నవతెలంగాణ – హైదరాబాద్: వెస్టిండీస్‌తో జరుగుతున్న రెండో టెస్టులో టీమిండియా యువ బ్యాటర్ సాయి సుదర్శన్ గాయపడ్డాడు. ఈ కారణంగా మూడో రోజు ఆటలో ఫీల్డింగ్‌కు దూరమయ్యాడు. అయితే, గాయం తీవ్రమైనది కాదని, ముందుజాగ్రత్త చర్యగానే అతడికి విశ్రాంతినిచ్చినట్లు భారత క్రికెట్ నియంత్రణ మండలి (బీసీసీఐ) స్పష్టం చేసింది. న్యూఢిల్లీలోని అరుణ్ జైట్లీ స్టేడియం వేదికగా జరుగుతున్న ఈ మ్యాచ్‌లో రెండో రోజు ఆట సందర్భంగా ఈ ఘటన చోటుచేసుకుంది. రవీంద్ర జడేజా బౌలింగ్‌లో వెస్టిండీస్ ఓపెనర్ జాన్ క్యాంప్‌బెల్ కొట్టిన షాట్‌ను ఫార్వర్డ్ షార్ట్ లెగ్ వద్ద సాయి సుదర్శన్ అందుకున్నాడు.
బంతి వేగంగా వచ్చి మొదట అతని హెల్మెట్‌కు తగిలినా, ఏమాత్రం పట్టు జారనీయకుండా క్యాచ్ పూర్తి చేశాడు. అయితే, ఈ క్రమంలో అతని చేతికి బలంగా దెబ్బ తగలడంతో వెంటనే మైదానం వీడాల్సి వచ్చింది. అతడి స్థానంలో దేవదత్ పడిక్కల్ సబ్‌స్టిట్యూట్ ఫీల్డర్‌గా వచ్చాడు. ఈ విషయంపై బీసీసీఐ తాజాగా ఒక ప్రకటన విడుదల చేసింది. “రెండో రోజు క్యాచ్ పట్టే క్రమంలో సాయి సుదర్శన్ చేతికి దెబ్బ తగిలింది. ముందుజాగ్రత్త చర్యగా అతను మూడో రోజు ఫీల్డింగ్‌కు రాలేదు. గాయం తీవ్రమైనది కాదు, అతను బాగానే ఉన్నాడు. బీసీసీఐ వైద్య బృందం అతడిని నిరంతరం పర్యవేక్షిస్తోంది” అని బోర్డు ఆ ప్రకటనలో తెలిపింది.
