఆగ్రహం
కేజీబీవీని సందర్శించినప్పుడు విద్యార్థులు మధ్యాహ్న భోజనం కోసం క్యూలో ఉండగా, ఎమ్మెల్యే నేరుగా డైనింగ్ హాల్‌కు చేరుకుని వారితో మాట్లాడారు. కొంతమంది విద్యార్థినులు మధ్యాహ్న భోజనంలో కూరలు రుచిగా లేవని ఎమ్మెల్యేకు వివరించారు. ఎమ్మెల్యే కవ్వంపల్లి సత్యనారాయణ, మాజీ జెడ్పీటీసీ బత్తని శ్రీనివాస్ గౌడ్, ఎంపీడీవో కృష్ణ ప్రసాద్‌లతో కలిసి భోజనం చేశారు. కూరల్లో ఉప్పు ఎక్కువగా ఉండటంతో, వంట సరిగా చేయడం లేదని, మెనూ పాటించడం లేదని వంట మనుషులపై ఆయన తీవ్ర ఆగ్రహం వ్యక్తం చేశారు.
విద్యార్థుల కన్నీళ్లు, కుక్ రేణుక సస్పెన్షన్ ఆదేశం
భోజనం చేసిన తర్వాత, కొంతమంది విద్యార్థినులు కన్నీళ్లు పెట్టుకుంటూ, ఎమ్మెల్యేకు తమ సమస్యలను వివరించారు. చపాతీలు చేయాలని, కూరలు రుచిగా లేవని అడిగితే కుక్ రేణుక దూషిస్తుందని విద్యార్థినులు ఎమ్మెల్యే ముందు వాపోయారు. దీనితో ఎమ్మెల్యే కేజీబీవీ కోఆర్డినేటర్ కృపరాలితో వంట తీరుపై మాట్లాడారు. విద్యార్థినులను దూషిస్తున్న కుక్ రేణుకను వెంటనే సస్పెండ్ చేయాలని అధికారులను ఆదేశించారు. ప్రభుత్వం విద్యార్థుల కోసం లక్షల రూపాయల నిధులు ఖర్చు చేస్తుంటే సరిగా వంట చేయకపోవడం, మెనూ పాటించకపోవడంపై ఎమ్మెల్యే మండిపడ్డారు. తరగతి గదుల తనిఖీ, ప్రాథమిక ఆరోగ్య కేంద్రం పరిశీలన అనంతరం ఎమ్మెల్యే తరగతి గదుల్లోకి వెళ్లి విద్యార్థులకు పాఠాలు బోధించారు. పలు ప్రశ్నలు అడిగి వారి సమాధానాలు రాబట్టారు. ఈ తనిఖీలో ఎమ్మెల్యే వెంట తహసిల్దార్ సురేఖ, ఎంపీవో ప్రభాకర్ ఉన్నారు. తదనంతరం, ఎమ్మెల్యే కేశవపట్నం ప్రాథమిక ఆరోగ్య కేంద్రాన్ని కూడా తనిఖీ చేశారు. అక్కడ మందుల నిల్వలను, రిజిస్టర్లను పరిశీలించి వైద్య సిబ్బందికి పలు సూచనలు చేశారు.