నవతెలంగాణ కన్నూర్: దేశవ్యాప్తంగా అన్యాయం, అసమానతలు పెరుగుతున్న సమయంలో కేరళ రాష్ట్రం అభివృద్ధి, సౌభ్రాతృత్వానికి హరితాండవంగా నిలుస్తోందని ప్రముఖ నటుడు ప్రకాష్ రాజ్ అన్నారు. కన్నూర్లో జరిగిన ఒక సాంస్కృతిక కార్యక్రమంలో ఆయన ఈ వ్యాఖ్యలు చేశారు. గత పదేళ్లుగా కేరళ ముఖ్యమంత్రి పినరయి విజయన్ దక్షిణ భారతదేశానికి ఆశాకిరణంగా నిలిచారని ప్రకాష్ రాజ్ ప్రశంసించారు. కేంద్ర ప్రభుత్వ విధానాలకు వ్యతిరేకంగా రాజీలేని ధోరణి తీసుకోవడంలో ఆయన చూపుతున్న దృఢత్వం అభినందనీయమని పేర్కొన్నారు. మతతత్వానికి వ్యతిరేకంగా నిలబడే నాయకులు దేశానికి అవసరమని, దక్షిణ భారత ముఖ్యమంత్రులు ఈ విషయంలో కఠిన వైఖరి అవలంబిస్తున్నారని ఆయన అన్నారు. బీజేపీకి భయపడని నాయకత్వం అవసరమని కూడా వ్యాఖ్యానించారు. రాబోయే ఐదేళ్ల పాటు పినరయి విజయన్ పదవిలో కొనసాగాలని తాను కోరుకుంటున్నట్లు తెలిపారు.
ప్రకాష్ రాజ్ ప్రసంగం జరుగుతున్న సమయంలో ముఖ్యమంత్రి పినరయి విజయన్ వేదికపై ఉన్నారు. ఈ కార్యక్రమంలో ప్రముఖ రచయిత టి.పద్మనాభన్ కూడా పాల్గొని ముఖ్యమంత్రిపై తన గౌరవాన్ని వ్యక్తం చేశారు. అలాగే ప్రముఖ నటుడు కమల్ హాసన్ వీడియో సందేశం ద్వారా కార్యక్రమానికి మద్దతు తెలిపారు. యువ ర్యాపర్ వేదన్ సంగీత ప్రదర్శనతో సభ ఆకట్టుకుంది. సాంస్కృతిక, సామాజిక రంగాలకు చెందిన పలువురు ప్రముఖులు ఈ కార్యక్రమంలో పాల్గొన్నారు.
