లయన్ డా. సాయి వెంకట్ నటిస్తూ, దర్శకత్వం వహించిన సినిమా ‘జయహో రామానుజ’.
సుదర్శనం ప్రొడక్షన్స్లో సాయి ప్రసన్న, ప్రవళ్లిక నిర్మిస్తున్నారు. అమెరికా నటి జో శర్మ హీరోయిన్ గా నటిస్తుండగా, సుమన్, ప్రవళ్లిక ఇతర కీలక పాత్రల్లో కనిపించనున్నారు. ఈ నెల 24న ఈ సినిమా ప్రేక్ష‍కుల ముందుకు రానుంది. ఈ నేపథ్యంలో గురువారం ట్రైలర్ లాంచ్‌ వేడుకను ఘనంగా నిర్వహించారు.
హీరో, డైరెక్టర్ లయన్ సాయి వెంకట్ మాట్లాడుతూ, ‘ఆధ్యాత్మిక విప్లవకారుడు రామానుజాచార్యుల జీవిత కథతో ఈ సినిమాను ఎంతో వ్యయ ప్రయాసలకు ఓర్చి రూపొందించాం. గొప్ప సినిమాలను ప్రజలు తండోప తండాలుగా థియేటర్స్ కు వెళ్లి చూస్తుంటారు. మా సినిమాకు కూడా అలాంటి ఆదరణే దక్కుతుందని నమ్ముతున్నాం. డబ్బుల కోసం ఈ సినిమాని రూపొందించలేదు. రామానుజాచార్యుల వారి గొప్ప కథను ఈ తరం వారికి చూపించాలని ప్రయత్నించాం’ అని తెలిపారు.
‘ఈ సినిమాను నిర్మించే అవకాశం రావడం అదృష్టంగా భావిస్తున్నా.
అందుకు మా నాన్నకి థ్యాంక్స్. ఈ సినిమాకి నిర్మాణ బాధ్యతలు వహిస్తూనే, కృష్ణుడు, నారదుడు, రఘునాథస్వామి పాత్రల్లో నటించాను. రామానుజాచార్యుల వారి జీవితం నుంచి మనం నేర్చుకోవాల్సింది ఎంతో ఉందని నమ్మి ఈ సినిమాను నిర్మించాం’ అని నటి, ప్రొడ్యూసర్ ప్రవళ్లిక అన్నారు. నటుడు సుమన్ మాట్లాడుతూ,‘ఈ సినిమా గురించి సాయి వెంకట్ చెప్పినప్పుడు చాలా కష్టంతో కూడు కున్న సినిమా కదా అన్నాను. ఆయన మేము ఈ సినిమాను నిర్మించాలని లక్ష్యంగా పెట్టుకున్నామని చెప్పారు. ఆయన చాలా కన్విక్షన్ తో రూపొందించారు. ఈ సినిమాలో మంచి క్యారెక్టర్ చేసే అవకాశం దక్కింది. మన దేశంలో ఎన్నో మతాలు, కులాలు, వర్గాలు ఉన్నాయి. అయినా మనమంతా కలిసే ఉంటున్నాం. ఈ భావనకు మొదట కృషి చేసింది రామానుజాచార్యుల వారు. మనమంతా ఒక్కటే అని ఆయన చెప్పిన గొప్ప మాటలు మనల్ని ఇప్పటికీ ఐక్యంగా నడిపిస్తున్నాయి. ఈ సినిమాని మీ ఫ్యామిలీతో కలిసి సంతోషంగా చూడండి’ అని చెప్పారు.
కామెంట్‌లు (0)