నవ్వించే జాతకాల పిచ్చోడు

‘కామన్‌ మ్యాన్‌ పాత్రల్ని పోషిస్తే ఎక్కువ మందికి రీచ్‌ అవుతుందని నా నమ్మకం. ‘మల్లేశం’ అయినా, ‘సారంగపాణి’ అయినా మన చుట్టు, పక్కనే చూస్తాం. వారి జర్నీ చాలా పెయిన్‌ ఫుల్‌గా ఉంటుంది. ‘మల్లేశం, బలగం, కోర్ట్‌, సారంగపాణి’ ఇలా అన్నీ కూడా మన చుట్టూనే చూస్తుంటాం. ఇందులో జాతకాల్ని నమ్మే ఓ కుర్రాడి పాత్రను పోషించాను’ అని హీరో ప్రియదర్శి చెప్పారు. ఆయన నటించిన తాజా సినిమా ‘సారంగపాణి జాతకం’. శ్రీదేవీ మూవీస్‌ పతాకంపై శివలెంక కష్ణ ప్రసాద్‌ నిర్మాణంలో మోహనకష్ణ ఇంద్రగంటి తెరకెక్కించిన చిత్రమిది. ఈ సినిమా ఈనెల 25న రిలీజ్‌ కానుంది. ఈ సందర్భంగా ప్రియదర్శి మీడియాతో సంభాషించారు.
ఫొటో దిగితే చాలని అనుకునేవాడ్ని
దర్శకుడు ఇంద్రగంటితో ఒక ఫొటో దిగితే చాలని అనుకునేవాడ్ని. కానీ అలాంటి ఆయనే కథను తీసుకొచ్చి చెప్పారు. కథ విన్న వెంటనే అద్భుతంగా అనిపించింది. జాతకాల పిచ్చోడు అంటూ కథ మొత్తాన్ని చెప్పారు. ‘సారంగపాణి జాతకం’ అని టైటిల్‌ కూడా చెప్పారు. ఆ టైటిల్‌ కూడా నాకు చాలా నచ్చింది. టైటిల్‌ అద్భుతంగా ఉంది సర్‌ అని అన్నాను. ఇక ఆయనతో నా ఫస్ట్‌ డే షూటింగ్‌ అయితే ఎప్పటికీ గుర్తుండి పోతుంది. ‘కోర్ట్‌’ లాంటి హిట్‌ తరువాత మళ్లీ వెంటనే ‘సారంగపాణి జాతకం’ అని వస్తుండటం ఆనందంగా ఉంది. సినిమా ఫలితంపై నాకు కాన్ఫిడెన్స్‌ ఉంది.
ఒకరి నమ్మకాల్ని మరొకరిపై రుద్దితే?
ఈ చిత్రంలో చూపించినట్టుగా కాదు కానీ.. నేను కూడా జాతకాలను కొంత నమ్ముతాను. అయితే ఇందులో జాతకాలు నమ్మాలి అని కానీ నమ్మకూడదు అని కానీ మేం చెప్పం. కానీ ఒకరి నమ్మకాల్ని ఇంకొకరి మీద రుద్దితే ఎలాంటి పరిణామాలు ఎదురవుతాయో చూపిస్తాం.
నవ్వించడం చాలా కష్టమైన పని
ప్రస్తుతం నవ్వించడం అనేది చాలా కష్టమైన పని. ఇంద్రగంటి కామెడీ టైమింగ్‌ చాలా బాగుంటుంది. ఇలాంటి ఓ పాత్రను ఇంత వరకు నేను చేయలేదనిపిస్తోంది. ఇది చాలా కొత్తగా ఉండబోతోంది. ఈ చిత్రం, అందులోని నా పాత్ర అందరికీ నచ్చుతుందని భావిస్తున్నాను. ఇంత వరకు నేను ఎక్కువగా తెలంగాణ మాండలికంలోనే ఎక్కువగా మాట్లాడాను. కానీ ఈసారి మాత్రం ఆంధ్ర యాసలో మాట్లాడతాను. ఇంద్రగంటి స్టైల్‌లోనే మాట్లాడేందుకు ప్రయత్నించాను. ఆయన నా కోసం ఇందులో సపరేట్‌ ట్రాక్‌, టైమింగ్‌ను సెట్‌ చేశారు. శివలెంక కృష్ణ ప్రసాద్‌ చాలా గొప్ప నిర్మాత. ఆయన బ్యానర్‌లో పని చేసే అవకాశం రావడం నా అదృష్టం. ప్రస్తుతం ఏషియన్‌ సినిమాస్‌లో’ ప్రేమంటే’ అనే సినిమాను కొత్త దర్శకుడితో చేస్తున్నాను. గీతా ఆర్ట్స్‌లో బన్నీ వాస్‌ నిర్మాణంలో ‘మిత్రమండలి’ అనే మరో ప్రాజెక్ట్‌ చేస్తున్నాను. భవిష్యత్‌లోనూ బలమైన పాత్రలుండే సినిమాల్ని ఎక్కువగా చేయాలని అనుకుంటున్నాను.